Amose
3 “Nuwá e diambu kavovele o Yave mu kuma kieno, e yeno nkangu a Isaele, mu kuma kia nzo yawonso ina yavaikisa muna nsi ya Engipito:
2 ‘Yeno kaka nzeye muna makanda mawonso ma nza.+
Ekiaki i kuma ikunutumbila muna bi weno wawonso.+
3 Nga wantu wole bekangala kumosi avo ke batekele wizana ko vo bawanana?
4 Nga nkosi muna mfinda okwita avo ke vena bulu ko kevava baka?
Nga mwan’a nkosi* owuna vana swekameno diandi avo kabakidi bulu ko e?
5 Nga nuni olenda bakama muna ntambu avo ke una ye sokolo ko e?*
Nga ntambu ubasukidi ulenda vuetama avo ke ubakidi bulu ko e?
6 Avo e mpungi isikilu muna mbanza, nga wantu ke bezakama ko?
Avo sumbula kibwidi muna mbanza, nga ke Yave ko otwese kio?
7 Kadi, o Mfumu Yave ke vanganga diambu ko
Lembi sengomona e mbumb’andi kwa selo yandi, angunza.+
8 E nkosi ikwitidi!+ Nani olembi mona wonga?
Mfumu Yave ovovele! Nani olembi sakula?’+
9 ‘Nusamuna dio muna nzo zangolo za Asedode,
Muna nzo zangolo za nsi a Engipito.
Nuvova vo: “Nukutakana mu nuanisa miongo mia Samaria;+
Nutala nkindu vana kati kwandi
Yo luvunu luvangamanga vana kati kwandi.+
10 Kadi ke bazeye vanga edi diansongi ko,” u kavovele o Yave,
“Ana belundanga nsoki ye lufwasu muna nzo zau zangolo.”’
11 I dianu vo, i wau wuwu kavovele o Mfumu Yave,
‘O mbeni ozunga e nsi,+
Osukisa o nkum’aku,
E nzo zaku zangolo sanzwa zisanzwa.’+
12 I wau wuwu kavovele o Yave,
‘Wauna mvungudi kekutumunanga malu mole ma meme yovo tini kia kutu kwa meme muna nu’a nkosi,
I una ukutumwinua nkangu a Isaele,
Ana bavuende owau muna Samaria vana mfulu ye kunda yambote-mbote.’*+
13 ‘Nuwá, nulukisa nzo a Yakobo,’* u kavovele Mfumu Yave wa Nzambi a vu.
14 ‘Kadi, muna lumbu kina itumba Isaele muna kuma kia ukolami wandi wawonso,+
Itumba mpe maziku ma Betele;+
E mpoka za ziku zitololwa yo sotoka vana ntoto.+
15 Bwisa ibwisa e nzo za sivu ye nzo za mvula.’