Wanzole wa Petelo
1 Simone Petelo, wa ntaudi ye ntumw’a Yesu Kristu, kuna kw’awana batambula lukwikilu lwantalu nze i lweto,* muna unsongi wa Nzambi eto ye wa Mvuluzi eto Yesu Kristu:
2 Yambula e nsambu ye luvuvamu lwawokela koko nuina muna zayi wasikila+ wa Nzambi yo wa Yesu wa Mfumu eto, 3 kadi o nkum’a unzambi wandi watuvana* mawonso mekutusadisanga kimana twazinga yo vumi wa Nzambi muna zayi wasikila wa Ndiona watubokela+ muna nkembo andi ye unsongi. 4 Muna mambu mama i katuvanina* nsilu miamfunu ye mianene,+ kimana muna mambu mama nuakala e ntwadi muna unzambi wandi,+ nuatina mavangu mambi ma nza metukanga muna zolela yambi.*
5 Muna kuma kiaki, nuvanga e ngolo+ nuakudikila unsongi muna lukwikilu lweno;+ muna unsongi weno, zayi;+ 6 muna zayi, volo; muna volo,+ luzindalalu; muna luzindalalu, vumi wa Nzambi;+ 7 muna vumi wa Nzambi, nzolani a ungudi; muna nzolani a ungudi, zola muna wantu awonso.+ 8 Kadi avo mambu mama mena muna yeno yo kwamanana wokela, ke nukala miolo ko yovo lembi yima mbongo+ mun’owu wa zayi wasikila wa Mfumu eto Yesu Kristu.
9 Kadi ndiona okondelo mambu mama mpofo kwandi, ozimini meso mandi muna ntemo,*+ ovilakene luveleleso lwandi muna masumu+ mandi mankulu. 10 Dianu vo, ampangi nutoma sia sungididi nuasikila muna mboka+ ye nsolwa ina nuasolwa, kadi avo nukwamanana vanga mambu mama, ke nufunga nkutu ko.+ 11 Muna mpila yayi, nusambulwa kikilu* yo kota muna Kintinu kia mvu ya mvu+ kia Mfumu eto ye Mvuluzi Yesu Kristu.+
12 Ekiaki i kuma nzolele kunusungamesa mambu mama ntangwa zawonso, kana una vo nukizayidi mo yo toma sikidiswa muna ludi kina omo yeno. 13 Kansi ekolo ngina omu saba kiaki,*+ mbadikidi dio vo diansongi edi dia kunusikamesa muna lususumunu,+ 14 wau nzeye wo vo e saba kiame ke kolo ko kikatulwa, wauna o Mfumu eto Yesu Kristu katoma dio kunkiesesela.+ 15 Ikwamanana vanga mawonso kimana vava ikwenda kwame, yeno kibeni nualenda sungamena* mambu mama.
16 Ke twalanda tusansu twasokelwa mu ngangu za wantu ko vava twanusamunuina o nkuma ye ngiz’a Mfumu eto Yesu Kristu, kansi twakala se mbangi za nkembo andi.+ 17 Kadi watambula o zitu yo nkembo kwa Nzambi wa Se. Ediadi diavangama vava e nto a nkembo anene kamvovesa e mvovo emi: “Ndioyo i Mwan’ame anzolwa, ona iyangalelanga.”+ 18 Elo, oyeto twawá e mvovo miami miatuka kuna zulu vava twakala yandi vana mongo avauka.
19 Dianu vo, tuna ye diambu diasakulwa ditomene sikila, diambote nuvanganga wau nutoma dio sianga e sungididi nze mwinda+ ukezimanga vana fulu kia tombe (yavana kukia o kuma ye mpaik’a ntetembw’a nkielelo+) omu ntima mieno. 20 Kadi, vana ntandu a mawonso, oyeno nuzeye wo vo ke vena ungunza wa Sono ko watuka muna ngindu za muntu. 21 Kadi o ungunza ke wasakulwilwa mu luzolo lwa muntu ko,+ kansi o wantu bavova mana matuka kwa Nzambi wauna bafidilwa kwa mwand’avelela.+