KILESO 26

Wapi mutindu beto lenda pesa maboko samu na kukengidila Yinzo ya Kimfumu ya beto?

Bambangi ya Yehova kena kutula bunkete na Yinzo ya Kimfumu ya bau na Estonie — Estonie

Bambangi ya Yehova kena kutula bunkete na Yinzo ya Kimfumu ya bau na Zimbabwe — Zimbabwe

Mosi ya ba Mbangi ya Yehova ke na sala kisalu ya kuyidika Yinzo ya Kimfumu ya Mongolie — Mongolie

Mosi ya ba Mbangi ya Yehova ke na tula peinture na Yinzo ya Kimfumu ya Porto Rico — Porto Rico

Yinzo ya Kimfumu nyonso ya Bambangi ya Yehova yakele na nkumbu ya santu ya Nzambi. Yau yina, beto ketalaka ti kupesa maboko samu na kukengidila yau yavuanda bunkete, kitoko mpe mbote yau kele diambu ya lukumu mpe ya mfunu mingi na nsambudulu na beto. Beto nyonso lenda pesa maboko.

Pesa maboko samu na kutula bunkete na manima ya lukutakanu. Na manima ya lukutakanu nyonso, bampangi ya babakala mpe ya banketo bakevuandaka na kiese ya kutula mua bunkete na Yinzo ya Kimfumu. Mbala mosi na sabala, beto ketulaka bunkete mingi kuluta na Yinzo ya Kimfumu ya mvimba. Kuluntu mosi to kisadi na bisalu mosi ketuadisaka bisalu yango. Mbala mingi, yandi ketadilaka liste ya mambu yina fuana salama. Kana yau mefuana, bampangi ya nkaka kekikupesaka samu na kukombola yau, kusukula yau, kukusuna bameza, bakiti, to bisika ya nkaka ya kuvuanda, kubongisa bakiti, kusukula bafenetre mpe bitalatala, kulosa mvindu na kisika na yau, mpe kusala bunkete na nganda mpe na kati ya lupangu. Beto kesolaka mpe kilumbu mosi na mvula samu na kutula bunkete mbotembote kuluta na Yinzo ya Kimfumu. Beto kepesaka diaka bana na beto mua bisalu ya kusala samu na kulonga bau bazitisa kisika na beto ya nsambudulu.—Longi 5:1.

Pesa maboko kana yamelomba kubongisa kima mosi yina mebeba. Mvula na mvula, beto ketalaka mbotembote Yinzo ya Kimfumu ya beto, yavuanda na kati to na nganda. Yau kesadisaka beto na kubongisa yau mbala na mbala samu yavuanda ntangu nyonso mbote, mpe samu beto bebisa mbongo mpambampamba ve. (2 Bansangu 24:13; 34:10) Yinzo ya Kimfumu yina kele ya kuvedila mpe yina bakekengidila mbote kele kisika yina mefuana samu na kusambila Nzambi ya beto. Kana beto kena kupesa maboko na kisalu yango, beto kelakisa ti beto kezolaka mingi Yehova mpe kisika ya beto ya nsambudulu. (Nkunga 122:1) Yau kesala diaka ti bantu kumisa nsambudulu ya beto.—2 Bakorinto 6:3.

Samu na yinki beto fuana baka na kusakana ve diambu metadila kutula bunkete na kisika ya beto ya nsambudulu?
Yinki kele bankubukulu samu na kukengidila Yinzo ya Kimfumu ya beto?