တၢ်အိၣ်မူယိယိဖိလၢ အပှဲၤဒီးတၢ်သးခု

ဒဲနံၣ်ယၢၤ ဒီးမဲရံယဲန့ၣ် ဖျီအသးဖဲ လါစဲးပတ့ဘၢၣ် ၂၀၀၀ နံၣ်န့ၣ်လီၤ. ဖဲအဝဲသ့ၣ် အိၣ်လၢဝ့ၢ်ဘၤစလိၣ်နၣ် လၢကီၢ်စပ့ၣ်အပူၤအခါ အိၣ်ဘၣ်ဝဲဘီၣ်ဘီၣ်ညီညီလီၤ. ဒဲနံၣ်ယၢၤတဲဝဲလၢ– “ပအိၣ်ဒီး တၢ်ဖံးတၢ်မၤဂ့ၤဂ့ၤအဃိ ပလဲၤအီၣ်ဘၣ် တၢ်အီၣ်အဝံၣ်အဘဲလၢကျးပူၤ, ပလဲၤဟးလိာ်ကွဲလၢ ထံဂၤကီၢ်ဂၤ ဒီးပပှ့ၤတၢ်ကူတၢ်ကၤလၢ အပှ့ၤဒိၣ်ဒိၣ်တဖၣ်န့ၢ်ဝဲလီၤ. တကးဒံးဘၣ် ပဟးစံၣ်တဲၤတဲလီၤတၢ်ထီဘိလီၤ.” ဘၣ်ဆၣ် တၢ်ဆီတလဲအိၣ်ထီၣ်ဝဲတမံၤလီၤ.

ဖဲ ၂၀၀၆ တၢ်အိၣ်ဖှိၣ်ဖးဒိၣ်န့ၣ် ဒဲနံၣ်ယၢၤ နၢ်ဟူဘၣ်ဝဲ တၢ်စံၣ်တဲၤတဲလီၤတခါလီၤ. ဒီးတၢ်စံၣ်တဲၤတဲလီၤအံၤအပူၤန့ၣ် ဒီပုၢ်ဝဲၢ်ခွါတဂၤ သံကွၢ်ဝဲဒၣ်လၢ– “ဒ်သိးပှၤလၢ ‘ဘူးတၢ်ကမၤသံအီၤ’ တဖၣ် ကတုၤလၢ တၢ်မူအထူအယိာ်အကျဲဖီခိၣ်အဂီၢ် မ့ၢ်နဂုာ်ကျဲးစၢးမၤစၢၤအဝဲသ့ၣ်လၢ အဂ့ၤကတၢၢ်လံဧါ.” (ကတိၤဒိ ၂၄:၁၁) တၢ်စံၣ်တဲၤတဲလီၤအံၤ ပာ်ဖျါထီၣ်ဝဲလၢ ပအိၣ်ဒီးမူဒါလၢ ပကဘၣ်စံၣ်တဲၤတဲလီၤတၢ် မ့ၢ်လၢ ပတၢ်စံၣ်တဲၤတဲလီၤတၢ်န့ၣ် မၤပူၤဖျဲးပှၤဟီၣ်ခိၣ်ဖိတဖၣ် အသးသမူသ့အဃိလီၤ. (မၤတၢ် ၂၀:၂၆, ၂၇) ဒဲနံၣ်ယၢၤ တဲဝဲလၢ ဖဲပှၤဟ့ၣ်တၢ်စံၣ်တဲၤတဲလီၤအံၤအခါ “ယတူၢ်ဘၣ်လၢ ယဟိဝၤယွၤတဲယၤလီၤ.” ဒီးလၢတၢ်စံၣ်တဲၤတဲလီၤအံၤအပူၤန့ၣ် ပာ်ဖျါထီၣ်စ့ၢ်ကီးဝဲလၢ ပတၢ်မၤမ့ၢ်အါလၢ ယဟိဝၤယွၤအတၢ်မၤအပူၤန့ၣ် ပကဒိးန့ၢ်ဘၣ်တၢ်သူၣ်ဖှံသးညီလီၤ. ဒဲနံၣ်ယၢၤ ထံၣ်ဘၣ်ဝဲလၢ အမါမဲရံယဲ အိၣ်ဒီးတၢ်သူၣ်ခုသးခု ခီဖျိလၢအမၤပှၤလဲၤလၢညါအဃိလီၤ. လၢတၢ်န့ၣ်အဃိ အဝဲသ့ၣ်ညါဝဲလၢ တၢ်စံၣ်တဲၤတဲလီၤအံၤဘၣ်ဝဲ နီၢ်ကီၢ်ကီၢ်လီၤ.

တၢ်စံၣ်တဲၤတဲလီၤအံၤထုးန့ၢ် ဒဲနံၣ်ယၢၤအသး တုၤဒၣ်လဲာ် အဝဲကဆီတလဲအတၢ်အိၣ်မူလီၤ. ဒဲနံၣ်ယၢၤ မၤစှၤလီၤတၢ်မၤဒီး စးထီၣ်မၤဝဲပှၤလဲၤလၢညါန့ၣ်လီၤ. အဝဲဆိကမိၣ်ဝဲလၢ အဝဲဒီးအမါ မ့ၢ်လဲၤမၤစၢၤတၢ်လၢ တၢ်လီၢ်လၢပှၤလိၣ်ဘၣ်တၢ်မၤစၢၤန့ၣ် အဝဲသ့ၣ်ကဒိးန့ၢ်ဘၣ် တၢ်သးခု ထဲလဲၣ်န့ၣ်လီၤ.

တၢ်ကီတၢ်ခဲအိၣ် ဘၣ်ဆၣ် ပဒိးန့ၢ်ဘၣ်တၢ်ဆိၣ်ဂ့ၤ

ဖဲလါမ့ၤ ၂၀၀၇ န့ၣ် ဒဲနံၣ်ယၢၤ ဒီးမဲရံယဲ ဟးထီၣ်လၢတၢ်မၤ ဒီးလဲၤသုးအသးလၢ ကီၢ်ဖနါမါန့ၣ်လီၤ. အဝဲသ့ၣ် ဘၣ်လဲၤစံၣ်တဲၤတဲလီၤတၢ်လၢ ကီးဘိခး(စ်) ဒဲ(လ်) ထိရိၤ အၤခၠံၤဖလိၤကိၤ လၢအအိၣ်ဘူးဒီး ခဲရံၤဘံယဲၤအပီၣ်လဲၣ်န့ၣ်လီၤ. ပှၤအိၣ်ဖဲန့ၣ်အါတက့ၢ်န့ၣ် မ့ၢ်ဝဲပှၤကဲဘံၤဖိလီၤ. ဒဲနံၣ်ယၢၤဒီးမဲရံယဲ ဆိကမိၣ်ဝဲ စ့လၢအစူးပာ်ဝဲန့ၣ် အိၣ်တစဲးဖိအဃိ အဝဲသ့ၣ်အိၣ်ဖဲန့ၣ် ကန့ၢ်ဝဲထဲဃိးလါလီၤ.

ဒ်သိးအဝဲသ့ၣ်ကလဲၤဝဲလၢ ကီးတဖၣ်အံၤအဂီၢ် ဘၣ်လဲၤဒိးဝဲ ချံဒီးလ့ၣ်ယီၢ်လီၤ. အဝဲသ့ၣ်သ့ၣ်နီၣ်ထီၣ်က့ၤဝဲ ဖဲအလဲၤတၢ်လၢ လ့ၣ်ယီၢ်အဆိကတၢၢ်တဘျီန့ၣ်လီၤ. အဝဲသ့ၣ်ဘၣ်ယီၢ်ထီၣ် လ့ၣ်ယီၢ်လၢ တၢ်လူၢ်ခိၣ် တၢ်ဒ့ၣ်စၢၤယံၤဝဲ ၃၀ ကံလိမံထၢၣ် (အမံးလာ် ၂၀) န့ၣ်လီၤ. ဒီးမ့ၢ်လၢတၢ်ကိၢ်ဒိၣ်မးအဃိ ဒဲနံၣ်ယၢၤလီၤဘှံးဒီး ဘူးကသးပ့ၤနီၣ်အသးညါ. ဘၣ်ဆၣ် မ့ၢ်လၢ ဒဲနံၣ်ယၢၤဒီးအမါ မၤလိဝဲပှၤကဲဘံၤဖိအကျိာ်အဃိ ပှၤအိၣ်ဖဲန့ၣ်သ့ၣ်တဖၣ် တူၢ်လိာ်မုာ်အဝဲသ့ၣ် ဂ့ၤမးလီၤ. အဝဲသ့ၣ် လဲၤအိၣ်ဖဲန့ၣ် တယံာ်ဘၣ်ဒီး အပှၤမၤလိလံာ်စီဆှံဖိ အိၣ်ဝဲ ၂၃ ဂၤလီၤ.

စ့လၢ အဝဲသ့ၣ်စူးပာ်ဝဲတဖၣ်လၢာ်အဃိ အဝဲသ့ၣ်တူၢ်ဘၣ်ဝဲဒ်လဲၣ်. ဒဲနံၣ်ယၢၤ စံးဝဲလၢ– “ဖဲပဆိကမိၣ်ထီၣ်လၢ ပကဘၣ်က့ၤကဒါလၢ ကီၢ်စပ့ၣ်အခါ ပမဲာ်ထံထီၣ်ဝဲလီၤ. တကးဒံးဘၣ် မ့ၢ်လၢ ပကဘၣ်ပာ်တ့ၢ်ကွံာ် ပပှၤမၤလိလံာ်စီဆှံဖိတဖၣ်အဃိ ပသးအုးဒိၣ်မးလီၤ.” ဘၣ်ဆၣ် လၢခံတလါန့ၣ် ပဒိးန့ၢ်ဘၣ်တၢ်ကစီၣ်လၢ အလီၤသူၣ်ပိၢ်သးဝးတခါလီၤ. မဲရံယဲ စံးဝဲလၢ– “ပဘၣ်တၢ်ကွဲမုာ်ပှၤလၢ ပကမၤပှၤလဲၤလၢညါလီၤဆီဒီး ပကဆဲးအိၣ်ဘၣ်ဖဲန့ၣ်အဃိ ပသးခုဒိၣ်မးလီၤ.”

တၢ်သူၣ်ခုသးခုဖးဒိၣ်

တၢ်ဆီတလဲ အိၣ်ထီၣ်ဝဲလၢ တၢ်ကရၢကရိအပူၤအဃိ ဖဲ ၂၀၁၅ န့ၣ် ဒဲနံၣ်ယၢၤ ဒီးမဲရံယဲတမၤဘၣ် ပှၤလဲၤလၢညါလီၤဆီလၢၤဘၣ်. အဝဲသ့ၣ် ကမၤဒ်လဲၣ်. အဝဲသ့ၣ်နာ်ဝဲ ယွၤအတၢ်အၢၣ်လီၤအီလီၤလၢ စံးထီၣ်ပတြၢၤ ၃၇:၅ လၢအစံးဝဲ– “တလ့ၣ်နကျဲနကပူၤလၢ ယွၤအလိၤတက့ၢ်. သန့ၤစ့ၢ်ကီးနသးလၢအီၤတက့ၢ်. ဒီးကမၤကဲထီၣ်အီၤလီၤ.” အဝဲသ့ၣ် ဒိးန့ၢ်ဘၣ်ဝဲတၢ်မၤ ဒ်သိးကလုၢ်အီၣ်အသးသမူ ဒီးဆဲးမၤ ပှၤလဲၤလၢညါကန့ၢ်အဂီၢ်လီၤ. ဒီးခဲအံၤ အဝဲသ့ၣ်ဆဲးမၤစၢၤဝဲ တၢ်အိၣ်ဖှိၣ်လၢ ဘဲရဲၤကၢး (စ်) လၢကီၢ်ဖနါမါအပူၤန့ၣ်လီၤ.

ဒဲနံၣ်ယၢၤ စံးဝဲလၢ– “ဖဲပအိၣ်လၢ ကီၢ်စပ့ၣ်အခါ ပဆိကမိၣ်လၢ ပအိၣ်မူတၢ်အိၣ်မူယိယိဖိတသ့ဘၣ်. ဘၣ်ဆၣ်ခဲအံၤ ပအိၣ်မူတၢ်အိၣ်မူယိယိဖိသ့လံ ဒီးတၢ်လၢအရ့ဒိၣ်လၢ ပလိၣ်ဘၣ်တဖၣ် ပဒိးန့ၢ်ဘၣ်အီၤစ့ၢ်ကီးလီၤ.” တၢ်သူၣ်ခုသးခုလၢ ဒဲနံၣ်ယၢၤဒီး မဲရံယဲ ဒိးန့ၢ်ဘၣ်ဝဲ အဒိၣ်ကတၢၢ်န့ၣ် မ့ၢ်မနုၤလဲၣ်. အဝဲသ့ၣ်တဲဝဲလၢ– “ ပမၤစၢၤဘၣ်ပှၤလၢ အိၣ်ဒီးတၢ်ဆီၣ်လီၤသးတဖၣ် ဒ်သိးကသ့ၣ်ညါထီၣ်ယဟိဝၤယွၤအဂ့ၢ်အဃိ တၢ်သူၣ်ခုသးခုလၢ ပဒိးန့ၢ်ဘၣ်တဖၣ်အံၤ ပထိၣ်သတြီၤအီၤဒီး တၢ်အဂၤတသ့နီတမံၤဘၣ်.”