Luvaiku

39 Bavangidi mvuatu miatoma tungwa miasadila vana fulu kiavauka, bavangidi mio mu nsinga mia bule, nsinga mia mika mia se kia nduwa ye nsinga mia mbwaki akongola.*+ Bavangidi mvuatu miavauka mu kuma kia Arone,+ wauna o Yave kakanikina kwa Mose.

2 Ovangidi kidukula+ muna nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola ye nsinga miasietwa mia lino yambote. 3 Batutidi wolo yo papika wo, bazengele yo mu nsinga-nsinga yo tunga mio kumosi ye nsinga mia bule, nsinga mia mika mia se kia nduwa, nsinga mia mbwaki akongola* ye nsinga mia lino yambote. Kiviengeselo mu lekwa yayi yawonso. 4 Bavangidi tenda ya mavembo ina yalamikwa vana kidukula, e tenda yayikakesa e nsuka zole za konso vembo. 5 E mponda ina yasimbininanga e kidukula,+ mu lekwa yau imosi yavangilwa: nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote, wauna o Yave kakanikina kwa Mose.

6 I bosi, basidi matadi ma onise muna simbininua ya wolo, bavoswene mo e nkumbu za wan’a Isaele,* wauna uvosonuenuanga e dimbu.+ 7 Osidi matadi vana tenda ya kidukula ina vana mavembo, makedi se matadi ma luyindulu kwa wan’a Isaele,+ wauna o Yave kakanikina kwa Mose. 8 I bosi, ovangidi babu kia tulu+ muna umbangu wawonso nze una wavangilwa kidukula, ovangidi kio muna nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote.+ 9 E ndambu zau yá zafwanana vava kibundikilu. E babu kia tulu bavangidi, vava kibundikilu kikedi yo lutama lumosi* muna lambuka ye lutama lumosi muna yalumuka. 10 Bavangidi mo nlonga nyá mia matadi. Muna nlonga wantete: tadi dia rubi, dia topaze ye dia emeraude. 11 Muna nlonga wanzole: tadi dia tokwase, dia safire ye dia yasepi. 12 Muna nlonga wantatu: tadi dia lesheme,* dia angate ye dia ametisite. 13 Muna nlonga wa nyá: tadi dia kerusolito, dia onise ye dia yade. Basidi mo muna simbininua ya wolo. 14 O matadi makedi mun’owu wa nkumbu 12 za wan’a Isaele. E nkumbu zivosweno nze dimbu, konso nkumbu yasunzulanga kanda dimosi muna makanda 12.

15 I bosi, bavangidi ngonzi zasietwa za wolo walembi sangwa lekwa mu kuma kia babu kia tulu.+ 16 Bavangidi simbininua yole ya wolo ye nlunga miole mia wolo, basidi e nlunga miole muna konko yole ya babu kia tulu. 17 I bosi, bakangidi e nsinga miole mia wolo muna nlunga miole mina muna konko ya babu kia tulu. 18 Bakotese nsuka zole za nsinga miau miole muna simbininua yau yole, basidi yo vana tenda ya mavembo ma kidukula, oku ntwala. 19 I bosi, bavangidi nlunga miole mia wolo, basidi mio muna nsuka zau zole za ndambu ibundikilu ya babu kia tulu, eyi italanene ye kidukula.+ 20 Bavangidi diaka nlunga miole mia wolo yo sia mio oku ntwal’a kidukula, vana yand’a tenda yole ya mavembo, lukufi ye fulu kiayikanena, vana ntandu a mpond’a kidukula. 21 I bosi, bakangidi nsing’a bule tuka muna nlunga mia babu kia tulu yamuna nlunga mia kidukula muna sikidisa e babu kia tulu vana fulu kiandi, vana ntandu a kidukula, vana ntandu a mponda, wauna o Yave kakanikina kwa Mose.

22 I bosi, ovangidi yunga kiakondwa moko kia kidukula, kiawonso ovangidi kio muna nsinga mia bule, salu kia nkwa umbangu.+ 23 E vundu dia yunga dia kotesela o ntu dikedi vana kati. E vundu dikedi nze dia kinkutu kia sengwa.* E vundu dikedi yo mvinda muna kinzieta kiandi kiawonso, kimana dialembi tiazuka. 24 I bosi, bavangidi nganata* muna nswiku a yunga kiakondwa moko, bavangidi zo mu nsinga mia bule, nsinga mia mika mia se kia nduwa ye nsinga mia mbwaki akongola,* miawonso misietelo kumosi. 25 Bavangidi ngunga za wolo walembi sangwa lekwa, balandakese zo ye nganata* muna kinzieta kiawonso kia nswiku a yunga kiakondwa moko. Balandakese nganata ye ngunga za wolo; 26 balandakese zo, ngung’a wolo ye nganata,* ngung’a wolo ye nganata, muna kinzieta kiawonso kia nswiku a yunga kiakondwa moko, eki kiavuatwanga muna salu kia kinganga, wauna o Yave kakanikina kwa Mose.

27 Bavangidi Arone yo wan’andi e mvuela za nsinga mia lino yambote, salu kia nkwa umbangu.+ 28 Bavangidi mpu a nlele+ muna nsinga mia lino yambote, fukilwa ya ntu+ muna lino yambote, makupe*+ muna nsinga miasietwa mia lino yambote 29 ye mponda muna nsinga miasietwa mia lino yambote, nsinga mia bule, nsinga mia mika mia se kia nduwa ye nsinga mia mbwaki akongola,* wauna o Yave kakanikina kwa Mose.

30 I bosi, bavangidi lukandala lwakezimanga lwa wolo walembi sangwa lekwa, i sia vo, e sinsu kiavauka kia kukiyekola.* Nze una uvosonuenuang’e dimbu, bavoswene mo vo: “O vauka kwa Yave.”+ 31 Bakangidi nsing’a bule muna lukandala kimana balamika lo muna mpu a nlele, wauna o Yave kakanikina kwa Mose.

32 I wau wuwu wafokokela e salu kiawonso kia saba, i sia vo, saba kia wananina; Aneyisaele bavangidi yawonso ina o Yave kakanikina kwa Mose.+ I una kikilu bavangidi.

33 I bosi, batwese e saba+ kwa Mose, nlele mia saba+ ye salanganu yandi yawonso: kangilwa,+ valanganza ya mabaya,+ mbindi,+ malunzi ye telamesenua yandi;+ 34 fukwa kiandi kia nkanda mia mameme miavubwa mu se kia mbwaki,+ fukwa kia nkanda mia takasi,* rido yakakidila;+ 35 nkel’a Kimbangi ye mbindi za natina e nkela+ ye fukwa;+ 36 meza, sadilwa yandi yawonso+ ye mbolo za lutambiku; 37 zangikilwa kia minda kia wolo walembi sangwa lekwa, minda miandi,+ i sia vo, nlong’a minda, sadilwa yandi yawonso+ yo mazi ma minda;+ 38 ziku+ dia wolo, mazi mankusa,*+ ndumbu ansunga,+ rido+ ya mwelo a saba; 39 ziku dia nsongo+ ye yangilwa yandi ya nsongo, mbindi zandi za natina,+ sadilwa yandi yawonso,+ longa diampwena ye vuandisilwa kiandi;+ 40 rido a yanzala, malunzi ye telamesenua yandi,+ rido+ ya mwelo a yanzala, nsinga miandi ye mpalu zandi+ ye sadilwa yawonso ya salu kia saba, i sia vo, saba kia wananina; 41 mvuatu miatoma tungwa miasadila muna nzo avauka, mvuatu miavauka mu kuma kia Arone wa nganga+ ye mvuatu mia wan’andi mu sala se anganga.

42 Aneyisaele bavangidi e salu kiawonso, mun’owu wa mambu mawonso Yave kakanikina kwa Mose.+ 43 Vava Mose kafimpa e salu kiawonso basala, omwene vo bavangidi kikilu wauna o Yave kakanikina; Mose ubasambwidi.