• Kimfumu ya Nzambi kele yinki?
    Sepela na luzingu ya ntangu nyonso!—Masolo samu na kuzaba Biblia
    • Kileso 31. Na mazulu, Yehova me tula Yesu mfumu.

      KILESO 31

      Kimfumu ya Nzambi kele yinki?

      Nsangu ya kimfumu ya Nzambi ke nsangu ya kulutila mfunu na kati ya Biblia. Yehova ke sadila kimfumu ya yandi samu na kulungisa luzolo ya yandi samu na ntoto. Kasi, kimfumu ya Nzambi kele yinki? Wa’ faso beto me zaba ti ya ke na yalaka? Wapi mambu ya me lungisaka? Mpe wapi mambu ya ke lungisa na bilumbu yina ke kwiza? Kileso yayi na bileso zole yina ke landa, ke pesa bamvutu na byuvu yayi.

      1. Kimfumu ya Nzambi kele yinki, mpe nani ke mfumu ya yawu?

      Kimfumu ya Nzambi kele luyalu (gouvernement) yina Yehova Nzambi tulaka na zulu. Ni Yesu ke na twadisaka yawu. (Matayi 4:17; Yoane 18:36) Ntangu Biblia ke zonzilá Yesu, ya ke zonzá: “Yandi ke yala seko.” (Luke 1:32, 33) Samu Yesu ke Mfumu ya kimfumu ya Nzambi, yandi ke yala na zulu ya ntoto nyonso.

      2. Nani ke yala na Yesu?

      Yesu ke yala ve yandi mosi. Bantu yina me katuka na “[. . .], bandinga nyonso, makanda nyonso mpe bayinsi nyonso . . . ke yala yinza nyonso.” (Luzabusu 5:9, 10) Bantu yikwa ke yala na Yesu? Banda ntangu yina Yesu kwizá na ntoto, bantu mingi ke na kumá bilandi ya yandi. Kasi, kaka 144 000 na kati ya bawu ke kwenda na zulu samu na kuyala na Yesu. (Tanga Luzabusu 14:1-4.) Bakristo nyonso ya nkaka ke kuzwa bambote ya kimfumu ya Nzambi awa na ntoto.—Nkunga 37:29.

      3. Samu na yinki kimfumu ya Nzambi me lutila bimfumu nyonso ya bantu?

      Ata ti bamfumu ya yinza yayi ke sosá kusala mambu ya mbote, ba ke lendá ve kusala nyonso yina ba me zola, samu ti ba ke ve na makoki ya kusala yawu. Ntangu ya nkaka, ba yina ke kwizá na manima ya bawu ke salá bamambu na faso ya yimbi, mpe ke bebisá yina bampangi salaka. Kasi Yesu, mfumu ya kimfumu ya Nzambi, ke yala ntangu nyonso. Nzambi me “tula kimfumu mosi yina ke kufwa ve ata fioti.” (Danyele 2:44) Yesu ke yala na zulu ya ntoto nyonso, mpe yandi ke bakila bantu nyonso faso mosi. Yandi ke na luzolo, ntima ya mbote, mpe lunungu—mpe yandi ke longa bantu nyonso na kubakila bampangi ya bawu na luzolo, ntima ya mbote, mpe lunungu.—Tanga Izaya 11:9.

      SOSA KUZABA MBOTE-MBOTE

      Tala samu na yinki kimfumu ya Nzambi me lutila baluyalu nyonso ya bantu.

      Yesu ke na yalá ntoto katuka na zulu. Ba yina ke yala na yandi ke ya kuvanda na manima ya yandi. Nkembo ya Yehova ke na ngengá na manima ya bawu.

      4. Kimfumu ya Nzambi ke yala na zulu ya ntoto nyonso

      Yesu Kristo ke mfumu yina me lutila bamfumu nyonso ya yinza na ngolo. Tanga Matayi 28:18, mpe na manima beto zonzila kyuvu yayi:

      • Samu na yinki kimfumu ya Yesu me lutila baluyalu ya bantu?

      Luyalu ya bantu ke vandá kaka ntangu fioti mpe na manima bantu ya nkaka ke baká kimfumu. Konso luyalu ke kaka na yinsi to kisika mosi yina ya ke yalaka. Kasi yinki beto ke zonza samu na kimfumu ya Nzambi? Tanga Danyele 7:14, mpe na manima beto zonzila byuvu yayi:

      • Samu na yinki ya ke mbote ti kimfumu ya Nzambi “kufwa ve” to vanda ntangu nyonso?

      • Samu na yinki ya ke mbote ti kimfumu ya Nzambi yala na zulu ya ntoto nyonso?

      5. Ba me bonga kukatula bimfumu nyonso ya bantu

      Samu na yinki kimfumu ya Nzambi me bonga kukatula bimfumu nyonso ya bantu? Tala VIDEO, mpe na manima beto zonzila kyuvu yina ke landa.

      VIDEO: Kimfumu ya Nzambi ke yinki?—Ndambu (1:41)

      • Wapi bamambu luyalu ya bantu nataka?

      Tanga Longi 8:9, mpe na manima beto zonzila kyuvu yayi:

      • Nge me kanisa ti kimfumu ya Nzambi me bonga kukatula bimfumu nyonso ya bantu? Samu na yinki?

      6. Bamfumu ya kimfumu ya Nzambi me zaba mbote bantu

      Samu mfumu ya beto, Yesu, zingá awa na ntoto, yandi ke “talaka beto kyadi na bamambu yina ke lembisaka beto.” (Baebre 4:15) Yehova soolá bakento mpe babakala ya kukwikama 144 000 samu na kuyala na Yesu. Yandi soolá bawu na “bifumba nyonso, bandinga nyonso, makanda nyonso mpe bayinsi nyonso.”—Luzabusu 5:9.

      • Ya ke na salá nge yinki na kuzaba ti, Yesu na ba yina nyonso ke yala na yandi zingaka awa na ntoto, mpe me zaba mbote-mbote bamambu ya bantu?

      Babakala na bakento yina ke yala na Yesu.

      Yehova me soola bakento na babakala ya bisika nyonso samu na kuyala na Yesu

      7. Misiku ya kimfumu ya Nzambi me lutila misiku ya bantu

      Baluyalu ya bantu ke tulá misiku, samu na kusadisa bantu yina ke na yisi ya bawu. Kimfumu ya Nzambi mpe me tula misiku samu na bambote ya bantu yina ya ke yala. Tanga 1 Bakorinto 6:9-11, mpe na manima beto zonzila byuvu yayi:

      • Na nge, wa’ faso yinza ke kuma ntangu muntu nyonso ke landa misiku ya Nzambi?a

      • Samu na nge, ya ke kwandi mbote ti Yehova pesa misiku na ba yina nyonso ke vanda na yisi ya kimfumu ya yandi? Samu na yinki?

      • Yinki ke na lakisá ti bantu yina ke tumamá ve na misiku yina lenda soba?—Tala verse 11.

      Policier mosi me lomba na batomabilu na kuvingila. Samu bantu ya bamvula nyonso luta na nzila.

      Baluyalu ya bantu ke tulá misiku samu na kubumba mpe kusadisa bantu yina ke na yisi ya luyalu ya bawu. Kimfumu ya Nzambi mpe ke na misiku samu na kubumba mpe kusadisa bantu yina ke na yisi ya yawu. Misiku ya kimfumu ya Nzambi me lutila misiku ya bantu

      MUNTU LENDA YUFULA: “Kimfumu ya Nzambi kele yinki?”

      • Wa’ faso nge lenda pesa mvutu na kyuvu yayi?

      NA BUNKUFI

      Ya tsyeleka kimfumu ya Nzambi ke luyalu yina ke na mazulu, mpe ntangu fioti kaka me bikana, ya ke yala ntoto nyonso.

      Mambu ya kusimba

      • Banani ke yala na kimfumu ya Nzambi?

      • Samu na yinki kimfumu ya Nzambi me lutila bimfumu nyonso ya bantu?

      • Yinki Yehova me lomba na ba yina ke na yisi ya kimfumu ya yandi na kusala?

      Yina nge lenda sala

      SOSA KUZABA DYAKA

      Tala yinki Yesu zonzá na yina me tadila kisika yina kimfumu ya Nzambi kele.

      “Kimfumu ya Nzambi ke kwandi na kati ya bantima ya bantu?” (Tanga yawu na jw.org)

      Samu na yinki Bambangi ya Yehova ke soolá kutumama na nyonso yina kimfumu ya Nzambi ke zonzá, kasi ba ke tumamá ve na nyonso na bimfumu ya yinza?

      Beto vandá ya kukangama na kimfumu ya Nzambi (1:43)

      Longoka yinki Biblia ke zonzá na yina me tadila ba 144 000 yina Yehova me soola samu na kuyala na Yesu.

      “Banani ke kwenda na zulu?” (Tanga yawu na jw.org)

      Yinki natá kento mosi yina vandá na boloko, na kundima ti kaka ni Nzambi lenda yidika yinza yayi?

      “ J’ai découvert la solution à l’injustice ” (Réveillez-vous !, Novembre 2011)

      a Beto ke zonzila ndambu ya misiku yina, na kitini 3 ya buku yayi.

  • Kimfumu ya Nzambi ke na yalaka!
    Sepela na luzingu ya ntangu nyonso!—Masolo samu na kuzaba Biblia
    • Kileso 32. Yesu, Mfumu na mazulu me simba yinti ya kimfumu mpe ke na yalá ntoto.

      KILESO 32

      Kimfumu ya Nzambi ke na yalaka!

      Kimfumu ya Nzambi bandá kuyala na zulu na 1914. Ni na mvula yina mpe bilumbu ya nsuka ya luyalu ya bantu bandaka. Wa’ faso beto me zaba yawu? Beto tala faso bambikululu (prophéties) ya Biblia, bamambu mpe mavanga yina ke na lutá na yinza, banda 1914 ke na lakisaka yawu.

      1. Yinki bambikululu ya Biblia ke na zonzaka?

      Buku ya Danyele ke zonzá ti kimfumu ya Nzambi bandá kuyala na nsuka ya ntangu yina ba ke bokilá “bantangu sambwadi.” (Danyele 4:16, 17) Na manima ya ba siècle mingi, Yesu bokilá mpe ntangu yango “ntangu ya makanda”. (Luke 21:24) Faso beto ke tala yawu, bantangu sambwadi (7) yayi manisá na 1914.

      2. Wapi bamambu mpe wapi mavanga ke na lutá na yinza banda 1914?

      Bilandi ya Yesu yufulaka yandi: “Wapi ntangu mambu yina ke salama mpe wapi kidimbu ke lakisa mvwandulu ya nge mpe bilumbu ya nsuka ya yinza?” (Matayi 24:3, nwt) Yesu vutulá bawu ti, mambu mingi zolá salama na manima ya ntangu yina yandi zolá banda kuyala na zulu, na kimfumu ya Nzambi. Na kati ya bamambu yango, zolá vanda na ba guerres, bansatu, kuningana ya ntoto na bisika mingi. (Tanga Matayi 24:7.) Biblia zonzá mpe ti, mavanga ya bantu na “bilumbu ya nsuka” ke sala ti “bampasi ke lutila” na luzingu. (2 Timote 3:1-5) Nyonso yayi ke na salamá ya kulutila na yinza banda 1914.

      3. Samu na yinki bamambu ke na kumá kaka yimbi banda ntangu yina kimfumu ya Nzambi ke na yalaka?

      Ntangu fioti na manima ya kukuma Mfumu ya kimfumu ya Nzambi, Yesu nwaná na zulu na Satana mpe na bambazi ya yimbi. Yesu nungá bawu. Biblia ke zonzá ti “ba losaka [Satana] na ntoto kintwadi na bambazi ya yandi.” (Luzabusu 12:9, 10, 12) Satana ke na nkele mingi, samu yandi zaba ti kaka ntangu fioti me bikana, ba ke kufwa yandi. Ni na yawu, yandi ke na salaka yimbi na zulu ya ntoto nyonso na faso ya kulutila. Ni yina me sala ti yinza beba mingi! Kasi ntangu fioti kaka me bikana, kimfumu ya Nzambi ke katula bampasi nyonso yayi.

      SOSA KUZABA MBOTE-MBOTE

      Tala wa’ faso beto me zaba ti kimfumu ya Nzambi bandá kuyala na 1914, mpe yinki ya zola zonza samu na beto.

      4. Bambikululu ya Biblia me sadisa beto na kuzwa mvula ya 1914

      Tala VIDEO.

      VIDEO: Kimfumu ya Nzambi bandá kuyala na 1914 (5:02)

      Nzambi pesá ndosi na Nebukadenezare mfumu ya Babylone ya ntama. Ndosi yayi na faso Danyele bangulaka yawu, ke na lakisá ti ya vanda zonzila kimfumu ya Nebukadenezare na kimfumu ya Nzambi.—Tanga Danyele 4:17.a

      Tanga Danyele 4:20-26, mpe sadila bizizi yayi samu na kuzwa bamvutu na byuvu yina ke landa:

      • (A) Yinki Nebukadenezare talá na ndosi ya yandi?—Tala baverse 20, 21.

      • (B) Yinki zolá kumina na yinti?—Tala verse 23.

      • (C) Yinki zolá salama na nsuka ya “bantangu sambwadi”?—Tala verse 26.

      Faso yinti ya ndosi yayi me kwelana na kimfumu ya Nzambi

      MBIKULULU (Danyele 4:20-36)

      Kimfumu

      (A) Yinti mosi ya nene

      Yinti mosi ya nene mingi.

      Kimfumu me suka ntete

      (B) “Beno zenga yinti yina,” mpe beno bika “bantangu sambwadi luta”

      Ba me zenga yinti mpe ba me kanga bisengo na ndambu ya yawu yina me bikana.

      Ba me vutula kimfumu

      (C) “Kimfumu ke vanda dyaka ya nge”

      Yinti mosi ya nene mingi.

      Na kulungana ya ntete ya mbikululu . . .

      • (D) Yinti kele kifwani ya nani?—Tala verse 22.

      • (E) Wa’ faso kimfumu ya yandi suká ntete?—Tanga Danyele 4:29-33.

      • (F) Yinki kuminá Nebukadenezare na nsuka ya “bantangu sambwadi”?—Tanga Danyele 4:34-36.

      KULUNGANA YA NTETE

      Kimfumu

      (D) Nebukadenezare, mfumu ya Babylone

      Mfumu Nebukadenezare na lulendo nyonso yandi me vukisa maboko.

      Kimfumu me suka ntete

      (E) Na manima ya 606 T.N.B. Nebukadenezare lawukaka, yandi lendá dyaka ve na kuyala na kati ya bamvula sambwadi

      Nebukadenezare me lawuka mpe yandi ke na kudyá matiti faso kibulu.

      Ba me vutula kimfumu

      (F) Nebukadenezare me beluka, mpe yandi me banda dyaka kuyala

      Mfumu Nebukadenezare ke ya kutelama, mpe yandi me nanguna maboko na zulu.

      Na kulungana ya zole ya mbikululu . . .

      • (G) Yinti ke na lakisá nani?—Tanga 1 Bansangu 29:23.

      • (H) Wa’ faso luyalu yango manisá ntete? Wa’ faso beto me zaba ti, ya vandá kaka faso yina tii ntangu Yesu vandá awa na ntoto?—Tanga Luke 21:24.

      • (I) Wapi ntangu mpe kisika luyalu yayi bandá dyaka?

      KULUNGANA YA ZOLE

      Kimfumu

      (G) Luyalu ya bamfumu ya Izraele vandá kifwani ya luyalu ya Nzambi

      Bamfumu yina me yala na Izraele kele ya kuvanda na manima ya bampangi na bakiti ya kimfumu. Lumière ke na ngengá na zulu ya bawu.

      Kimfumu me suka ntete

      (H) Ba me mwangisa Yeruzalemi, bamfumu ya Izraele ke yala dyaka ve tii na nsuka ya bamvula 2 520

      Ba yoká Yeruzalemi ya ntama na 607 T.N.B. Na manima bamvula 2520 lutaka.

      Ba me vutula kimfumu

      (I) Yesu me kuma mfumu ya kimfumu ya Nzambi na zulu

      Kubanda 1914, Yesu ke na yalá ntoto katuka na mazulu, kisika yina yandi ke vandaka. Lumière ke na ngengá na zulu ya yandi.

      Bamvula yikwa ke na kati ya bantangu sambwadi?

      Ya ke na bitini ya Biblia yina ke sadisá beto na kuzaba mbote-mbote bitini ya nkaka ya Biblia. Na kifwani, buku ya Luzabusu ke zonzá ti bantangu tatu na ndambu ke pesá bilumbu 1260. (Luzabusu 12:6, 14) Bantangu sambwadi kele bilumbu 1260 bambala zole (1260x2). Ni yina ke pesá bilumbu 2520. Ntangu ya nkaka, Biblia ke sadilá kilumbu mosi samu na kuzonzila mvula to année mosi. (Ezekiele 4:6) Ni faso yina ya kele na mbikululu ya bantangu sambwadi na buku ya Danyele—bantangu sambwadi yina zola zonza bamvula 2520.

      5. Na 1914 yinza sobaka

      Tala VIDEO.

      VIDEO: Na 1914 yinza sobaka (1:10)

      Yesu zonzá wapi mutindu yinza zolá vanda na manima ya ntangu yina yandi zolá banda kuyala. Tanga Luke 21:9-11, mpe na manima beto zonzila kyuvu yayi:

      • Na bamambu nyonso yina ba me zonzila na kati ya baverse yayi, wapi yina nge me tala ti ya ke na lunganá bubu yayi?

      Ntumwa Polo zonzilá mavanga ya bantu na bilumbu ya nsuka ya luyalu ya bantu. Tanga 2 Timote 3:1-5, mpe na manima beto zonzila kyuvu yayi:

      • Wapi mavanga yina ba me zonzila awa nge ke na talá na bantu bubu yayi?

      Collage: Bamambu yina ke na lutá na yinza na bilumbu ya nsuka. 1. Mfumu ya bambulumbulu ke na kugangá maboko na zulu. 2. Bayinzo me mwangana na manima ya kuningana ya ntoto. 3. Ba avions ya bambulumbulu. 4. Bantu me lwata ba masques mpe ke na tambulá na ngaanda. 5. Bantu ya ntima ya yimbi me tula tiya na Tour jumelle ya bwala ya New York. 6. Bakala mosi ke na sadilá dyamba. 7. Bakala mosi ke na kugangá na zulu ya kento ya yandi. 8. Mitindu mingi ya drogue mpe ya malafu. 9. Bakento zole ya ba lesbiennes ke na baká bafoto. 10. Muntu mosi ke na tulá ngwasuma, mpe bantu mingi ke na binaka. 11. Bandi mosi me simba bouteille ya tiya.

      6. Lakisa ti nge ke na kwikilá ti kimfumu ya Nzambi ke na yalaka

      Tanga Matayi 24:3, 14, mpe na manima beto zonzila byuvu yayi:

      • Wapi kisalu ya mfunu ke na lakisá ti kimfumu ya Nzambi ke na yalaka?

      • Wa’ faso nge mpe lenda tula diboko na kisalu yango?

      Luyalu ya kimfumu ya Nzambi bandá, mpe ntama mingi ve, ya ke yala ntoto nyonso. Tanga Baebre 10:24, 25, mpe na manima beto zonzila kyuvu yayi:

      • Yinki mosi na mosi na beto me bonga kusala samu “Kilumbu ya Mfumu me kuma pene-pene”?

      Collage: 1. Mulongoki ya Biblia ke na lukutakanu ya Bambangi ya Yehova. 2. Mulongoki yango ke na samuná nsangu ya mbote na muntu yina yandi me zaba.

      Kana nge me longoka mambu yina lenda sadisa, to lenda vuukisa bantu ya nkaka, yinki ya ke nata nge na kusala?

      MUNTU LENDA YUFULA: “Samu na yinki Bambangi ya Yehova ke zonzilá mingi 1914?”

      • Wapi mvutu nge ke pesa?

      NA BUNKUFI

      Bambikululu ya Biblia mpe bamambu yina ke na salamá na kati ya yinza, ke na lakisá ti kimfumu ya Nzambi ke na yalaka. Beto ke lakisá ti beto ke kwikilá na yawu, na kusamuná nsangu ya mbote yayi mpe na kuvukaná na bampangi na balukutakanu ya kimvuka.

      Mambu ya kusimba

      • Yinki salamá na nsuka ya bantangu sambwadi yina Danyele zonzilaka?

      • Samu na yinki nge me ndima ti kimfumu ya Nzambi bandá kuyala na 1914?

      • Wapi mutindu nge lenda lakisa ti nge ke na ndimá ti kimfumu ya Nzambi ke na kuyalaka?

      Yina nge lenda sala

      SOSA KUZABA DYAKA

      Bantu ya mayela me zonzila mambu yina me soba na yinza banda 1914.

      “ Depuis quand ce déclin brutal ” (Réveillez-vous !, Avril 2007)

      Tala faso mbikululu yina kele na Matayi 24:14 me soba luzingu ya bakala mosi.

      “ J’aimais le baseball plus que tout au monde ! ” (La Tour de Garde no 3 2017)

      Wa’ faso beto me zaba ti mbikululu yina ke na Danyele kikapu 4 ke na zonzilá kimfumu ya Nzambi?

      “ Quand le Royaume de Dieu a-t-il commencé à régner ? (1re Partie) ” (La Tour de Garde, 1er Octobre 2014)

      Yinki ke na lakisá ti “bantangu sambwadi” yina Danyele kikapu 4 zonzilá, manisá na 1914?

      “ Quand le Royaume de Dieu a-t-il commencé à régner ? (2e Partie) ” (La Tour de Garde, 1er Novembre 2014)

      a Tala masolo zole yina ke na nsuka ya kitini “Sosa kuzaba dyaka” na kileso yayi.

  • Bambote yina kimfumu ya Nzambi ke nata na toto
    Sepela na luzingu ya ntangu nyonso!—Masolo samu na kuzaba Biblia
    • Kileso 33. Bantu ke na kati ya paradiso na zulu ya ntoto.

      KILESO 33

      Bambote yina kimfumu ya Nzambi ke nata na ntoto

      Kimfumu ya Nzambi ke na kuyalaka. Ntangu fioti me bikana, ya ke bongisa bamambu na zulu ya ntoto. Na yawu, beto zonzila bambote yina kimfumu ya Nzambi ke nata na ntoto.

      1. Wapi mutindu kimfumu ya Nzambi ke vutula kizunu mpe lunungu na zulu ya ntoto?

      Yesu, mfumu ya kimfumu ya Nzambi, ke kufwa bantu ya yimbi na baluyalu ya bantu na mvita ya Armagedoni. (Luzabusu 16:14, 16) Na ntangu yina, nsilulu yayi ke lungana mbote-mbote: “Ntangu fioti kaka me bikana, bantu ya yimbi ke vanda dyaka ve.” (Nkunga 37:10) Na nzila ya kimfumu, Yesu ke fulusa ntoto na kizunu mpe lunungu.—Tanga Izaya 11:4.

      2. Wa’ faso luzingu ke vanda ntangu luzolo ya Nzambi ke salama na zulu ya ntoto?

      Ntangu kimfumu ya Nzambi ke yala, “bantu ya lunungu ke baka ntoto mpe ba ke zinga ntangu nyonso na zulu ya yawu.” (Nkunga 37:29) Kanisa wa’ faso luzingu ke vanda na zulu ya ntoto ntangu bantu nyonso ke vanda ya kulunga, ke zola Yehova mpe ke zola bampangi ya bawu! Ata muntu ke kubwa dyaka maladi, mpe bantu nyonso ke zinga ntangu nyonso.

      3. Yinki kimfumu ya Nzambi ke sala na manima ya kufwa bantu ya yimbi?

      Na manima ya kufwa bantu ya yimbi, Yesu ke yala bamvula 1 000. Na ntangu yina, yandi na ba 144 000 yina ke yala na yandi, ke sadisa bantu na zulu ya ntoto na kukuma na nzutu yina ke vanda dyaka ve na masumu. Na nsuka ya luyalu ya Yesu, ntoto nyonso ke kuma paradiso, mpe bantu nyonso ke vanda na kilengi samu ba ke tumamá na Yehova. Na manima, Yesu ke vutula kimfumu na Tata ya yandi, Yehova. Na ntangu yina nkumbu ya Nzambi, Yehova “ke vanda ya Santu” na mutindu yina ya vandá nabunu ya salama. (Matayi 6:9, 10, nwt-MK) Ya ke talana pwelele ti ni Yehova kele mfumu ya kulutila mbote, yina ke kipeke bantu yina ke na yisi ya luyalu ya yandi. Yehova ke kufwa Satana, bambazi ya yimbi, mpe ba yina nyonso ke soola kutumama ve na kimfumu ya yandi. (Luzabusu 20:7-10) Mambu nyonso ya mbote yayi yina kimfumu ya Nzambi ke nata na ntoto, ke vanda samu na ntangu nyonso.

      SOSA KUZABA MBOTE-MBOTE

      Beto tala samu na yinki beto lenda kwikila ti Nzambi ke sadila kimfumu ya yandi, samu na kulungisa bansilulu nyonso ya Biblia na yina me tadila bilumbu yina ke kwiza.

      4. Kimfumu ya Nzambi ke kufwa baluyalu ya bantu

      “Muntu ke na yalaka muntu samu na kutalisa yandi mpasi.” (Longi 8:9) Na nzila ya kimfumu, Yehova ke yidika yimbi nyonso yina muntu ke na salá na mpangi muntu.

      Tanga Danyele 2:44 na 2 Batesalonika 1:6-8, mpe na manima beto zonzila byuvu yayi:

      • Yinki Yehova na mwana ya yandi, Yesu, ke sala na ba yina ke na yalá bubu yayi, mpe na ba yina ke nwaniná lutumu ya bawu?

      • Wa’ faso mambu yina nge me longoka na yina me tadila Yehova na Yesu ke na ndimisá nge ti nyonso yina ba ke sala ke vanda ya kulunga?

      Bantu ke na kati ya paradiso na zulu ya ntoto.

      5. Yesu ke mfumu ya kulutila mbote

      Yesu ke nata bambote mingi na bantu yina yandi ke yala. Tala VIDEO samu na kutala ti na ntama, Yesu lakisá ti yandi me zola mpe yandi ke na ngolo yina Yehova pesá yandi, samu na kusadisa bantu.

      VIDEO: Yesu lakisá mambu yina kimfumu ya Nzambi ke lungisa (1:13)

      Ntangu Yesu vandá na ntoto, yandi lakisá bifwani ya bamambu yina kimfumu ya Nzambi ke lungisa. Na bambote nyonso yina beto ke zonzila, wapi yina nge me zola mingi ti ya salama? Na yawu, tanga baverse yina ba me pesa awa.

      NA ZULU YA NTOTO, YESU . . .

      KATUKA NA ZULU, YESU KE . . .

      • yidika mambu nyonso yina bebá na zulu ya ntoto.—Izaya 35:1, 2.

      • manisa bansatu na kati ya yinza.—Nkunga 72:16.

      • katula maladi.—Izaya 33:24.

      6. Luzingu ke vanda kitoko na yisi ya kimfumu ya Nzambi

      Kimfumu ya Nzambi ke lungisa bamambu yina Nzambi kanisá na kusala ntangu yandi yidiká bantu. Ba ke zinga ntangu nyonso na zulu ya ntoto yina ke kuma paradiso. Tala VIDEO samu na kutala faso Yehova ke sadila mwana ya yandi Yesu, samu na kulungisa luzolo ya yandi.

      VIDEO: Faso luzingu ke vanda na bilumbu yina ke kwiza (4:38)

      Tanga Nkunga 145:16, mpe na manima beto zonzila kyuvu yayi:

      • Yinki ya ke na salá nge na kuzaba ti Yehova ke lungisa “bansatu ya konso kima yina ke na luzingu”?

      BANTU YA NKAKA KE ZONZAKA: “Kana beto nyonso sala kintwadi bamambu ke bonga na yinza.”

      • Wapi bamambu kimfumu ya Nzambi ke yidika yina baluyalu ya bantu lenda yidika ve?

      NA BUNKUFI

      Kimfumu ya Nzambi ke lungisa luzolo ya Nzambi. Yandi ke kumisa ntoto nyonso paradiso, kisika yina bisadi ya Yehova ke zinga ntangu nyonso.

      Mambu ya kusimba

      • Wa’ faso kimfumu ya Nzambi ke kumisa nkumbu ya Nzambi santu?

      • Samu na yinki beto lenda vanda na kiminu ti, kimfumu ya Nzambi ke lungisa bansilulu nyonso ya Biblia?

      • Na bamambu nyonso yina kimfumu ya Nzambi ke lungisa, wapi yina nge ke na sosá ya salama na mbangu?

      Yina nge lenda sala

      SOSA KUZABA DYAKA

      Tanga yinki zola zonza Armagedoni.

      “Armagedoni kele yinki?” (Tanga yawu na jw.org)

      Tala bamambu yina ke salama na ntangu yina Yesu bokilaka “mpasi ya nene.”—Matayi 24:21.

      “Mpasi ya nene ke yinki?” (Tanga yawu na jw.org)

      Tala faso dikanda mosi ke na kanisá na luzingu yina ba ke vanda na yawu na paradiso.

      Kanisa ti nge ke na paradiso (1:50)

      Na disolo “ J’étais tourmenté par de nombreuses questions, ” tala muntu mosi yina vanda sosa kusoba bamambu na kati ya politique, kuzwá bamvutu na byuvu ya yandi.

      “ La Bible transforme des vies ” (La Tour de Garde, 1er Janvier 2012)