Yesu me longa mutindu ya kusambila

Mambu nyonso yina Bafarize vanda sala, vandaka samu na kutalana. Ntangu ba vanda salaka mambu ya mbote, ya vandaka samu bantu ya nkaka tala bawu. Ba vanda sambilaka na bisika ya bantu mingi samu bantu nyonso tala bawu. Bafarize vanda bumbaka na yintu balusambu ya yinda mpe vanda vutukilaka yawu na basinagoge, mpe na bisika yina banzila ke vukanaka samu bantu kuwa bawu. Na yawu, bilandi kamwaka ntangu Yesu zonzaka na bawu: ‘Beno kusambila ve mutindu Bafarize. Ba ke kanisaka ti ba ke kamwisa Nzambi na bamambu mingi yina ba ke zonzaka, kasi ya ke ve faso yina. Lusambu ke samu na nge na Yehova. Kuvutukila ve bamambu mosi mbala na mbala. Yehova ke na nsatu nge zabisa yandi bamambu yina nge ke na yawu na ntima.

‘Ni mutindu yayi beno me lunga kusambila: “Tata ya beto yina ke na mazulu, bika ti nkumbu ya nge vanda ya santu. Bika ti Kimfumu ya nge kwiza. Bika ti luzolo ya nge salama na ntoto, mutindu na mazulu.”’ Yesu zonzaka mpe na bawu ti ba me fwana kusambila samu na madya ya bawu samu na kilumbu, samu na kuzwa mulemvo ya masumu ya bawu, mpe samu na bamambu ya bawu mosi.

Yesu zonzaka: ‘Beno bika ve kusambila. Beno bika ve kulomba na Tata ya beno, Yehova, bima ya mbote. Kibuti nyonso ke vandaka na nsatu ya kupesa kima ya mbote na mwana ya yandi. Kana mwana ya nge me lomba nge dimpa, Nge ke pesa yandi ditadi? Kana mwana ya nge me lomba nge mbisi, nge ke pesa yandi nyoka?’

Na manima Yesu zonzilaka mbote-mbote bamambu yina yandi zonzaka: ‘Kana beno zaba kupesa makabu ya mbote na bana ya beno, beno me kanisa ve ti Tata ya beno, Yehova, ke pesa beno mpeve ya santu na mutindu ya kulutila? Nyonso yina beno lenda sala ni kulomba.’ Nge ke landaka kwandi malongi ya Yesu? Na wapi bamambu nge ke sambilaka?