မ့ၢ်နသ့ၣ်ညါ တၢ်ဆၢကတီၢ်ဧါ
ဖဲနအဲၣ်ဒိးသ့ၣ်ညါတၢ်ဆၢကတီၢ်အခါ နမၤဒ်လဲၣ်. ဘၣ်သ့ၣ်သ့ၣ် နကကွၢ်လီၤ နနၣ်ရံၣ်လီၤ. ဒီးနကထံၣ်ဘၣ်လၢ နနၣ်ရံၣ်အိၣ်ဝဲ ဟါခီတနၣ်ရံၣ်ဒီး အမံးနံး ၃၀ လီၤ. ဒီးဖဲန့ၣ်အခါ နတံၤသကိးမ့ၢ်သံကွၢ်နၤလၢ “အိၣ်ပှဲၤနၣ်ရံၣ်လဲၣ်” န့ၣ်နကစံးဆၢအီၤဒ်လဲၣ်.
နကစံးဆၢအီၤဒ်လဲၣ်န့ၣ် အဒိးသန့ၤထီၣ်အသးလၢ နအိၣ်တၢ်လီၢ်တၢ်ကျဲအဖီခိၣ်လီၤ. အဒိ ဘၣ်သ့ၣ်သ့ၣ် နကတဲအီၤလၢ “၁:၃၀” မ့တမ့ၢ် “၁၃:၃၀” လီၤ. ဒီးနမ့ၢ်အိၣ်လၢ တၢ်လီၢ်အဂၤတနီၤန့ၣ် ဘၣ်သ့ၣ်သ့ၣ်နကတဲလၢ “ခံနၣ်ရံၣ်ကဘၣ် လိၣ်တ့ၢ်အမံးနံး ၃၀” လီၤ.
ဘၣ်ဃးဒီးတၢ်ဆၢကတီၢ်န့ၣ် ပှၤလၢပျၢၤလၢလံာ်စီဆှံအပူၤတဖၣ် ပာ်ပနီၣ်ဝဲဒ်လဲၣ်. အဝဲသ့ၣ် တဲဝဲကျဲအါန့ၢ်ဒံးတဘိလီၤ. လံာ်စီဆှံလၢ ဧ့ၤဘြံၤကျိာ်တကတြူၢ်န့ၣ် သူဝဲတၢ်ကတိၤလၢအမ့ၢ် “မုၢ်ဂီၤ,” “မုၢ်ထူၣ်,” ဒီး “မုၢ်ဟါ” လီၤ. (၁ မိၤၡ့ ၈:၁၁; ၁၉:၂၇; ၄၃:၁၆; ၅ မိၤၡ့ ၂၈:၂၉; ၁ စီၤပၤ ၁၈:၂၆) ဘၣ်ဆၣ် ဘၣ်ဃးဒီးတၢ်ဆၢကတီၢ်န့ၣ် တဘျီတခီၣ် လံာ်စီဆှံသူဝဲတၢ်ကတိၤလၢ အလီၢ်တံၤလီၤဆဲးလီၤ.
လၢပှၤအံၣ်စရ့လးဖိအစိၤန့ၣ် အဝဲသ့ၣ်အိၣ်ဒီး ပှၤခိးတၢ်ဖိလၢမုၢ်နၤခီလီၤ. ဖဲအံၣ်စရ့လးအစိၤန့ၣ် ပှၤနီၤဖးဝဲမုၢ်နၤအဆၢကတီၢ် သၢပတီၢ် ဒီးကိးဝဲလၢ “ပှၤဆိးသီအကတီၢ်” မ့တမ့ၢ် ပှၤခိးတၢ်အကတီၢ်လီၤ. (စံးထီၣ်ပတြၢၤ ၆၃:၆) လၢ စံၣ်ညီၣ်ကွီၢ် ၇:၁၉ န့ၣ်ပဖးဘၣ်လၢ “ပှၤဆိးသီတၢ်အကတီၢ်အခၢၣ်သးတတီၤ” လီၤ. ဘၣ်ဆၣ် မ့မ့ၢ်လၢယ့ၣ်ၡူးအစိၤန့ၣ် ဒ်ပှၤကြံးဖိဒီး ပှၤရိမ့ၤဖိတဖၣ်အသိး ပှၤယူဒၤဖိတဖၣ်န့ၣ် နီၤဖးဝဲမုၢ်နၤအဆၢကတီၢ် လွံၢ်တီၤလီၤ.
ဘၣ်ဃးဒီးတၢ်ဆၢကတီၢ်အံၤန့ၣ် လံာ်တၢ်သးခုကစီၣ် ပာ်ဖျါထီၣ်ဝဲအါဘျီလီၤ. အဒိ ဖဲ “မုၢ်နၤလွံၢ်တီၤတတီၤ” န့ၣ်ယ့ၣ်ၡူးဟးလၢထံဖံးခိၣ်ဒီး လဲၤဝဲဆူအပျဲၢ်အဘီၣ်လၢ အအိၣ်လၢကဘီအပူၤန့ၣ်လီၤ. (မးသဲ ၁၄:၂၅) တကးဒံးဘၣ် ဖဲယ့ၣ်ၡူးဟ့ၣ်တၢ်အဒိအခါ အဝဲတဲဝဲလၢ “တၢ်ဟုၣ်တၢ်ဘျၣ်ကဟဲလၢပှၤပၢၤတၢ် အကတီၢ်ဖဲလဲၣ်ဖဲလဲၣ်န့ၣ်, ဟံၣ်ကစၢ်မ့ၢ်သ့ၣ်ညါဒီး, ကဆိးသီတ့ၢ်ဝဲ, ဒီးတပျဲတၢ်ဘၢၣ်ဖျိအဟံၣ်ဘၣ်.”—မးသဲ ၂၄:၄၃.
ယ့ၣ်ၡူးမၢဝဲအပျဲၢ်အဘီၣ်ဆိးသီ မ့ၢ်လၢအဝဲသ့ၣ် တသ့ၣ်ညါဝဲတၢ်ဆၢကတီၢ်လၢ “ဟံၣ်ကစၢ် ကဟဲက့ၤဖဲလဲၣ်ဖဲလဲၣ်, လၢမုၢ်ဟါဧါ, လၢဖးဖီမုၢ်ဧါ, လၢဆီဖါအိၣ်အိထီၣ်ဧါ, လၢမုၢ်ဆ့ၣ်ဝါဧါ” အဃိလီၤ. (မၢ်ကူး ၁၃:၃၅) ဖဲအံၤ ပထံၣ်ဘၣ်လၢ ယ့ၣ်ၡူးပာ်ဖျါထီၣ်ဝဲ တၢ်ဆၢကတီၢ်လွံၢ်တီၤအံၤလီၤ. တၢတတီၤန့ၣ် မ့ၢ်ဝဲ “မုၢ်ဟါ” ဒီးစးထီၣ်လၢမုၢ်လီၤနုာ် တုၤလၢဟါခီခွံနၣ်ရံၣ်လီၤ. ခံတီၤတတီၤန့ၣ် မ့ၢ်ဝဲ “ဖးဖီမုၢ်” ဒီးစးထီၣ်လၢ ဟါခီခွံနၣ်ရံၣ်ဃၣ်ဃၣ် တုၤလၢဖးဖီမုၢ်လီၤ. သၢတီၤတတီၤန့ၣ် မ့ၢ်ဝဲ “လၢဆီဖါအိၣ်အိထီၣ်” ဒီးစးထီၣ်လၢ ဖးဖီမုၢ်တုၤလၢ ဂီၤခီသၢနၣ်ရံၣ်လီၤ. ဖဲတၢ်ဆၢကတီၢ်အံၤ ဆီဖါအိၣ်အိထီၣ်အဃိ ကမ့ၢ်ဝဲတၢ်ဆၢကတီၢ်ဒ်သိးဒီး ဖဲပှၤဖီၣ်ဃာ်ယ့ၣ်ၡူးအခါန့ၣ်လီၤ. (မၢ်ကူး ၁၄:၇၂) မုၢ်နၤလွံၢ်တီၤတတီၤလၢအမ့ၢ် “မုၢ်ဆ့ၣ်ဝါ” န့ၣ်ကစးထီၣ်ဖဲ သၢနၣ်ရံၣ်ဃၣ်ဃၣ် တုၤလၢမုၢ်ဟဲထီၣ်န့ၣ်လီၤ.
လၢပျၢၤန့ၣ် နၣ်ရံၣ်တအိၣ်ဒ်သိး ဆၢကတီၢ်ခဲအံၤဘၣ်ဆၣ် ပှၤသ့ၣ်ညါဝဲ တၢ်ဆၢကတီၢ်အဂ့ၢ်လီၤ.