Mwa kyuvu ya fioti yina beto nyonso lenda yufula

Mary na bakala ya yandi John,a ke vandaka na bwala yina ba lenda zonzila nsangu ya mbote na banzenza mingi yina me katukaka na bwala ya Philippines samu na kisalu. Na ntangu ya maladi ya COVID-19, Mary lendaka kubanda kulongoka Biblia na bantu mingi na bwala ya bawu, na ba yina ke vandaka na bisika ya nkaka ya yinza. Wa’ faso yandi salaka?

Mary vanda yufulaka kyuvu yayi na bantu yina vanda longokaka Biblia na yandi: “Nge me zaba muntu ya nkaka yina ke na nsatu ya kulongoka Biblia?” Kana bantu me ndima, yandi vanda zonzaka, “Nge lenda sadisa munu na kuvanda na disolo na bawu?” Mwa kyuvu ya fioti yayi vanda nataka mambu ya mbote. Samu na yinki? Samu ti bantu yina ke zolaka mambu ya Nzambi ke zolaka kukabula bamambu yina ba ke na longokaka na bantu ya dikanda ya bawu mpe na bandiku ya bawu. Yinki salamaka na ntangu yandi vanda yufulaka kyuvu yayi?

Jasmin, yina ke longokaka Biblia na Mary, sadisaka yandi na kubanda masolo na bantu 4 ya malu-malu yina vandaka na nsatu ya kulongoka Biblia. Mosi ya bawu na nkumbu ya Kristine, vanda zola mingi kulongoka ya yandi ya Biblia. Na yawu, yandi lombaka na Mary na kulongoka na yandi bambala zole na lumingu. Ntangu Mary yufulaka yandi kana yandi zabaka bantu ya nkaka yina ke zola kulongoka Biblia, Kristine zonzaka: “Ee, mu ke sadisa nge na kubanda masolo na bandiku ya munu.” Na kati ya mwa balumingu fioti, Kristine sadisaka Mary na kubanda masolo na bampangi ya yandi 4 yina vandaka na nsatu ya kulongoka Biblia. Mwa ntangu na manima, Kristine sadisaka dyaka yandi na kubanda masolo na bandiku ya yandi ya nkaka. Bandiku ya yandi yayi mpe, salaka mutindu mosi samu yandi banda kulongoka mpe na bantu yina ba zabaka.

Kristine zolaka mpe ti dikanda ya yandi yina ke na Philippines longoka Biblia. Na yawu, yandi sololaka na mwana ya yandi ya kento Andrea. Na kubanda, Andrea vanda kanisa ti Bampangi ya Yehova ke binzambi-nzambi, ba ke kwikilaka ve na Yesu mpe ti ba ke sadilaka kaka Ancien Testament. Kasi kaka na manima ya kulongoka ya ntete, dikanisi yina yandi vandaka na yawu na yina me tadila Bambangi ya Yehova sobaka. Na ntangu yandi vanda longokaka mambu ya malu-malu na kati ya Biblia, yandi vanda zonzaka: “Samu ti ya ke na kati ya Biblia ya ke matsyeleka!”

Mwa ntangu na manima, Andrea sadisaka Mary na kuzabana na bandiku ya yandi zole ya kento mpe na mpangi ya yandi mosi ya kento yina ke salaka na yandi, yina banda kulongoka Biblia na Mary. Dyaka, Mary vanda zabaka ve ti ntangu Andrea vanda longokaka na yandi, tantine ya Andrea, Angela, yina ke na meso ya kufwa vanda kuwaka. Mwa ntangu na manima, Angela zonzaka na Andrea na kulomba na Mary kana yandi lenda banda kulongoka Biblia na yandi mpe. Angela zolaka bamambu yina yandi vanda longokaka. Na kati ya ngonda mosi yandi simbaka na yintu baverse mingi ya Biblia, mpe yandi sosaka ti ba banda kulongoka bambala 4 na lumingu. Na lubakusu ya Andrea, Angela banda kuvanda na balukutakanu nyonso na nzila internet.

Na ntangu Mary kwizaka zaba ti Joshua, bakala ya Kristine, vanda vandaka pene-pene na kento ya yandi ntangu yandi vanda longokaka, Mary lombaka na yandi, kana yandi me zola kulongoka Biblia na bawu. Joshua zonzaka: “Mu ke kuwa kaka, kasi kuyufula ve munu byuvu. Kana nge yufula munu byuvu mu ke kwenda.” Kasi na manima ya baminiti 5 ya kulongoka, yandi yufulaka byuvu mingi kulutila Kristine. Yandi mpe zola kulongoka Biblia.

Mwa kyuvu ya fioti yina Mary vanda yufula sadisaka yandi na kubanda kulongoka Bibila na bantu mingi. Yandi lombaka na bampangi ya nkaka ya kento na ya bakala na kulongoka na ya ba nkaka na kati ya bawu. Bantu nyonso yina Mary bandaka kulongoka na bawu vandaka 28 mpe vanda vandaka na babwala 4.

Jasmin, yina beto me zonzila na kubanda ya disolo yayi, ke muntu ya ntete yina bandaka kulongoka na Mary. Yandi kuzwaka mbotokolo na avril 2021. Kristine kuzwaka mbotokolo na mai 2022 mpe vutukaka na Philippines samu na kuvanda na dikanda ya yandi. Bantu zole ya nkaka yina Kristine sadisaka na kubanda kulongoka Biblia na Mary kuzwaka mbotokolo. Angela kuzwaka mbotokolo mwa bangonda na manima mpe bubu yayi yandi ke mupasuli-nzila. Joshua bakala ya Kristine, mwana ya bawu ya kento Andrea mpe bantu mingi ya nkaka yina ke na longokaka ke na kulaka na kimpeve.

Na ntangu ya Yesu mpe ya bantumwa, bantu mingi vanda zonzilaka na bantu ya makanda ya bawu, bamambu yina ba vanda longokaka na yina me tadila Yesu. (Yoa. 1:41, 42a; Bis. 10:24, 27, 48; 16:25-33) Nge mpe lenda sadila kwandi kyuvu yina Mary sadilaka samu na yufula na bantu yina ke longokaka Biblia na nge mpe na ba yina ke sepeleka kusolola na mambu ya Nzambi? Kana nge yufula mwa kyuvu ya fioti yayi, ntangu ya nkaka nge mpe lenda kuzwa bantu yina ke banda kulongoka Biblia na nge.