Malongi ya Bakristo me mwangana

Bantumwa tumamaka na mambu yina Yesu zonzaka na bawu ya kumwangisa nsangu ya mbote na ntoto nyonso. Na 47 ya N.B., bampangi ya Antyose filisaka Polo na Barnabasi na kwenda samuna na bisika ya nkaka. Babakala zole yayi yina vandaka na tiya na kisalu ya kusamuna, kwendaka ntama na Derbe, na Listre, mpe na Ikoniumi bambanza ya Aziya ya fioti.

Polo na Barnabasi samunaka na bantu nyonso, ya vanda ba yina vandaka na mbongo to bapovre, bantwenya mpe biboba. Bantu mingi ndimaka matsyeleka na yina me tadila Yesu. Ntangu Polo na Barnabasi vanda samuna Sergiyuse Poluse, mfumu ya Shipre, nganga mosi sosaka kukanga bawu nzila. Polo zonzaka na nganga yina: ‘Yehova ke semba nge.’ Kaka na ntangu yina, meso ya nganga yina kufwaka. Ntangu mfumu Poluse talaka mambu yayi, yandi kumaka mundimi.

Polo na Barnabasi vanda samunaka bisika nyonso, yinzo na yinzo, na bazandu, na banzila mpe na basinagoge. Ntangu ba belusaka bakala mosi yina vandaka na maladi ya makulu na Listre, bantu yina talaka kimangu yayi, kanisaka ti ba vandaka banzambi mpe ba sosaka kusambila bawu. Kasi Polo na Barnabasi niminaka bawu mpe zonzaka: ‘Beno sambila kaka Nzambi! Beto ke kaka bantu.’ Na yawu, Bazwife ya nkaka kwizaka mpe salaka ti bantu balukila Polo. Ba bulaka yandi matadi, ba losaka yandi na ngaanda ya mbanza mpe ba vanda kanisa ti yandi kufwaka. Kasi yandi vandaka ntete moyo! Kaka na ntangu yina, bampangi ya yandi bakristo kwizaka samu na kusadisa yandi mpe ba nataka yandi na mbanza. Na manima, Polo vutukaka na Antyose.

Na 49 ya N.B., Polo salaka nzyetolo ya yandi ya zole. Yandi kwendaka tala dyaka bampangi ya yandi ya Aziya ya fioti. Na manima yandi kwendaka samuna nsangu ya mbote na Erope. Yandi kwendaka na Atene, na Efeze, na Filipi, na Tesalonika mpe na bambanza ya nkaka. Silase, Luke, mpe ntwenya ya bakala na nkumbu ya Timote kwendaka na yandi. Ba salaka kintwadi na kufungula bimvuka mpe na kusadisa bampangi na kuvanda na kiminu ya ngolo. Polo bikanaka na Korinto mvula mosi na ndambu samu na kukindisa bampangi ya kuna. Yandi samunaka, longaka mpe sonikaka mikanda na bimvuka mingi. Yandi vanda salaka mpe kisalu ya kuyidika bayinzo ya balele. Na manima, Polo vutukaka na Antyose.

Na 52 ya N.B., Polo bandaka nzyetolo ya yandi ya tatu na Aziya ya fioti. Yandi kwendaka na Nore tii na Filipi mpe na manima na Korinto. Polo lutisaka bamvula mingi na Efeze samu na kulonga, kubelusa bambevo mpe kusadisa kimvuka. Yandi vanda salaka mpe badiskure konso kilumbu na yinzo ya lukolo mosi. Bantu mingi vanda kuwaka yandi mpe vanda sobaka ndyatulu ya bawu. Na manima ya kusamuna nsangu ya mbote na bisika mingi, Polo vutukaka na Yeruzalemi.