Yesu me vumbuka na lufwa

Na manima ya lufwa ya Yesu, bakala mosi ya mvwama na nkumbu ya Yozefi lombaka nzila na Pilate ya kukatula mvumbi ya Yesu na zulu ya yinti. Yozefi fukaka yawu na lele ya lino, tulaka yawu mafuta ya nsunga ya kitoko mpe yandi tulaka yawu na ndyamu ya malu-malu. Yandi tulaka ditadi ya kilo na kisika ya kukotila. Bamfumu ya banganga-nzambi zonzaka na Pilate: ‘Beto ke na boma ti bilandi ya Yesu baka mvumbi ya yandi mpe ba zonza ti yandi me vumbuka na lufwa.’ Na yawu, Pilate zonzaka na bawu: ‘Beno kanga ndyamu yango mpe beno kengidila yawu.’

Na manima ya bilumbu tatu, na suka-suka, bakento kwendaka na ndyamu mpe ba talaka ti ba katulaka ditadi yina vanda kanga ndyamu. Mbazi mosi vandaka na kati ya ndyamu mpe yandi zonzaka na bawu: ‘Beno kuvanda ve na boma. Yesu me vumbuka na lufwa. Beno kwenda zonza na bilandi ya yandi na kwenda bwabana yandi na Galile.’

Maria ya Magdala kwendaka na mbangu samu na kusosa Piere na Yoane. Yandi zonzaka na bawu: ‘Ba me katula mvumbi ya Yesu!’ Piere na Yoane kimaka mbangu na ndyamu. Ntangu ba talaka ti ata kima vandaka na kati, ba vutukaka na bayinzo ya bawu.

Ntangu Maria vutukaka na ndyamu, yandi talaka bambazi zole na kati ya ndyamu mpe zonzaka na bawu: ‘Mu zaba ve kisika ba me tula Mfumu ya munu.’ Na manima, Maria talaka bakala mosi, mpe kanisaka ti yandi vandaka kengidi ya bilanga. Yandi zonzaka na yandi: ‘Mulemvo zonza na munu kisika nge me tula yandi.’ Kasi ntangu bakala yango zonzaka, “Maria!” Maria kwizaka zaba ti ya vandaka Yesu. Maria zonzaka na ndinga ya ngolo: “Mulongi!” mpe yandi simbaka yandi na nzutu. Yesu zonzaka na yandi: ‘Kwenda zonza na bampangi ya munu ti nge me tala munu.’ Na mbala mosi, Maria kimaka mbangu na sika ya bilandi samu na kuzonza na bawu ti yandi me tala Yesu.

Kaka na kilumbu yina, bilandi zole vanda katuka na Yeruzalemi samu na kukwenda na Emayuse. Bakala mosi bandaka kutambula na bawu mpe yufulaka bawu, na wapi mambu ba vanda solola. Ba vutulaka: ‘Nge me kuwa ve nsangu? Ya me sala bilumbu tatu, yina banganga-nzambi kufwaka Yesu. Mpe ntangu yayi, bakento mosi ke na zonzaka ti yandi me vutuka na luzingu!’ Bakala yango yufulaka bawu: ‘Beno ke kwikilaka kwandi na mambu yina bambikudi zonzaka? Bambikudi zonzaka ti Kristo zolaka kufwa mpe na manima yandi zolaka vumbuka na lufwa.’ Yandi bikaka ve kusadisa bawu na kubakula mbote-mbote Masonoko. Ntangu ba kumaka na Emayuse, bilandi zonzaka na yandi na kuvanda na bawu. Ntangu yandi salaka lusambu samu na dimpa na nkokila, bilandi kwizaka zaba ti ya vandaka Yesu. Kasi Yesu zimbanaka.

Na mbala mosi, bilandi zole yayi kwendaka na Yeruzalemi na yinzo yina bantumwa vukanaka mpe zonzaka na bawu mambu yina vanda me kumina bawu. Ntangu ba vandaka na kati ya yinzo, Yesu basikilaka bawu. Na kubanda, bantumwa ndimaka ve ti ya vandaka Yesu. Na yawu, yandi zonzaka na bawu: ‘Beno tala maboko ya munu, beno simba. Ya vandaka ya kusonama ti Kristo zolaka vumbuka na lufwa.’