• Wapi mutindu balukutakanu ya Bambangi ya Yehova lenda sadisa nge?
    Sepela na luzingu ya ntangu nyonso!—Masolo samu na kuzaba Biblia
    • Kileso 10. Na lukutakanu mosi ya Bambangi ya Yehova, bakala mosi ke na landaka verse na Biblia ya mpangi mosi.

      KILESO 10

      Wapi mutindu balukutakanu ya Bambangi ya Yehova lenda sadisa nge?

      Samu na bantu ya nkaka, mbala ya ntete yina ba bokilá bawu na balukutakanu ya Bambangi ya Yehova,a ya vandá mwa mpasi na bawu na kukwenda. Nge lenda yufula: ‘Wa’ faso balukutakanu yina ke salamaka? Samu na yinki ya ke mfunu? Mu zolá kwenda kwandi kuna?’ Na kileso yayi, nge ke longoka faso balukutakanu lenda sadisa nge na kukulisa kindiku ya nge na Nzambi, mpe ya lenda bongisa luzingu ya nge.

      1. Samu na yinki Bambangi ya Yehova ke vukanaka?

      Tala faso Biblia me lakisa ti ya ke mfunu na kuvukaná na bampangi: “Mu ke pesa nkembo na Yehova na balukutakanu ya nene.” (Nkunga 26:12, note na yinsi ya paje) Bubu yayi mpe, balukutakanu ke pesá Bambangi ya Yehova kilengi mingi. Na yinza nyonso, ba ke vukaná balumingu nyonso samu na kukembila, kuyimba, mpe kusambila Nzambi. Ba ke salá mpe balukutakanu ya nene bamvula nyonso.

      2. Yinki nge ke longoka na balukutakanu ya beto?

      Na balukutakanu yayi, “ba ke sadisaka bantu na kuzaba mbote-mbote mambu ya Nzambi.” (Tanga Nehemi 8:8.) Kuna, nge ke longoka mingi na yina me tadila Yehova na bifu ya yandi ya mbote. Kindiku ya nge na Yehova ke kuma ngolo ntangu nge ke zaba ti yandi ke zolá nge. Nge ke longoka mpe faso Yehova lenda sadisa nge na kuvanda na luzingu ya kizunu.—Izaya 48:17, 18.

      3. Wa’ faso bampangi yina ke vukaná na nge lenda sadisa nge?

      Yehova zonzá na beto na “kusalasana samu na kutwadisa beto na kuzola bampangi mpe na kusala bisalu ya mbote. Beto manga ve na kukwenda kuvukana kintwadi na bampangi ya dibuundu.” (Baebre 10:24, 25) Na balukutakanu ya beto nge ke kutana na bantu yina ke zolá mingi bampangi. Nge ke tala ti bawu mpe ke zolá kulongoka mingi mambu ya Nzambi. Malongi yina ba ke zonzilá kuna ke pesa nge ngolo samu ya ke katuká na Biblia. (Tanga Baroma 1:11, 12.) Kuna nge lendá solola mpe na bampangi yina ke bumbá kilengi ya bawu ata na mantwala ya bampasi. Nge ke na talá samu na yinki Yehova me zola ti beto vukaná na bampangi ntangu nyonso?

      SOSA KUZABA MBOTE-MBOTE

      Tala faso balukutakanu ya Bambangi ya Yehova ke salamá, mpe samu na yinki nge me bonga kusala bangolo samu na kukwenda na balukutakanu yina.

      4. Balukutakanu ya Bambangi ya Yehova

      Bakristo ya ntete vandá vukaná ntangu nyonso samu na kusambila Yehova. (Baroma 16:3-5) Tanga Bakolose 3:16, mpe na manima beto zonzila kyuvu yayi:

      • Wa’ faso bakristo ya ntete vandá sambilá Yehova?

      Bubu yayi mpe, Bambangi ya Yehova ke vukaná ntangu nyonso samu na kusambila Yehova. Samu na kuzaba faso balukutakanu ya bawu ke salamá, Tala VIDEO. Na manima, tala foto ya lukutakanu mosi ya kimvuka mpe zonzila kyuvu yina ke landa.

      VIDEO: Yinki ke salamá na Yinzo ya Kimfumu? (2:12)

      • Na video yayi, wa’ faso mambu yina ke salamá na Yinzo ya Kimfumu ke na kwelaná na Bakolose 3:16?

      • Na video to na foto, wapi mambu ya nkaka nge me zola na yina me tadila balukutakanu?

      Tanga 2 Bakorinto 9:7, mpe na manima beto zonzila kyuvu yayi:

      • Samu na yinki mabonza kele ve na balukutakanu ya Bambangi ya Yehova?

      Muntu yina ke longá nge Biblia ke lakisa nge mambu yina ba ke longoka na lukutakanu ya lumingu yayi.

      • Wapi kitini ya lukutakanu nge me kanisa ti nge ke zola mingi?

      Nge me zaba yawu?

      Na jw.org, nge lenda tala wapi kisika mpe na wapi ntangu balukutakanu ke salamá na yinza nyonso.

      Collage: Faso ya ke salamaka na Yinzo ya Kimfumu tekila lukutakanu banda, ntangu ya ke lutaka mpe na manima ya yawu. Ya ke na talanaka na bafoto A tii D. A. Na lukutakanu mpangi ya Bambangi ya Yehova mosi ke na sadilá Biblia samu na kulonga bampangi. B. Na lukutakanu ya Bambangi ya Yehova, mpangi mosi ya kento ke na pesá mvutu na kyuvu yina ba me yufula. C. Mosi ya Bambangi ya Yehova ke na sololaka na dikanda mosi na manima ya lukutakanu. D. Mosi ya Bambangi ya Yehova ke na yambaka mpangi mosi ya kiboba yina me kwiza na lukutakanu.

      1. Na balukutakanu ya beto, nge lenda kuwa ba discours, kutala bavideo, mpe kulongoka faso ya kulonga Biblia. Balukutakanu ke bandá mpe ke manisá na nzimbu mpe lusambu

      2. Na bitini ya nkaka ya lukutakanu, ba ke lombá na bampangi na kuzonza makanisi ya bawu

      3. Beto ke yambá bantu nyonso: babakala, bakento, biboba, bana mpe bantwenya

      4. Balukutakanu ya beto ke ya mpamba. Mabonza kele ve

      5. Nge me bonga kusala bangolo samu na kuvanda na balukutakanu

      Kanisa na kifwani ya dikanda ya Yesu. Samu na kuvanda na lukutakanu mosi ya nene yina vandá salamá na Yeruzalemi, ba zolá tambula bilumbu 3 katuka na Nazareti tii Yeruzalemi. Tanga Luke 2:39-42, mpe na manima beto zonzila byuvu yayi:

      • Nge me kanisa ti ya vandá ve mpasi na kukwenda na Yeruzalemi?

      • Wapi bangolo nge me bonga kusala samu na kuvanda na balukutakanu ya kimvuka?

      • Nge me kanisa ti ya ke mbote nge sala bangolo yina? Samu na yinki?

      Collage: Yozefi, Maria, Yesu, na leki mosi ya yesu ke na yidika bima samu na kukwenda na Yeruzalemi. 1. Yozefi ke na kangaka basaki na zulu ya kibulu, mpe Maria ke na yidikaka bima ya nkaka. 2. Karti ke na lakisaka nzila katuka Nazareti tii Yeruzalemi.

      Biblia ke zonzá ti kuvukana samu na kusambila Yehova ke mfunu mingi. Tanga Baebre 10:24, 25, mpe na manima beto zonzila kyuvu yayi:

      • Samu na yinki beto me bonga kuvanda na balukutakanu ntangu nyonso?

      BANTU YA NKAKA KE ZONZAKA: “Kuvukana na bampangi samu na kusambila ke ve mfunu. Nge lenda sambila to kutanga Biblia nge mosi na yinzo.”

      • Wapi verse to kifwani ya Biblia me lakisa beto ti Yehova zola beto vanda na balukutakanu?

      NA BUNKUFI

      Kukwenda na balukutakanu ke sadisa nge na kulongoka mingi na yina me tadila Yehova, na kukulisa kindiku ya nge na yandi, mpe na kusambila yandi na bampangi ya nkaka.

      Mambu ya kusimba

      • Samu na yinki Yehova zola ti beto vukana samu na kusambila yandi?

      • Yinki nge ke longoka na balukutakanu ya Bambangi ya Yehova?

      • Wapi bambote ya nkaka nge lenda kuzwa na kukwendá na balukutakanu?

      Yina nge lenda sala

      SOSA KUZABA DYAKA

      Si nge ke na mwa boma ya kukwenda na balukutakanu, tala kifwani ya muntu mosi yina vandá tala bamambu faso yina.

      Beto lenda zimbana ve faso ba yambaka beto (4:16)

      Tala samu na yinki mwana ya bakala mosi me zola balukutakanu ya Bambangi ya Yehova, mpe wapi bangolo yandi salá samu na kukwendá kuna ntangu nyonso.

      Mu vandá zolá mingi kukwenda na balukutakanu! (4:33)

      Longoka yina bantu ya nkaka ke kanisá na yina me tadila kukwenda na balukutakanu ya Bambangi ya Yehova.

      “Samu na yinki kukwenda na balukutakanu na Yinzo ya Kimfumu?” (Tanga yawu na jw.org)

      Tala faso muyibi mosi ya kuzabana yidiká luzingu ya yandi na manima ya kukwenda na lukutakanu mosi ya Bambangi ya Yehova.

      “ Je ne sortais jamais sans mon arme ” (La Tour de Garde, 1er Juillet 2014)

  • Kimfumu ya Nzambi ke na yalaka!
    Sepela na luzingu ya ntangu nyonso!—Masolo samu na kuzaba Biblia

    • 5. Na 1914 yinza sobaka

      Tala VIDEO.

      VIDEO: Na 1914 yinza sobaka (1:10)

      Yesu zonzá wapi mutindu yinza zolá vanda na manima ya ntangu yina yandi zolá banda kuyala. Tanga Luke 21:9-11, mpe na manima beto zonzila kyuvu yayi:

      • Na bamambu nyonso yina ba me zonzila na kati ya baverse yayi, wapi yina nge me tala ti ya ke na lunganá bubu yayi?

      Ntumwa Polo zonzilá mavanga ya bantu na bilumbu ya nsuka ya luyalu ya bantu. Tanga 2 Timote 3:1-5, mpe na manima beto zonzila kyuvu yayi:

      • Wapi mavanga yina ba me zonzila awa nge ke na talá na bantu bubu yayi?

      Collage: Bamambu yina ke na lutá na yinza na bilumbu ya nsuka. 1. Mfumu ya bambulumbulu ke na kugangá maboko na zulu. 2. Bayinzo me mwangana na manima ya kuningana ya ntoto. 3. Ba avions ya bambulumbulu. 4. Bantu me lwata ba masques mpe ke na tambulá na ngaanda. 5. Bantu ya ntima ya yimbi me tula tiya na Tour jumelle ya bwala ya New York. 6. Bakala mosi ke na sadilá dyamba. 7. Bakala mosi ke na kugangá na zulu ya kento ya yandi. 8. Mitindu mingi ya drogue mpe ya malafu. 9. Bakento zole ya ba lesbiennes ke na baká bafoto. 10. Muntu mosi ke na tulá ngwasuma, mpe bantu mingi ke na binaka. 11. Bandi mosi me simba bouteille ya tiya.

      6. Lakisa ti nge ke na kwikilá ti kimfumu ya Nzambi ke na yalaka

      Tanga Matayi 24:3, 14, mpe na manima beto zonzila byuvu yayi:

      • Wapi kisalu ya mfunu ke na lakisá ti kimfumu ya Nzambi ke na yalaka?

      • Wa’ faso nge mpe lenda tula diboko na kisalu yango?

      Luyalu ya kimfumu ya Nzambi bandá, mpe ntama mingi ve, ya ke yala ntoto nyonso. Tanga Baebre 10:24, 25, mpe na manima beto zonzila kyuvu yayi:

      • Yinki mosi na mosi na beto me bonga kusala samu “Kilumbu ya Mfumu me kuma pene-pene”?

      Collage: 1. Mulongoki ya Biblia ke na lukutakanu ya Bambangi ya Yehova. 2. Mulongoki yango ke na samuná nsangu ya mbote na muntu yina yandi me zaba.

      Kana nge me longoka mambu yina lenda sadisa, to lenda vuukisa bantu ya nkaka, yinki ya ke nata nge na kusala?