Kubasika ya bavideo ya Lukutakanu ya nene ya 2020 “Vanda ntangu nyonso na kilengi”!

Bavideo ya balukutakanu ya beto ya nene ke simbá mingi bantima ya beto, mpe ya ke sadisá beto na kukonprendre bien malongi ya Biblia. Lukutakanu ya nene ya 2020 “Vanda ntangu nyonso na kilengi”! ke na bavideo 114, mpe 43 na kati ya yawu, salamá na bampangi ya Kimvuka ya Bantwadisi na ba-assistant ya bawu. Beno me sosá deja kuzaba wapi bangolo ya lombá na kubasisa bavideo yayi? Mpe yikwa ya salá?

Bampangi ya kento na ya bakala ya yinza nyonso kukuma 900, sadilá ngolo ya bawu mpe mayela ya bawu samu na kutula diboko na kubasika ya programe yayi. Kisalu yayi nyonso lombá ba-heure 100 000 na kati ya bamvula zole. Mpe 70 000 ya ba-heure yango kwendá na film ya baminute 76, Nehemi: “Kilengi ya Yehova ke ngolo ya beto.”

Kasi faso beno lenda tala yawu, kisalu yayi lombá bangolo mingi: kusadisa bampangi yina pesá ntangu ya bawu na luzolo nyonso, kusosila bawu bisika ya kulala mpe bima ya kisalu, bisika ya kusala film yango mpe ba-apareye ya kusadila.

“Mpangi Gossman Jared ke sadilá Yehova na departema ya Audio/Video. Yandi zonzá: “Komite ya enseignement ya Kimvuka ya Bantwadisi ke zolá ti bavideo ya beto lakisa babwala mingi, mpe faso bantu ya bisika mingi ke zingaka. Ba ke zolá ti bamambu salama faso yina, samu na kulakisa ti famiye ya beto ke ya yinza nyonso. Samu bamambu salama faso yina, ba-ekipe 24 na babwala 11 salá na bumosi na kusalá kisalu yayi. Ya lombá mbongo mingi samu bampangi ya ba-ekipe yayi sala na bumosi, na kuyidika bamambu na faso ya bien mpe kutwadisa yawu na faso ya mbote.”

Samu na kusala bavideo mingi yina beto ke talá, ya ke lombá beto sosa bisika ya kusala yawu, mpe bima ya nkaka ya fioti-fioti yina beto ke sadilá ve ntangu nyonso. Na kifwani, samu na kusala film ya Nehemi, ba yidiká baplase na studio ya Mount Ebo, pene-pene ya Patterson na New York. Bampangi zolá ti film yayi vanda faso babwala yina vandá na ntangu Nehemi, kasi ba vandá zola mpe ti beto sadila mbote makabu yina bampangi ke pesá. Na yawu, ba yidiká bima ya fioti-fioti yina ba lendá sadila samu na kulakisa faso bamur ya Jeruzalem vandá na ntangu ya ntama. Ba salá na bamur ya mabaya ya 6m. Ba tulak’ yawu muse, mpe na zulu ba tulak’ yawu kulere samu ya talana faso matadi. Ba vandá ve na mpasi ya kusadila bamur yango, mpe ya vandá ve mpasi na kusadila yawu na bitini mingi ya film ya Nehemi. Ya sala ti bisika ya kusadila film yayi vanda mingi. Kasi ata faso yina, ya lombá mbongo kukuma 53 791 220 to badolar 100 000, kaka samu na kusala bisika ya kusadila film yayi.a

Kuzaba bamambu yayi nyonso ke sala ti beto vutula dyaka matondo ya kulutila, na faso yina ba salá Lukutakanu ya nene ya mvula yayi. Beto ke sure ti bangolo yina bampangi me sala samu na kubasisa programe yayi, ke puse bantu ya yinza nyonso na kuvutula Yehova matondo, mpe na kukumisa yandi na bumosi. Matondo mingi samu na makabu yina beno ke pesá na luzolo nyonso na nzila ya internet na donate.jw.org mpe na bafaso ya nkaka.