Lusengomono kwa Yoane
5 Mbwene vana koko kwalunene kwa Ndiona ovuende vana kunda,+ nkanda wasonama ndambu zau zole,* wazingwa yo bindikwa ye dimbu nsambwadi. 2 Mbwene mbasi una vo nkwa ngolo ovovanga muna nding’angolo vo: “Nani ofwene zingumuna nkanda yo katula e dimbu yandi?” 3 Kansi ke vakedi mosi ko kuna zulu yovo ova ntoto ngatu muna nsi a ntoto olenda zingumuna nkanda yovo tala mana masonama mo. 4 Ndididi kikilu kadi ke vasolokele muntu ko ofwene zingumuna nkanda yovo tala mana masonama mo. 5 Kansi mosi muna akuluntu umpovese vo: “Yambula dila. Tala! E Nkosi a kanda dia Yuda,+ wa mwanzi+ a Davidi,+ osundidi+ kimana kazingumuna nkanda yo katula dimbu yau nsambwadi.”
6 Mbwene vana kati kwa kunda ye vangwa yá yamoyo ye vana kati kwa akuluntu,+ vatelamene mwan’a meme+ una nze yandi wavondwa,+ wina ye mpoka nsambwadi yo meso nsambwadi, o meso mama mesunzulanga mianda nsambwadi mia Nzambi+ mina mitumwanga omu nza yawonso. 7 Wizidi vana vau, obongele wo vana koko kwalunene kwa Ndiona ovuende vana kunda.+ 8 Vava kabongele o nkanda, e vangwa yá yamoyo ye akuluntu 24+ bafukamene vana ndose a Mwan’a meme, konso nkuluntu okedi ye kokolo ye pidi kiawolo kiazala ye ndumbu. (E ndumbu sambu ya avauki isunzulanga.)+ 9 Bayimbidi nkunga wampa,+ oku vo: “Ngeye ofwene bonga o nkanda yo katula e dimbu yandi, kadi wavondwa, muna menga maku i wasumbila Nzambi o nkangu+ muna makanda mawonso ye ndinga ye nkangu ye zula,+ 10 ubakitwidi se atinu+ ye anganga kuna kwa Nzambi eto,+ bayala e nza.”+
11 Vava ntadidi, ngwidi ndinga za mbasi zayingi muna nzunguluk’a kunda ye vangwa yamoyo ye akuluntu, o lutangu lwau yazi ye yazi ye mafunda ye mafunda,+ 12 bavovele muna nding’angolo vo: “Mwan’a meme ona wavondwa+ ofwene tambula nkuma yo umvuama ye ngangu ye ngolo yo zitu yo nkembo ye nsambu.”+
13 Ngwidi vangwa yawonso kuna zulu, ova ntoto ye muna nsi a ntoto+ ye muna kalunga ye yawonso ina mo, ivovele vo: “Kuna kwa Ndiona ovuende vana kunda+ ye kwa Mwan’a meme,+ nsambu yo zitu+ yo nkembo yo nkuma yamu mvu ya mvu.”+ 14 E vangwa yau yá yamoyo ivovele vo: “Amen!” akuluntu bafukamene yo sambila Nzambi.