Samu na bantu mingi, kuzonzila mambu ya kuvukisa nzutu ke mambu ya nsoni. Kasi Biblia ke zonzilaka yawu pwelele na buzitu nyonso. Mambu yina ya ke zonzá ke samu na bambote ya beto. Ni Yehova yidiká beto. Na yawu, yandi me zaba mambu yina ke ya kulutila mbote samu na beto. Yandi ke zonzá na beto yinki beto me bonga kusala samu na kusepelisa yandi mpe yinki beto lenda sala samu na kusepela na luzingu ya ntangu nyonso na bilumbu yina ke kwiza.

1. Wapi mutindu Yehova ke talá mambu ya kuvukisa nzutu?

Kuvukisa nzutu ke dikabu yina me katuka na Yehova. Yandi zola ti bantu sepela na yawu. Kasi yandi pesaka yawu kaka na kento na bakala yina me kwelanaa. Dikabu yayi ke sadisá ve kaka bantu ya kukwela na kubuta bana, kasi mpe samu ba lakisa luzolo na mutindu ya mbote yina ke pesa bawu kilengi. Ni na yawu Biblia ke zonzá: “Tala kilengi na kento ya nge ya buntwenya.” (Bingana 5:18, 19) Yehova ke zolá ti mukristo ya kukwela vukisa nzutu kaka na kento to bakala ya yandi mpe kubwa ata fioti ve na kinsuza.—Tanga Baebre 13:4.

2. Samu na Nzambi wapi yina ke bafaso ya yimbi ya kuvukisa nzutu?

Biblia ke zonzá ti “Bantu yina ke vukisaka nzutu na faso ya yimbi . . . ke kota ve na Kimfumu ya Nzambi.” (1 Bakorinto 6:9, 10, nwt-MK) Bantu yina soniká Biblia na ndinga ya grec, sadilá mot pornéïa samu na kuzonzila bafaso ya yimbi ya kuvukisa nzutu. Ya zola zonza (1) kuvukisa nzutu bakala na kento yina me kwelana veb, (2) kuvukisa nzutu babakala na babakala to bakento na bakento, mpe (3) kuvukisa nzutu bantu na bibulu. Kana beto “losa bafaso ya yimbi nyonso yayi ya kuvukisa nzutu,” beto ke sepelisa Yehova mpe beto ke kuzwa bambote mingi.—1 Batesalonika 4:3, nwt-MK.

SOSA KUZABA MBOTE-MBOTE

3. Kima bafaso ya kuvukisa nzutu yina ke yimbi na meso ya Nzambi

Yozefi salá nyonso samu na kukima kento yina vandá sosa kuvukisa nzutu na yandi. Tanga Kubanda 39:1-12, mpe na manima beto zonzila byuvu yayi:

• Samu na yinki Yozefi kimaka?—Tala verse 9.

• Nge me kanisa ti Yozefi baká mukanu ya mbote? Samu na yinki?

VIDEO: Kima bafaso ya yimbi ya kuvukisa nzutu (5:06)

Yehova zola ti beto kima to beto bika bafaso nyonso ya yimbi ya kuvukisa nzutu. Tanga 1 Bakorinto 6:18, mpe na manima beto zonzila byuvu yayi:

• Wapi bamambu lenda sala ti beto kubwa na bafaso ya yimbi ya kuvukisa nzutu?

• Wa’ faso nge lenda kima bafaso ya yimbi ya kuvukisa nzutu?

4. Manga mambu yina lendá nata nge na kusadila bafaso ya yimbi ya kuvukisa nzutu

VIDEO: Tanga Biblia ntangu nyonso samu na kubwa ve na mutambu (3:02)

• Ntangu mpangi ya bakala yina beto me tala na video kwizá zaba ti, makanisi mpe ndyatulu ya yandi zola nata yandi na kusala kinsuza to na kuvanda dyaka ve ya kukangama na kento ya yandi, yinki yandi salaka?

Bakristo ya kukwikama ke vandá mpe na nsatu ya kusala bangolo samu na kuvanda na makanisi ya mbote. Yinki nge lenda sala samu na kukatula makanisi ya yimbi na yintu ya nge? Tanga Bafilipi 4:8, mpe na manima beto zonzila byuvu yayi:

• Na wapi mambu ya mbote beto me bonga kukanisa?

• Wa’ faso kutanga Biblia mpe kukipesa na kisalu ya Yehova, ke sadisa beto na kukatula makanisi yina lenda nata beto na kusala disumu?

5. Malongi ya Yehova ke natina beto bambote mingi

VIDEO: Beto kukondwa ve mayela (9:31)

• Yinki ntwenya ya bakala yayi salá yina bwisaka yandi na mutambu?—Tala Bingana 7:8, 9.

• Faso Bingana 7:23, 26 me lakisa yawu, kuvukisa nzutu na faso ya yimbi lenda natina muntu bampasi mingi. Kana nge sala bangolo samu na kuvanda na ndyatulu ya kuvedila, wapi bamambu ke kumina ve nge?

• Wa’ faso ndyatulu mpe makanisi ya kuvedila, lenda sadisa beto na kuzwa luzingu ya ntangu nyonso na bilumbu yina ke kwiza?

Samu na bantu ya nkaka, mambu yina Biblia ke zonzá na yina me tadila kuvukisa nzutu babakala na babakala to bakento na bakento, ke lakisá ti Nzambi zola ve bantu. Kasi Yehova Nzambi ya luzolo, me zola ti bantu sepela na luzingu ya ntangu nyonso. Na yawu, samu na kuzwa luzingu yango, beto fwana kutadila bamambu faso Yehova ke tadilaka yawu mpe kusadila misiku ya yandi ntangu nyonso na luzingu ya beto. Tanga 1 Bakorinto 6:9-11, mpe na manima beto zonzila kyuvu yayi:

• Katula kuvukisa nzutu babakala na babakala to bakento na bakento, ya ke na mambu ya nkaka yina Yehova ke niminá beto na kusala?

Samu na kusepelisa Nzambi, beto nyonso zola soba ndyatulu ya beto. Kusala yawu ke kwandi na bambote? Tanga Nkunga 19:8, 11, mpe na manima beto zonzila kyuvu yayi:

• Nge me kanisa ti beto lenda zitisa malongi ya Yehova to ya ke mpasi na kuzitisa yawu?

NA BUNKUFI

Kuvukisa nzutu ke dikabu yina me katuka na Yehova, kasi yandi pesaka yawu kaka na kento na bakala yina ke ya kukwelana.

Mambu ya kusimba

• Wapi yina ke bafaso ya yimbi ya kuvukisa nzutu?

• Yinki beto me fwana kusala samu na kubwa ve na bafaso ya yimbi ya kuvukisa nzutu?

• Wapi bambote beto ke kuzwa kana beto tadila bamambu mutindu Yehova ke tadilaka yawu, mpe kuzitisa malongi ya yandi na yina me tadila kuvukisa nzutu?

SOSA KUZABA DYAKA

Tala samu na yinki Nzambi me zola ti bakala na kento yina ke na nsatu ya kuvanda yinzo mosi, zolá vanda ya kukwelana.

“Yinki Biblia ke zonzá na yina me tadila kento na bakala yina ke vandá yinzo mosi, kasi ba me kwelana ve?” (Tanga yawu na jw.org)

Samu na Biblia kuvukisa nzutu babakala na babakala to bakento na bakento kele yimbi. Tala samu na yinki ya zola zonza ve ti beto me bonga kuyina ba yina ke salaka yawu.

“Kuvukisa nzutu babakala na babakala to bakento na bakento kele kwandi yimbi?” (Tanga yawu na jw.org)

Tala faso malongi ya Nzambi na yina me tadila bafaso nyonso ya kuvukisa nzutu ke bumbá beto.

“Kutula kinama ya kuvukisa nzutu na yinwa, kele kwandi mutindu ya kuvukisa nzutu?” (Tanga yawu na jw.org)

Na disolo “ Ils ont respecté ma dignité, ” tala yinki natá bakala mosi yina vanda vukisá nzutu na babakala, na kubika nsalulu yina samu yandi sepelisa Nzambi.

“ La Bible transforme des vies ” (La Tour de Garde, 1^er Avril 2011)

Bantu ya nkaka ke kanisá ti samu muntu vanda na kilengi na luzingu, yandi me bonga kukwela. Ya kele na ba yina ke ya kukwela kasi ke na mawa, mpe ba ya nkaka yina ke ve ya kukwela ke na kilengi. Biblia ke zonzá ti kukwela to kukwela ve, kele nyonso zole makabu ya Yehova.

1. Wapi yina ke bambote ya kuvanda ve ya kukwela?

Biblia ke zonzá ti: “muntu yina me kwela [. . .] me sala mbote, kasi muntu yina me manga kukwela me lutila kusala mambu ya mbote.” (Tanga 1 Bakorinto 7:32, 33, 38.) Samu na yinki Biblia ke zonzá ti muntu yina me kwela ve “me lutila na kusala mambu ya mbote”? Mukristo yina ke ve ya kukwela, kele ve na kento to bakala ya kukipe mpe yandi ke na ntangu mingi. Na kifwani, yandi lenda sala bamambu mingi mutindu kukwenda na bwala ya nkaka samu na kusamuna. Ya kulutila, yandi ke na ntangu mingi samu na kukulisa kindiku ya yandi na Yehova.

2. Wapi yina ke bambote ya kuvanda ya kukwela?

Kuvanda ve ya kukwela ke na bambote ya yawu, kasi kuvanda ya kukwela mpe ke na bambote ya yawu. Biblia ke zonzá ti “bantu zole me lutila muntu mosi.” (Longi 4:9) Matsyeleka yayi ke talaná pwelele na bakristo yina ke salá nyonso samu na kusadila malongi ya Biblia na kati ya makwela ya bawu. Kento na bakala yina kwelaná, baká mukanu ya kuzola mpe ya kuzitisa mosi na mosi na kati ya bawu luzingu ya bawu nyonso. Ya ke sala ti ba tula ntima na dikwela ya bawu mpe ba bakila yawu mutindu kima yina ke kengidila bawu, kulutila ba yina ke vandá yinzo mosi kasi ba me kwelana ve. Bana yina ba ke buta mpe, ke kula na kisika yina ke kengidila bawu.

3. Wapi yina ke dikanisi ya Yehova na yina me tadila makwela?

Ntangu Yehova kwelisá kento na bakala ya ntete, yandi zonzá: “Bakala ke bika tata ya yandi na mama ya yandi mpe yandi ke kangama na kento ya yandi.” (Kubanda 2:24) Yehova zola ti kento na bakala zolasana mpe ba zinga kintwadi luzingu ya bawu nyonso. Yehova ke ndimá ti kento na bakala lenda kufwa makwela, kaka kana mosi na kati ya bawu me sala kinsuza. Ni na yawu, Yehova ke pesá na bakala to kento yina me sala ve disumu bweso ya kusoola, kana yandi ke kufwa makwela to ve.a (Matayi 19:9) Yehova ke zolá ve ata fioti ti mukristo kwela bakento to babakala mingi, kasi mosi kaka.—1 Timote 3:2.

SOSA KUZABA MBOTE-MBOTE

4. Kana nge ke ve ya kukwela sadila mbote dikabu yina

Samu na Yesu, kuvanda ve ya kukwela vandá dikabu. (Matayi 19:11, 12) Tanga Matayi 4:23, mpe na manima beto zonzila kyuvu yayi:

• Wa’ faso Yesu sadilá dikabu ya kuvanda ve ya kukwela samu na kusala luzolo ya Tata ya yandi mpe kusadisa bantu ya nkaka?

Bakristo yina ke ve ya kukwela lenda sadila na kilengi nyonso dikabu yina mutindu Yesu. Tala VIDEO, mpe na manima beto zonzila kyuvu yina ke landa.

VIDEO: Bakristo ya kukwikama yina ke ve ya kukwela (3:11)

• Wa’ faso bakristo yina ke ve ya kukwela lenda sadila mbote dikabu yayi?

Nge me zaba yawu?

Biblia ke pesá ve bamvula yina muntu me fwana kukwela. Kasi, ya ke lombá na muntu yina ke na nsatu ya kukwela na kulutisa ntete “kubanda ya buntwenya,” samu ti na ntangu yina nsatu ya kuvukisa nzutu ke vandá ngolo mpe ya lenda sala ti yandi soola ve mbote muntu ya kukwela.—1 Bakorinto 7:36, nwt-MK.

5. Soola na mayela nyonso muntu yina nge ke kwela

Kusoola muntu yina nge ke kwela ke mosi ya mikanu ya kulutila mfunu na luzingu. Tanga Matayi 19:4-6, 9, mpe na manima beto zonzila kyuvu yayi:

• Samu na yinki mukristo fwana kukanisa mbote-mbote tekila yandi baka mukanu ya kukwela?

Biblia ke zonzilá bifu ya mbote yina nge me bonga kusosa na kento to bakala yina nge me zola kukwela. Kasi mambu ya kulutila mfunu, ni kusosa kento to bakala yina ke zolá Yehova.b Tanga 1 Bakorinto 7:39 mpe 2 Bakorinto 6:14. Mpe na manima beto zonzila byuvu yayi:

• Samu na yinki beto me fwana kukwelana kaka na mpangi mukristo?

• Samu na nge, yinki ya ke sala Yehova kana muntu me soola kukwela muntu yina ke ve kisadi ya yandi?

6. Tala mambu ya makwela mutindu Yehova ke tadilaka yawu

Na ntangu ya Izraele ya ntama, babakala ya nkaka vandá kufwa makwela na bakento ya bawu, samu na mambu yina Biblia me pesa ve nzila na kufwa makwela. Tanga Malaki 2:13, 14, 16, mpe na manima beto zonzila kyuvu yayi:

• Samu na yinki Yehova ke zolá ve ntangu bantu ke kufwá makwela samu na mambu yina biblia ke zonzilá ve?

Tala VIDEO, mpe na manima beto zonzila kyuvu yina ke landa.

VIDEO: Dikwela—Mukanu ya ntangu nyonso (4:30)

• Kana nge ke ya kukwela kento to bakala yina ke ve Mbangi ya Yehova, yinki nge fwana kusala samu dikwela ya beno vanda na kilengi?

7. Sadila malongi ya Yehova na yina me tadila makwela

VIDEO: Nge lenda zitisa malongi yina Yehova me pesa samu na makwela (4:14)

Tanga Baebre 13:4, mpe na manima beto zonzila byuvu yayi:

• Nge me kanisa ti beto lenda zitisa malongi yina Yehova me pesa samu na makwela to ya ke mpasi na kuzitisa yawu? Samu na yinki nge me zonza faso yina?

Yehova ke lombá na bakristo na kusonika makwela ya bawu to na kufwa yawu na mantwala ya luyalu, mutindu luyalu ke lombaka yawu na babwala mingi. Tanga Tite 3:1, mpe na manima beto zonzila byuvu yayi:

• Wapi mutindu luyalu ke zolá ti makwela salama? Kana nge ke zonzá ti nge ke ya kukwela, “dikwela” ya nge ke kwandi faso luyalu ke lombaka yawu?

NA BUNKUFI

Kuvanda ya kukwela to ya kukwela ve, kele nyonso zole makabu ya Yehova. Kana beto sadila misiku ya Yehova na mosi na mosi ya makabu yayi, ya ke natina beto kilengi ya tsyeleka.

Mambu ya kusimba

• Wapi mutindu bantu yina ke ve ya kukwela lenda sadila mbote dikabu ya bawu?

• Samu na yinki Biblia ke zonzá ti beto me bonga kukwelana kaka na mpangi mukristo?

• Na wapi mambu Biblia ke pesá nzila na kufwa makwela?

SOSA KUZABA DYAKA

Yinki zola zonza kukwelana “kaka na Mfumu”?

“ Questions des lecteurs ” (La Tour de Garde, 1^er Juillet 2004)

Tala bavideo zole ya nkufi yina lenda sadisa nge, na kusoola mbote-mbote muntu yina nge ke banda kutalana na yandi samu na kuzabana mpe na manima kukwelana.

Kubama samu na makwela (11:53)

Tala samu na yinki mpangi mosi ya bakala zonzá ti yina Yehova pesaka yandi lutilaka nyonso yina yandi bikaka.

Mu vandá kanisa ti yandi ke ndima kulongoka Biblia (1:56)

Na wapi bamambu bantu me fwana kukanisa tekila ba baka mukanu ya kufwa makwela to ya kukabuka?

“ Honore ‘ce que Dieu a uni’ ” (La Tour de Garde, Décembre 2018)