“တၢ်န့ၣ်တဖၣ် သုမ့ၢ်သ့ၣ်ညါဒီးသုမ့ၢ်မၤအီၤဒီး, သုဘၣ်ဆိၣ်ဂ့ၤသုဝဲလီၤ”
“ယတၢ်အီၣ်မ့ၢ်လၢ ယကမၤတၢ်ဖဲပှၤလၢအမၢလီၤယၤ တဂၤန့ၣ်အသး, ဒီးမၤအတၢ်မၤတုၤအဝံၤဝဲန့ၣ်လီၤ.”—ယိၤဟၣ် ၄:၃၄.
၁. ပမ့ၢ်အိၣ်ဒီး ဟီၣ်ခိၣ်အတၢ်ပာ်သူၣ်ပာ်သးဒီး အဲၣ်လီၤထဲပသးန့ၣ် ကမၤဟးဂီၤ ပတၢ်တဂ့ၤတၢ်ဝါလၢအမ့ၢ် တၢ်ဆီၣ်လီၤသးဒ်လဲၣ်.
ဘၣ်မနုၤအဃိ ကီဝဲလၢပကမၤထွဲ တၢ်လၢပမၤလိဘၣ်အီၤလၢ လံာ်စီဆှံအပူၤတဖၣ်န့ၣ်လဲၣ်. မ့ၢ်လၢ ပကမၤထွဲတၢ်လၢအဘၣ်အဂီၢ် ပလိၣ်ဘၣ်တၢ်ဆီၣ်လီၤသးအဃိလီၤ. ဖဲ “မုၢ်နံၤအခံကတၢၢ်” အဆၢကတီၢ်အံၤန့ၣ် ပှၤအါဂၤ “မ့ၢ်ပှၤအဲၣ်လီၤအသး, ပှၤသးကွံစ့, ပှၤခိးထဲသိးလိာ်အသး, ပှၤပာ်ထီၣ်ထီအသး” ဒီး “ပှၤလၢအတကီၤဘၣ်အသး” တဖၣ်အိၣ်ဝးတရံးပှၤအဃိ ပကအိၣ်ဒီးတၢ်ဆီၣ်လီၤသးအဂီၢ်န့ၣ် ကီဝဲလီၤ. (၂ တံၤမသ့း ၃:၁-၃) ဒ်ပမ့ၢ်ယွၤအခ့အပှၤအသိး ပသ့ၣ်ညါလၢ တၢ်သကဲာ်ပဝးတဖၣ်အံၤ တဂ့ၤဘၣ်, ဘၣ်ဆၣ် ဘၣ်သ့ၣ်သ့ၣ် ပကထံၣ်ဘၣ်လၢ ပှၤလၢအအိၣ်ဒီးတၢ်သကဲာ်ပဝးဒ်အံၤတဖၣ်န့ၣ် ဖျါလၢအမၤတၢ်ကဲထီၣ်လိၣ်ထီၣ်ဒီး အတၢ်အိၣ်မူပှဲၤဝဲဒီး တၢ်သူၣ်ခုသးခုနီၢ်နီၢ်လီၤ. (စံးထီၣ်ပတြၢၤ ၃၇:၁; ၇၃:၃) ဒီးဘၣ်သ့ၣ်သ့ၣ် ပကဆိကမိၣ်ဘၣ်လၢ ‘ယပာ်ဆိ ပှၤဂၤအတၢ်လိၣ်ဘၣ်လၢညါန့ၣ် မ့ၢ်အဘျုးအိၣ်ဧါ, ယမ့ၢ်အိၣ်ဒီးတၢ်ဆီၣ်လီၤသးန့ၣ် မ့ၢ်ပှၤဂၤကပာ်ကဲယၤဒံးဧါ.’ (လူၤကၣ် ၉:၄၈) ပမ့ၢ်အိၣ်ဒီးဟီၣ်ခိၣ်အတၢ်ပာ်သူၣ်ပာ်သး ဒီးအဲၣ်လီၤထဲပသးန့ၣ် ကမၤဘၣ်ဒိ ပတၢ်ရ့လိာ်သးဒီး ပဒီပုၢ်ဝဲၢ်တဖၣ် ဒီးဘၣ်သ့ၣ်သ့ၣ် ပှၤဂၤတသ့ၣ်ညါပှၤလၢ ပမ့ၢ်ခရံာ်ဖိဘၣ်. ဘၣ်ဆၣ် ပမ့ၢ်မၤလိ ကစၢ်ယွၤအခ့အပှၤလၢ အအိၣ်ဒီးတၢ်ဆီၣ်လီၤသးတဖၣ်အဂ့ၢ် ဒီးကွၢ်လိမၤဒိးအဝဲသ့ၣ်န့ၣ် ပကဒိးန့ၢ်ဘၣ်အဘျုးလီၤ.
၂. ပဟံးန့ၢ်တၢ်မၤလိလၢ ကစၢ်ယွၤအခ့အပှၤလၢ အသးတီလၢပျၢၤတဖၣ်အအိၣ် ကသ့ဒ်လဲၣ်.
၂ လၢပျၢၤကစၢ်ယွၤအခ့အပှၤလၢ အအိၣ်ဒီးတၢ်သးတီတဖၣ်န့ၣ် ဒ်သိးအဝဲသ့ၣ်ကကဲထီၣ် ကစၢ်ယွၤအတံၤသကိးအဂီၢ် တၢ်မနုၤမၤစၢၤအဝဲသ့ၣ်လဲၣ်. အဝဲသ့ၣ် မၤသးခုကစၢ်ယွၤအသးဒ်လဲၣ်. ဒ်သိးအဝဲသ့ၣ် ကအိၣ်ဒီးတၢ်ဂံၢ်တၢ်ဘါလၢ ကမၤတၢ်လၢအဘၣ်အဂီၢ် တၢ်မနုၤမၤစၢၤအဝဲသ့ၣ်လဲၣ်. ဖဲပဖးလံာ်စီဆှံအခါ ပကထံၣ်ဘၣ် အဝဲသ့ၣ်အဒိအတဲာ်လၢအဂ့ၤ ဒီးပမ့ၢ်ဆိကမိၣ်ထံ တၢ်လၢပဖးအီၤတဖၣ်န့ၣ် ကမၤစၢၤပှၤဒ်သိး ပတၢ်နာ်ကဂၢၢ်ကျၢၤထီၣ်အဂီၢ်လီၤ.
တၢ်လၢကမၤဂၢၢ်ကျၢၤထီၣ်ပတၢ်နာ်
၃, ၄. (က) ယဟိဝၤယွၤ သိၣ်လိပှၤလၢကျဲဒ်လဲၣ်. (ခ) ဒ်သိးပကအိၣ်ဒီး တၢ်နာ်လၢအဂၢၢ်ကျၢၤအဂီၢ် ထဲပသ့ၣ်ညါတၢ်န့ၣ် ဘၣ်မနုၤအဃိ တလၢပှဲၤဒံးဘၣ်လဲၣ်.
၃ ဒ်သိးပမၤဂၢၢ်ကျၢၤထီၣ်ပတၢ်နာ်ကသ့အဂီၢ် တၢ်လၢပလိၣ်ဘၣ်အီၤတဖၣ်န့ၣ် ယဟိဝၤယွၤဟ့ၣ်လီၤပှၤလီၤ. ပဒိးန့ၢ်ဘၣ် တၢ်ဟ့ၣ်ကူၣ်ဒီး တၢ်သိၣ်လိတဖၣ်ခီဖျိလၢ လံာ်စီဆှံ, ပလံာ်လဲၢ်တဖၣ်, ပပှာ်ယဲၤသန့ (website), JW တၢ်ဂီၤမူ တၢ်ရဲၣ်တၢ်ကျဲၤ, ပတၢ်အိၣ်ဖှိၣ်ရိဖှိၣ်တဖၣ် ဒီးကဝီၤအတၢ်အိၣ်ဖှိၣ်တဖၣ်န့ၣ်လီၤ. ဘၣ်ဆၣ် ယ့ၣ်ၡူးတဲဝဲလၢ ထဲဒၣ်ပသ့ၣ်ညါတၢ်န့ၣ် တလၢပှဲၤဒံးဘၣ်. အဝဲတဲဝဲလၢ “ယတၢ်အီၣ်မ့ၢ်လၢ ယကမၤတၢ်ဖဲပှၤလၢအမၢလီၤယၤ တဂၤန့ၣ်အသး, ဒီးမၤအတၢ်မၤတုၤအဝံၤဝဲန့ၣ်လီၤ.”—ယိၤဟၣ် ၄:၃၄.
၄ လၢယ့ၣ်ၡူးအဂီၢ် တၢ်မၤကစၢ်ယွၤအတၢ်မၤန့ၣ် လီၤဂာ်ဒ်တၢ်အီၣ်အသိးလီၤ. ပမ့ၢ်အီၣ်တၢ်အီၣ်လၢ အန့ၢ်ဂံၢ်န့ၢ်ဘါန့ၣ် ပဂံၢ်ပဘါကထီၣ် ဒီးပကအိၣ်ဒီးတၢ်သးခုလီၤ. ဒ်န့ၣ်အသိး ပမ့ၢ်မၤကစၢ်ယွၤအတၢ်မၤန့ၣ် ပတၢ်နာ်ကဂၢၢ်ကျၢၤထီၣ်ဝဲလီၤ. အဒိ တဘျီတခီၣ် တချုးလၢပလဲၤစံၣ်တဲၤတဲလီၤတၢ်ဒံးဘၣ်အခါ ပကတူၢ်ဘၣ်လၢ ပလီၤဘှံးဒိၣ်မး ဘၣ်ဆၣ် ဖဲပလဲၤစံၣ်တဲၤတဲလီၤတၢ်ဝံၤ ပဟဲက့ၤလၢဟံၣ်အခါ ပပှဲၤဒီးတၢ်သူၣ်ခုသးခုဒီး တၢ်သူၣ်မံသးမုာ်လီၤ.
၅. ပမ့ၢ်အိၣ်ဒီး တၢ်ကူၣ်သ့န့ၣ် ပကဒိးန့ၢ်ဘၣ်တၢ်မနုၤလဲၣ်.
၅ တၢ်လၢယဟိဝၤယွၤမၢပှၤတဖၣ် ပမ့ၢ်မၤအီၤန့ၣ် ပမ့ၢ်ပှၤလၢအကူၣ်တၢ်သ့လီၤ. (စံးထီၣ်ပတြၢၤ ၁၀၇:၄၃) ပမ့မ့ၢ် ပှၤလၢအကူၣ်တၢ်သ့န့ၣ် ကကဲဘျုးလၢပဂီၢ်အါမးလီၤ. “ကယဲၢ်တၢ်လၢ အဘၣ်နသးခဲလၢာ်န့ၣ် နတထိၣ်သတြီၤဘၣ်ဒီးအီၤဘၣ်. . . . ကဲထီၣ်ဝဲလၢတၢ်မူအသ့ၣ်တထံး လၢကယဲၢ်ပှၤလၢအဟံးန့ၢ်အီၤအဂီၢ်, ဒီးပှၤလၢအဟံးဃာ်အီၤန့ၣ် ဘၣ်ဆိၣ်ဂ့ၤဝဲလီၤ.” (ကတိၤဒိ ၃:၁၃-၁၈) ယ့ၣ်ၡူးတဲဝဲလၢ “တၢ်န့ၣ်တဖၣ် သုမ့ၢ်သ့ၣ်ညါဒီးသုမ့ၢ်မၤအီၤဒီး, သုဘၣ်ဆိၣ်ဂ့ၤသုဝဲလီၤ.” (ယိၤဟၣ် ၁၃:၁၇) ဒ်သိးယ့ၣ်ၡူးအပျဲၢ်အဘီၣ်တဖၣ် ကဒိးန့ၢ်ဘၣ် တၢ်သးခုထီဘိအဂီၢ် အဝဲသ့ၣ်ကဘၣ်ဆဲးမၤဝဲ တၢ်လၢယ့ၣ်ၡူးမၤလိာ်အီၤတဖၣ်န့ၣ်လီၤ. တကးဒံးဘၣ် အဝဲသ့ၣ်ကဘၣ်မၤထွဲဝဲ တၢ်လၢယ့ၣ်ၡူးသိၣ်လိအီၤတဖၣ် ဒီးကွၢ်လိမၤဒိး ယ့ၣ်ၡူးအဒိအတဲာ်ထီဘိလီၤ.
၆. ဘၣ်မနုၤအဃိ ပကဘၣ်ဆဲးမၤထွဲ တၢ်လၢပမၤလိဘၣ်အီၤတဖၣ်န့ၣ်လဲၣ်.
၆ ပဝဲသ့ၣ်တဖၣ်စ့ၢ်ကီး ပကဘၣ်မၤထွဲ တၢ်လၢပမၤလိဘၣ်အီၤတဖၣ်လီၤ. ဆိကမိၣ်ကွၢ် ပှၤဘှီစဲးဖိတဂၤအဂ့ၢ်တက့ၢ်. အဝဲအိၣ်ဒီး တၢ်ပီးတၢ်လီ, တၢ်ဖိတၢ်လံၤ ဒီးတၢ်သ့တၢ်ဘၣ်လီၤ. အဝဲမ့ၢ်သူဝဲ တၢ်သ့ၣ်တဖၣ်အံၤမး အဝဲကကဲထီၣ် ပှၤဘှီစဲးသ့တဂၤလီၤ. ဘၣ်သ့ၣ်သ့ၣ် အဝဲကဘှီစဲးအနံၣ်အါမးလံ. ဘၣ်ဆၣ် ဒ်သိးအဝဲကဆဲးမ့ၢ် ပှၤဘှီစဲးသ့တဂၤအဂီၢ် အဝဲကဘၣ်ဆဲးသူဝဲ တၢ်လၢအမၤလိဘၣ်ဝဲတဖၣ်န့ၣ်လီၤ. ဒ်န့ၣ်အသိး ဖဲပစးထီၣ်မၤလိတၢ်မ့ၢ်တၢ်တီ ဒီးပအိၣ်မူထွဲ တၢ်လၢပဖးဘၣ်လၢ လံာ်စီဆှံပူၤတဖၣ်အခါ ပဒိးန့ၢ်ဘၣ်တၢ်သူၣ်ခုသးခုလီၤ. ဘၣ်ဆၣ် ဒ်သိးပကအိၣ်ဒီးတၢ်သးခုထီဘိအဂီၢ် ပကဘၣ်ဆဲးမၤထွဲ တၢ်လၢယဟိဝၤယွၤသိၣ်လိပှၤတဖၣ် ကိးနံၤဒဲးလီၤ.
၇. ဒ်သိးပဟံးန့ၢ်တၢ်မၤလိလၢ ပှၤလၢအဒိဂ့ၤတဲာ်ဘၣ်တဖၣ်လၢ လံာ်စီဆှံအပူၤကသ့အဂီၢ် ပကဘၣ်မၤဒ်လဲၣ်.
၇ လၢတၢ်မၤလိအံၤအပူၤ ပကမၤလိဘၣ် တၢ်အိၣ်အသးတနီၤလၢ အကီဝဲလၢပကပာ်ဖျါထီၣ် တၢ်ဆီၣ်လီၤသးန့ၣ်လီၤ. ပကမၤလိဘၣ်လၢ ဖဲကစၢ်ယွၤအခ့အပှၤလၢအသးတီ လၢပျၢၤတဖၣ် ထံၣ်ဘၣ်ဝဲတၢ်အိၣ်သးဒ်အံၤအခါ အဝဲသ့ၣ် ပာ်ဖျါထီၣ်ဝဲ တၢ်ဆီၣ်လီၤသးဒ်လဲၣ်န့ၣ်လီၤ. ဘၣ်ဆၣ် ထဲပဖးအဝဲသ့ၣ်အဂ့ၢ်အကျိၤန့ၣ် တလၢပှဲၤဒံးဘၣ်. ပကဘၣ်ဆိကမိၣ်ထံ တၢ်လၢပဖးအီၤတဖၣ်ဒီး မၤထွဲအီၤလၢ ပတၢ်အိၣ်မူအပူၤန့ၣ်လီၤ.
ကွၢ်ဒိၣ်ဆံးအါစှၤတၢ်တဂ့ၤ
၈, ၉. ဖဲ မၤတၢ် ၁၄:၈-၁၅ န့ၣ်ပသ့ၣ်ညါဘၣ် စီၤပီလူးအတၢ်ပာ်သူၣ်ပာ်သးအဂ့ၢ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၈ ကစၢ်ယွၤအဲၣ်ဒိးလၢ ပှၤကိးကလုာ်ဒဲး “ကတုၤလၢတၢ်အုၣ်က့ၤခီၣ်က့ၤအီၤ, ဒီးကသ့ၣ်ညါထီၣ်တၢ်မ့ၢ်တၢ်တီန့ၣ်လီၤ.” (၁ တံၤမသ့း ၂:၄) ပှၤလၢအတမၤလိဘၣ် တၢ်မ့ၢ်တၢ်တီတဖၣ်န့ၣ် မ့ၢ်နထံၣ်အဝဲသ့ၣ်ဒ်လဲၣ်. ပှၤယူဒၤဖိတဖၣ်န့ၣ် သ့ၣ်ညါပာ်စၢၤ ယဟိဝၤယွၤအဂ့ၢ်တနီၤ သနာ်က့ စီၤပီလူးစံၣ်တဲၤတဲလီၤ အဝဲသ့ၣ်လီၤ. တကးဒံးဘၣ် အဝဲစံၣ်တဲၤတဲလီၤစ့ၢ်ကီး ပှၤလၢအဘူၣ်ထီၣ်ဘါထီၣ် ယွၤလၢအကမၣ်တဖၣ်န့ၣ်လီၤ. ဒ်သိး စီၤပီလူးကမၤဝဲဒ်န့ၣ်အဂီၢ် လိၣ်ဘၣ်ဝဲ တၢ်ဆီၣ်လီၤသးလီၤ. ဘၣ်မနုၤအဃိလဲၣ်.
၉ ဖဲစီၤပီလူး အမံးၡ့ၣ်နရ့ၣ်အတၢ်လဲၤတၢတဘျီန့ၣ် အဝဲဒီးစီၤဘၢ်နါဘၤ လဲၤဝဲဆူဝ့ၢ်လူစတြၤလီၤ. ပှၤလူၤကီၤနံဖိလၢအအိၣ်ဖဲန့ၣ်တဖၣ် ပာ်အဝဲသ့ၣ် ဒ်သိးပှၤလၢအအိၣ်ဒီးအစိအကမီၤ ဒီးကိးအဝဲသ့ၣ်လၢ စူ, ဒီးဟ့ၢ်မ့ၤ လၢအမ့ၢ် ပှၤလူၤကီၤနံဖိတဖၣ် အယွၤလၢအကမၣ်တဖၣ်အမံၤန့ၣ်လီၤ. မ့ၢ်စီၤပီလူးဒီး စီၤဘၢ်နါဘၤ ပာ်ကဖၢလၢအသးလၢ တၢ်ဂ့ၢ်အံၤအဃိဧါ. ဖဲစီၤပီလူးဒီး စီၤဘၢ်နါဘၤ လဲၤလၢဝ့ၢ်အဂၤခံဖျၢၣ်အခါ အဝဲသ့ၣ်ဘၣ်တၢ်မၤအၢမၤနးအီၤ ဘၣ်ဆၣ် ဖဲအဝဲသ့ၣ်ဟဲတုၤလၢ ဝ့ၢ်လူစတြၤအခါ ပှၤဝ့ၢ်ဖိတဖၣ် ပာ်ဒိၣ်အဝဲသ့ၣ်ဒ်အံၤအဃိ မ့ၢ်အဝဲသ့ၣ်ထံၣ်ဝဲလၢ တၢ်ဆိၣ်ဂ့ၤတခါဧါ. မ့ၢ်အဝဲသ့ၣ်ဆိကမိၣ်ဝဲလၢ တၢ်အိၣ်သးတဖၣ်အံၤ ကမၤစၢၤပှၤအါဂၤလၢ ကနၢ်ဟူဘၣ်တၢ်သးခုကစီၣ်ဧါ. တဆိကမိၣ်ဝဲဒ်န့ၣ်ဘၣ်. လၢတၢ်န့ၣ်အဃိ အဝဲသ့ၣ် အသးအုးဒီး ကိးပသူထီၣ်ဝဲလၢ “တၢ်အံၤတဖၣ်သုမၤ ဘၣ်မနုၤလဲၣ်. ပဝဲဒၣ်အံၤ, ပမ့ၢ်ပှၤကညီစ့ၢ်ကီး အိၣ်ဒီးအသူၣ်အသး ဒ်သုဝဲသ့ၣ်အသိးလီၤ.”—မၤတၢ် ၁၄:၈-၁၅.
၁၀. ဘၣ်မနုၤအဃိ စီၤပီလူးဒီးစီၤဘၢ်နါဘၤ တဆိကမိၣ်ဝဲလၢ အဝဲသ့ၣ် ဂ့ၤဒိၣ်န့ၢ်ဒံး ပှၤလူၤကီၤနံဖိတဖၣ်လဲၣ်.
၁၀ ဖဲစီၤပီလူးဒီးစီၤဘၢ်နါဘၤ တဲဝဲလၢ အဝဲသ့ၣ်မ့ၢ်ပှၤကညီစ့ၢ်ကီးအခါ အဲၣ်ဒိးတဲဝဲ အဝဲသ့ၣ်မ့ၢ် ပှၤဟီၣ်ခိၣ်ဖိလၢ အတလၢတပှဲၤဘၣ်လီၤ. အဝဲသ့ၣ် တအဲၣ်ဒိးတဲဝဲလၢ အတၢ်ဘူၣ်ထီၣ်ဘါထီၣ်န့ၣ် လီၤဂာ်ဒီး ပှၤလူၤကီၤနံဖိတဖၣ်ဘၣ်. ယဟိဝၤယွၤ ဆှၢလီၤဝဲ စီၤပီလူးဒီးစီၤဘၢ်နါဘၤ ဒ်မံးၡ့ၣ်နရ့ၣ်အသိးလီၤ. (မၤတၢ် ၁၃:၂) အဝဲသ့ၣ်ဘၣ်တၢ်ဒိးဖှူအီၤလၢ သးစီဆှံ ဒီးအိၣ်ဒီးတၢ်မုၢ်လၢ်လၢ ကထီၣ်ဘၣ်ဆူမူခိၣ်လီၤ. ဘၣ်ဆၣ် အဝဲသ့ၣ်တဆိကမိၣ်လီၤအသးလၢ အဂ့ၤဒိၣ်န့ၢ်ဒံးပှၤအဂၤဘၣ်. အဝဲသ့ၣ် နာ်ဝဲလၢ ပှၤလူၤကီၤနံဖိတဖၣ်စ့ၢ်ကီး မ့ၢ်တူၢ်လိာ် တၢ်သးခုကစီၣ်န့ၣ် ကအိၣ်ဒီးတၢ်မုၢ်လၢ်လၢ ကထီၣ်ဘၣ်ဆူမူခိၣ်န့ၣ်လီၤ.
၁၁. ဖဲပစံၣ်တဲၤတဲလီၤတၢ်အခါ ပအိၣ်ဒီးတၢ်ဆီၣ်လီၤသးဒ် စီၤပီလူးအသိး ကသ့ဒ်လဲၣ်.
၁၁ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသးသ့လၢ ကျဲဒ်လဲၣ်. ကျဲအဆိကတၢၢ်တဘိန့ၣ် ဒ်စီၤပီလူးအသိး မူဒါလၢ ပဒိးန့ၢ်ဘၣ်အီၤလၢ တၢ်စံၣ်တဲၤတဲလီၤတၢ်မၤအပူၤ မ့တမ့ၢ် ဖဲယဟိဝၤယွၤမၤစၢၤပှၤဒ်သိး ပမၤတၢ်ကဲထီၣ်လိၣ်ထီၣ်အခါ ပတဆိကမိၣ်လီၤပသးလၢ ပဂ့ၤဒိၣ်န့ၢ်ပှၤဂၤနီတဘျီဘၣ်. ပသံကွၢ်လီၤပသးသ့လၢ ‘မ့ၢ်ယထံၣ် ပှၤလၢအအိၣ်လၢ ယဟီၣ်ကဝီၤတဖၣ်အပူၤဒ်လဲၣ်, မ့ၢ်ယဆိကမိၣ်ဆံး ပှၤတနီၤနီၤဧါ.’ ယဟိဝၤပှၤအုၣ်အသးတဖၣ် လၢဟီၣ်ခိၣ်ဒီဘ့ၣ်န့ၣ် ဟးဃုပှၤလၢ အသးအိၣ်ဒိကနၣ် တၢ်သးခုကစီၣ်န့ၣ်လီၤ. အဝဲသ့ၣ်တနီၤန့ၣ် ဂုာ်ကျဲးစၢးမၤလိဝဲ ကျိာ်မ့တမ့ၢ် တၢ်ဆဲးတၢ်လၤလၢ ပှၤအဂၤတဖၣ် ဆိကမိၣ်ဆံးဝဲန့ၣ်လီၤ. ဘၣ်ဆၣ် အဝဲသ့ၣ် တဆိကမိၣ်လီၤအသးလၢ အဂ့ၤဒိၣ်န့ၢ်ဒံး ပှၤလၢ အစံၣ်တဲၤတဲလီၤဝဲတဖၣ်ဘၣ်. လၢတၢ်န့ၣ်အလီၢ် အဝဲသ့ၣ်ဂုာ်ကျဲးစၢး နၢ်ပၢၢ်စၢၤဝဲပှၤဂၤ ဒ်သိးကမၤစၢၤပှၤအါဂၤလၢ ကတူၢ်လိာ် ဘီမုၢ်တၢ်သးခုကစီၣ်အဂီၢ်လီၤ.
ဃ့ထုကဖၣ်လၢပှၤဂၤအဂီၢ် ဒီးကိးထီၣ်အဝဲသ့ၣ်အမံၤ
၁၂. စီၤအ့းပၤဖြါ သူၣ်အိၣ်သးအိၣ် ဒီပုၢ်ဝဲၢ်တဖၣ်အနီၢ်ကီၢ်န့ၣ် အဝဲပာ်ဖျါထီၣ်ဝဲဒ်လဲၣ်.
၁၂ ကျဲအဂၤတဘိလၢ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသးန့ၣ် မ့ၢ်ဝဲပဃ့ဘါထုကဖၣ်န့ၢ်တၢ်လၢ ပဒီပုၢ်ဝဲၢ်မုၣ်ခွါလၢ “အန့ၢ်ဘၣ် တၢ်စူၢ်တၢ်နာ်လုၢ်ဒိၣ်ပှ့ၤဒိၣ် တမံၤဃီဒီးပှၤ” အဂီၢ်န့ၣ်လီၤ. (၂ ပ့းတရူး ၁:၁) စီၤအ့းပၤဖြါ မၤဝဲဒ်န့ၣ်လီၤ. ဘၣ်ဃးဒီး အဝဲအဂ့ၢ်န့ၣ် လံာ်စီဆှံပာ်ဖျါထီၣ်ဝဲထဲ သၢဘျီလီၤ. ဖဲစီၤပီလူး ဘၣ်တၢ်ဖီၣ်အီၤ လၢဝ့ၢ်ရိမ့ၤအပူၤ ဒီးဘၣ်အိၣ်လၢဟံၣ်လၢ အငါအိၣ်ဝဲတဖျၢၣ်အပူၤအခါ အဝဲကွဲးလံာ်ဆူ ပှၤကလီးစဲဖိတဖၣ်အအိၣ် ဒီးကွဲးဝဲလၢ စီၤအ့းပၤဖြါန့ၣ် “ဂုာ်ဘါထုကဖၣ် သပှၢ်ပှၢ်လၢသုဂီၢ်တဘိယူၢ်ဃီ” လီၤ. (ကလီးစဲ ၄:၁၂) စီၤအ့းပၤဖြါ သ့ၣ်ညါဝဲဒီပုၢ်ဝဲၢ်တဖၣ်ဂ့ၤဂ့ၤ ဒီးသူၣ်အိၣ်သးအိၣ် အဝဲသ့ၣ်ဒိၣ်မးလီၤ. စီၤပီလူးကိးအီၤလၢ “ပှၤဘၣ်စၢဃာ်ဒီးယၤ” လီၤ. အဃိ ပသ့ၣ်ညါဘၣ်လၢ စီၤအ့းပၤဖြါစ့ၢ်ကီး ထံၣ်ဘၣ်ဒီး တၢ်ကီတၢ်ခဲလီၤ. (ဖံၤလ့မိၣ် ၂၃) ဘၣ်ဆၣ် အဝဲသူၣ်အိၣ်သးအိၣ် ပှၤဂၤအတၢ်လိၣ်ဘၣ် ဒီးမၤတၢ်တမံၤမံၤ ဒ်သိးကမၤစၢၤအဝဲသ့ၣ်အဂီၢ်လီၤ. အဝဲဃ့ဘါထုကဖၣ်န့ၢ်တၢ်လၢ အဒီပုၢ်ဝဲၢ်မုၣ်ခွါတဖၣ်အဂီၢ် ဒီး ယၢၤထီၣ်အဝဲသ့ၣ်အမံၤ အဃိပဝဲသ့ၣ်တဖၣ်စ့ၢ်ကီး ပမၤဒ်သိးဒီးအီၤသ့ဝဲလီၤ. တၢ်ထုကဖၣ်ဒ်အံၤန့ၣ် အဘျုးအိၣ်ဝဲဒိၣ်မးလီၤ.—၂ ကရံၣ်သူး ၁:၁၁; ယၤကိာ် ၅:၁၆.
၁၃. ဖဲနဃ့ဘါထုကဖၣ်တၢ်အခါ နကွၢ်လိမၤဒိး စီၤအ့းပၤဖြါကသ့ဒ်လဲၣ်.
၁၃ ဆိကမိၣ်ထီၣ်လၢ နကဃ့ထုကဖၣ်န့ၢ်တၢ်လၢ မတၤအဂီၢ်သ့လဲၣ်န့ၣ် တက့ၢ်. ဘၣ်သ့ၣ်သ့ၣ် နကဆိကမိၣ်ဘၣ် နသကိးလၢတၢ်အိၣ်ဖှိၣ်အပူၤ မ့တမ့ၢ် နဟံၣ်ဖိဃီဖိလၢ အထံၣ်ဘၣ်တၢ်ကီတၢ်ခဲတဖၣ်န့ၣ်လီၤ. ဘၣ်သ့ၣ်သ့ၣ် အဝဲသ့ၣ် ကဘၣ်ဆၢတဲာ်တၢ်လၢ အကီကအိၣ်ဝဲ မ့တမ့ၢ် ကဘၣ်တြီဆၢကွံာ် တၢ်လ့ပစီန့ၣ်လီၤ. ဒီပုၢ်ဝဲၢ်တဖၣ်လၢ နတထံၣ်ဘၣ်အီၤနီတဘျီဒၣ်လဲာ်န့ၣ် နဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်သ့ဝဲလီၤ. အဝဲသ့ၣ်တနီၤန့ၣ် အမံၤဘၣ်တၢ်ပာ်ဖျါထီၣ်အီၤဖဲ jw.org “Jehovah’s Witnesses Imprisoned for Their Faith” လီၤ. (ကွၢ်လၢ NEWSROOM > LEGAL DEVELOPMENTS တက့ၢ်.) ပဃ့ထုကဖၣ်န့ၢ်တၢ်လၢ ပှၤလၢအတူၢ်ဘၣ် န့ဆၢၣ်အတၢ်ဘၣ်ဒိဘၣ်ထံး တယံာ်ဒံးဘၣ်သ့ၣ်တဖၣ်အဂီၢ် မ့တမ့ၢ် ပှၤလၢအထံၣ်ဘၣ် တၢ်ဒုးတၢ်ယၤ, ပှၤလၢအအဲၣ်ဘၣ်ဝဲတဂၤသံသဒၣ်ကွံာ်အီၤ ဒီးပှၤလၢအိၣ်ဒီး ကျိၣ်စ့အတၢ်ကီတၢ်ခဲတဖၣ်အဂီၢ်သ့ဝဲလီၤ. ပဒီပုၢ်ဝဲၢ်မုၣ်ခွါတဖၣ်လၢ အလိၣ်ဘၣ်ပတၢ်ထုကဖၣ်န့ၣ် အိၣ်ဝဲအါမးလီၤ. ဖဲပဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်အခါ မ့ၢ်ဒၣ်ပပာ်ဖျါထီၣ်လၢ ပတဆိကမိၣ်တၢ်ထဲပဂီၢ်ဘၣ်, ပဆိကမိၣ်န့ၢ်တၢ်လၢ ပှၤဂၤအဂီၢ်စ့ၢ်ကီးလီၤ. (ဖံလံးပံၤ ၂:၄) တၢ်ဃ့ထုကဖၣ်ဒ်အံၤန့ၣ် ယဟိဝၤယွၤဒိကနၣ်ဝဲလီၤ.
“နၢ်ဟူတၢ်ချ့သဒံး” တက့ၢ်
၁၄. ယဟိဝၤမ့ၢ် ပှၤလၢအဒိကနၣ်တၢ်ဂ့ၤဂ့ၤန့ၣ် ပသ့ၣ်ညါသ့လၢ ကျဲဒ်လဲၣ်.
၁၄ ဒီးကျဲအဂၤတဘိလၢ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသးန့ၣ် မ့ၢ်ဝဲပဒိကနၣ်တၢ်ဂ့ၤဂ့ၤလီၤ. ယၤကိာ် ၁:၁၉ တဲဝဲလၢ “မ်ပှၤနၢ်ဟူတၢ်ချ့သဒံး” တက့ၢ်. ယဟိဝၤယွၤ မ့ၢ်ပှၤဒိကနၣ်တၢ်လၢ အဂ့ၤကတၢၢ်တဂၤလီၤ. (၁ မိၤၡ့ ၁၈:၃၂; ယိၤၡူ ၁၀:၁၄) အဒိ ဖးကွၢ်တၢ်ကတိၤသကိးတၢ်ဖဲ ၂ မိၤၡ့ ၃၂:၁၁-၁၄ အပူၤတက့ၢ်. (ဖးတက့ၢ်.) နီၢ်နီၢ်န့ၣ် ဖဲစီၤမိၤၡ့တဲဖျါထီၣ် အတၢ်ထံၣ်အခါ ယဟိဝၤယွၤတလိၣ်ဒိကနၣ်ဝဲဘၣ်. ဘၣ်ဆၣ် ယဟိဝၤယွၤဟ့ၣ်အခွဲးလၢ စီၤမိၤၡ့ကတဲဖျါထီၣ် အတၢ်တူၢ်ဘၣ်လီၤ. ပှၤလၢအကမၣ်တ့ၢ်ဝဲလၢညါတဂၤ မ့ၢ်ဟ့ၣ်ကူၣ်နၤန့ၣ် မ့ၢ်နကဒိကနၣ်အီၤလၢ တၢ်သူၣ်စူၤသးစူၤအပူၤ ဒီးမၤထွဲ အတၢ်ဟ့ၣ်ကူၣ်ဧါ. ဘၣ်ဆၣ် မ့ၢ်မ့ၢ်ယဟိဝၤယွၤန့ၣ် ဒိကနၣ်ဝဲ ပှၤလၢအဃ့ဘါထုကဖၣ်တၢ်လၢ တၢ်နာ်အပူၤ ကိးဂၤဒဲးလီၤ.
၁၅. ဘၣ်ဃးဒီး တၢ်ယူးယီၣ်ပာ်ကဲပှၤဂၤန့ၣ် ပကွၢ်လိမၤဒိး ယဟိဝၤယွၤကသ့ဒ်လဲၣ်.
၁၅ သံကွၢ်လီၤနသးလၢ ‘ယဟိဝၤယွၤ မ့ၢ်အိၣ်ဒီးတၢ်ဆီၣ်လီၤသး ဒီးဒိကနၣ်ဝဲ ပှၤဟီၣ်ခိၣ်ဖိတဖၣ်ဒ် အဒိကနၣ်ဝဲ စီၤအၤဘြၤဟၣ်, နီၢ်ရၤဃ့လး, စီၤမိၤၡ့, စီၤယိၤၡူ, စီၤမၤနိ, စီၤအ့ၤလံယၤ ဒီးစီၤဃံးစကံယၤအသိးန့ၣ် ယတကြၢးမၤဒ်န့ၣ်ဘၣ်ဧါ. မ့ၢ်ယပာ်ဖျါအါထီၣ် တၢ်ယူးယီၣ်ပာ်ကဲ ယဒီပုၢ်ဝဲၢ်ကိးဂၤဒဲး ခီဖျိယဒိကနၣ် အဝဲသ့ၣ်အတၢ်ဟ့ၣ်ကူၣ်ဒီး မၤထွဲအီၤတသ့ဖဲအသ့န့ၣ်ဧါ. လၢယတၢ်အိၣ်ဖှိၣ်အပူၤ မ့တမ့ၢ် လၢယဟံၣ်ဖိဃီဖိအပူၤ ပှၤလၢယကဘၣ်ပာ်ဖျါအါထီၣ် တၢ်သူၣ်အိၣ်သးအိၣ်န့ၣ် မ့ၢ်အအိၣ်ဧါ. မ့ၢ်အိၣ်န့ၣ် ယကဘၣ်မၤအီၤဒ်လဲၣ်.’—၁ မိၤၡ့ ၃၀:၆; စံၣ်ညီၣ်ကွီၢ် ၁၃:၉; ၁ စီၤပၤ ၁၇:၂၂; ၂ ကွဲးနီၣ်တၢ် ၃၀:၂၀.
“ဘၣ်တဘၣ်ယွၤကကွၢ်လီၤ ယတၢ်နးတၢ်ဖှီၣ်”
စီၤဒၤဝံးတဲဝဲလၢ “တြီအီၤတဂ့ၤ.” မ့မ့ၢ်နၤန့ၣ် နကမၤဒ်လဲၣ်. (ကွၢ်လံာ်အဆၢ ၁၆, ၁၇)
၁၆. စီၤဒၤဝံးန့ၣ် ဖဲစီၤၡံမံၤတရ့အီၤ ဂ့ၤဂ့ၤဘၣ်အခါ အဝဲမၤဝဲဒ်လဲၣ်.
၁၆ တၢ်ဆီၣ်လီၤသးန့ၣ် ကမၤစၢၤပှၤဒ်သိး ပကအိၣ်ဒီးတၢ်ကီၤသူၣ်ကီၤသး ဖဲပှၤတရ့ဒီးပှၤဂ့ၤဂ့ၤဘၣ်အခါန့ၣ်လီၤ. (အ့းဖ့းစူး ၄:၂) ပထံၣ်ဘၣ် တၢ်အဒိလၢ အဂ့ၤဒိၣ်မးတခါဖဲ ၂ ၡမူၤအ့လး ၁၆:၅-၁၃ န့ၣ်လီၤ. (ဖးတက့ၢ်.) စီၤၡံမံၤလၢအမ့ၢ် စီၤစီလူးအဘူးအတံၢ်န့ၣ် ကတိၤဒုၣ်ဒွဲၣ် ဒီးထီဒါဝဲ စီၤဒၤဝံးဒီးအခ့အပှၤတဖၣ်လီၤ. စီၤဒၤဝံးမ့ၢ်အဲၣ်ဒိးမၤပတုာ်အီၤန့ၣ် မၤဝဲန့ၢ်သနာ်က့ အဝဲတမၤဝဲဘၣ်. လၢတၢ်န့ၣ်အလီၢ် အဝဲတူၢ်ဝဲလၢ တၢ်သူၣ်စူၤသးစူၤအပူၤလီၤ. တၢ်မနုၤမၤစၢၤ စီၤဒၤဝံးဒ်သိး အကအိၣ်ဒီး တၢ်ကီၤသူၣ်ကီၤသးအဂီၢ်လဲၣ်. ပထံၣ်န့ၢ်အတၢ်စံးဆၢသ့ခီဖျိ ပသမံသမိးကွၢ် စံးထီၣ်ပတြၢၤအဆၢဒိၣ်သၢန့ၣ်လီၤ.
၁၇. တၢ်မနုၤမၤစၢၤ စီၤဒၤဝံးဒ်သိး အကအိၣ်ဒီးတၢ်ကီၤသူၣ်ကီၤသးအဂီၢ်လဲၣ်, ပကွၢ်လိမၤဒိးအီၤကသ့ဒ်လဲၣ်.
၁၇ စီၤဒၤဝံးကွဲးဝဲ စံးထီၣ်ပတြၢၤ အဆၢဒိၣ်သၢဖဲ အဖိခွါစီၤအးဘၡါလိၣ် ဃုမၤသံအီၤအခါလီၤ. ဖဲန့ၣ်အဆၢကတီၢ် စီၤၡံမံၤစ့ၢ်ကီးထီဒါအီၤဘၣ်ဆၣ် စီၤဒၤဝံးအိၣ်ဒီး တၢ်ပၢၤသးလီၤ. ဘၣ်မနုၤအဃိ အပၢၤအသးန့ၢ်လဲၣ်. ဖဲ စံးထီၣ်ပတြၢၤ ၃:၄ န့ၣ်စီၤဒၤဝံးကွဲးဝဲလၢ “ယကိးထီၣ်ယွၤလၢ ယကလုၢ်, ဒီးစံးဆၢယၤလၢ အကစၢၢ်စီဆှံန့ၣ်လီၤ.” ဖဲပှၤတရ့ဒီးပှၤဂ့ၤဂ့ၤဘၣ်အခါ ပကဘၣ်ဃ့ဘါထုကဖၣ်ဒ် စီၤဒၤဝံးအသိးလီၤ. ပမ့ၢ်မၤဒ်န့ၣ်န့ၣ် ယဟိဝၤယွၤ ကဟ့ၣ်ပှၤသးစီဆှံ ဒ်သိးပတူၢ်တၢ်ကန့ၢ်အဂီၢ်လီၤ. ဖဲပှၤတရ့ဒီးနၤ ဂ့ၤဂ့ၤအခါ မ့ၢ်နပာ်ဖျါအါထီၣ် တၢ်ကီၤသူၣ်ကီၤသး မ့တမ့ၢ် ပျၢ်ပှၤဂၤအတၢ်ကမၣ်ဧါ. မ့ၢ်နနာ်လၢ ယဟိဝၤယွၤ ထံၣ်ဝဲတၢ်ကီတၢ်ခဲလၢ နတူၢ်ဘၣ်တဖၣ် ဒီးအဝဲကမၤစၢၤနၤ ဒီးကဆိၣ်ဂ့ၤနၤဧါ.
“တၢ်အခိၣ်ကျၢၢ်န့ၣ် မ့ၢ်တၢ်ကူၣ်သ့လီၤ”
၁၈. ပမ့ၢ်မၤထွဲ ယဟိဝၤယွၤ အတၢ်ဟံးစုနဲၣ်ကျဲတဖၣ်န့ၣ် ပကဒိးန့ၢ်ဘၣ်အဘျုးဒ်လဲၣ်.
၁၈ ပမ့ၢ်မၤထွဲ တၢ်လၢပသ့ၣ်ညါအီၤလၢအဘၣ်န့ၣ် ပကမ့ၢ်ပှၤလၢ အအိၣ်ဒီးတၢ်ကူၣ်သ့ ဒီးယဟိဝၤယွၤ ကဆိၣ်ဂ့ၤပှၤလီၤ. ကတိၤဒိ ၄:၇ တဲဝဲလၢ “တၢ်အခိၣ်ကျၢၢ်န့ၣ် မ့ၢ်တၢ်ကူၣ်သ့လီၤ.” တၢ်ကူၣ်သ့န့ၣ် ဒိးသန့ၤထီၣ်အသးလၢ တၢ်သ့ၣ်ညါ ဒီးတၢ်နၢ်ပၢၢ်တၢ်ဂ့ၢ်တၢ်ကျိၤ တကးဒံးဘၣ် ပၣ်ဃုာ်စ့ၢ်ကီးဒီး တၢ်ဆၢတဲာ်လၢ ပမၤအီၤတဖၣ်လီၤ. တၢၢ်သ့ၣ်တဖၣ်န့ၣ် ပာ်ဖျါထီၣ်ဝဲလၢ အဝဲသ့ၣ်အိၣ်ဒီးတၢ်ကူၣ်သ့ ခီဖျိအဝဲသ့ၣ် ပာ်ဖှိၣ်ဃာ်တၢ်အီၣ်လၢ တၢ်ဂိၢ်ခါအဂီၢ်လီၤ. (ကတိၤဒိ ၃၀:၂၄, ၂၅) ခရံာ်လၢအမ့ၢ် “ယွၤအတၢ်ကူၣ်သ့” န့ၣ်မၤအပၢ်အတၢ်ဘၣ်သး ထီဘိလီၤ. (၁ ကရံၣ်သူး ၁:၂၄; ယိၤဟၣ် ၈:၂၉) ပဝဲသ့ၣ်တဖၣ်စ့ၢ်ကီး ပမ့ၢ်အိၣ်ဒီးတၢ်ဆီၣ်လီၤသး ဒီးပာ်ဖျါထီၣ်လၢ ပအိၣ်ဒီးတၢ်ကူၣ်သ့ခီဖျိ ပမၤထွဲတၢ်လၢ ပသ့ၣ်ညါအီၤလၢအဘၣ်န့ၣ် ကစၢ်ယွၤကဆိၣ်ဂ့ၤပှၤလီၤ. (ဖး မးသဲ ၇:၂၁-၂၃ တက့ၢ်.) အဃိ လၢတၢ်အိၣ်ဖှိၣ်အပူၤ မ်ပဝဲကိးဂၤဒဲး ပကမၤယဟိဝၤယွၤ အတၢ်မၤလၢ တၢ်ဆီၣ်လီၤသးအပူၤတက့ၢ်. ဒ်သိးပကမၤတၢ်လၢအဘၣ်အဂီၢ် ပလိၣ်ဘၣ်တၢ်ဆၢကတီၢ်ဒီး တၢ်သူၣ်စူၤသးစူၤလီၤ. ဘၣ်ဆၣ် ပမ့ၢ်မၤအီၤလၢ တၢ်ဆီၣ်လီၤသးအပူၤန့ၣ် ပကဒိးန့ၢ်ဘၣ် တၢ်သးခု ခဲအံၤဒီးခါဆူညါလီၤ.