Estere
3 Kuna kwalanda, Akasurose wa Ntinu otundidikidi Amani+ wa mwan’a Kamedata wa Ngangi,+ unzangwidi yo sia kunda kiandi vana ntandu akuluntu awonso ana bakala yandi.+ 2 Ntaudi zawonso za ntinu zina zakala vana vitu dia ntinu, zavumbamenanga yo fukamena Amani, kadi i una ntinu kakanikina. Kansi Modekai kamvumbamenanga ko ngatu kumfukamena. 3 Muna diadi, e ntaudi za ntinu zina zakala vana vitu dia ntinu, bayuvuidi Modekai vo: “Ekuma okolamenanga nkanikinu a ntinu?” 4 I wau bamvovesanga lumbu ke lumbu, kansi kabawilanga ko. Basamuna dio kwa Amani kimana bamona kana vo e fu kia Modekai kiyambulwilwa;+ kadi wabazayisa vo yandi Nyuda.+
5 Amani vava kamona vo Modekai kazola kumvumbamena ko ngatu kumfukamena, Amani ofungidi kikilu makasi.+ 6 Kansi wayindula vo ke Modekai kaka ko ofwete vondwa,* kadi banzayisa mambu ma nkangu a Modekai. Dianu vo Amani wavava fwasa Ayuda awonso ana bakala muna kintinu kiawonso kia Akasurose, i sia vo, nkangu awonso wa Modekai.
7 Muna ngonde yantete, i sia vo, ngonde a Nisani,* muna mvu wa 12+ wa luyalu lwa Akasurose wa ntinu, batele Pure,+ (i sia vo, Nkas’a Mienze), vana vena Amani kimana bazaya e lumbu ye ngonde, e nkas’a mienze yabwa muna ngonde ina ya 12, i sia vo, ngonde Adare.*+ 8 Amani ovovese Akasurose wa Ntinu vo: “Vena yo nkangu umosi wamwangana muna nkangu+ mia mvivu miawonso mia kintinu kiaku,+ e nsiku miau miaswaswana ye nsiku mia nkangu miawonso; ke belundanga nsiku mia ntinu ko, avo ubayambwidi mfwilu kaka betwasa kwa ntinu. 9 Avo diyangidikidi o ntinu, yambula vasonama nsiku vo bafwaswa. Ozevo 10.000 ma talanta* za palata ifuta kwa mbanda-mbanda kimana basia zo muna malundilu ma ntinu.”*
10 Ntinu okatwidi mpeto andi+ muna koko yo vana yo kwa Amani+ wa mwan’a Kamedata wa Ngangi+ wa mbeni a Ayuda. 11 O ntinu ovovese Amani vo: “E palata yo nkangu uveno kwa ngeye, vanga konso dina omwene vo diambote.” 12 Dianu vo, asoneki a ntinu+ babokeleso muna lumbu kia 13 kia ngonde antete. Basonekene+ mawonso kakanikina Amani kuna kwa nkumbi za ntinu ye nguvulu za mvivu ye akuluntu a nkangu miawonso, kuna kwa konso mvivu muna mpil’au yasonekena, kuna kwa konso nkangu muna nding’au. Masonekwa muna nkumbu a Akasurose wa Ntinu yo siwa e dimbu muna mpeto a ntinu.+
13 E nkanda mitwikilu vana moko m’anati a nsangu muna mvivu miawonso mia ntinu yo nkanikinu wafwasa, vonda yo fukisa Ayuda awonso ye aleke ye ambuta, yingiana-ngiana ye akento muna lumbu kimosi, kia 13 kia ngonde ya 12, i sia vo, ngonde Adare+ yo sanza mavua mau.+ 14 Diasikidiswa vo mambu ma nkanda makala se nsiku muna mvivu miawonso yo samunua kwa nkangu miawonso, kimana bakubama muna lumbu kiakina. 15 Anati a nsangu bavaikidi mu nzaki zawonso+ muna nkanikinu a ntinu; o nsiku usilu muna lûmbu lwa Susani.*+ O ntinu yo Amani bavuende kimana banua, kansi mavuanga makota muna mbanz’a Susani.*