Wantete wa Paulu Kuna kwa Esi Korinto
11 Nuntanginina, wauna mono itangininanga Kristu.+
2 Inusanisini wau vo muna mambu mawonso nukunsungamenanga yo tatidila tusansu wauna yanuzayisila to. 3 Kansi, nzolele nuazaya wo vo, o ntu* a konso yakala i Kristu;+ o ntu a nkento i yakala;+ o ntu* a Kristu i Nzambi.+ 4 Konso yakala osamba yovo sakula yo ntu wafukwa, ntu* andi kefusulwisa e nsoni; 5 konso nkento osamba yovo sakula+ yo ntu walembi fukwa, ntu* andi kefusulwisa e nsoni, kadi diau dimosi kwandi yo tendwa luvanda. 6 Kadi o nkento avo kafukidi ntu andi ko, kafwete zengwa e nsuki; kansi avo dia nsoni kwa nkento kazengwa e nsuki yovo tendwa luvanda, kafwete fuka o ntu andi.
7 O yakala kafwete fuka o ntu ko, kadi yandi i fwaniswa kia Nzambi+ yo nkembo andi, kansi nkento i nkembo a yakala. 8 Kadi o yakala katuka mu nkento ko, kansi nkento watuka muna yakala.+ 9 Vana ntandu, yakala kavangwa mu kuma kia nkento ko, kansi o nkento mu kuma kia yakala.+ 10 Kiaki i kuma o nkento kafwete kadila ye dimbu kia lusakalalu kuna ntu andi mu kuma kia ambasi.+
11 Mun’owu wa Mfumu, o nkento kavambuka muna yakala ko ngatu yakala kavambuka muna nkento. 12 Kadi wauna o nkento kavangilwa mu kuma kia yakala,+ i una mpe o yakala kewutilwangwa kwa nkento; kansi e lekwa yawonso kwa Nzambi yasemwa.+ 13 Yeno kibeni nufimpa e diambu diadi: Nga diansongi kwa nkento mu samba kwa Nzambi yo ntu walembi fukwa? 14 E mpila twavangilwa, nga ke ikunulonganga ko vo dia nsoni kwa yakala mu kala ye nsuki zandá, 15 kansi kuna kwa nkento e nsuki zandá i nkembo kwa yandi e? E kuma kadi e nsuki zavewa kwa yandi se tambala. 16 Kansi, avo muntu ozolele fila mpaka mu kuma kia fu kiankaka, katuna ye fu kiankaka ko, kana nkutu muna nkutakani za Nzambi.
17 Wau inukanikini mambu mama, kilendi kunusanisina ko, e kuma kadi ke lukutakananga muna wete ko, kansi muna mbi kaka. 18 Ediantete, ngwidi vo vava nukalanga vamosi muna nkutakani, mpambani nukalanga zau; ozevo mankaka nkwikidi mo. 19 Kadi e mpambani kala zikala vovo nuina,+ kimana ana betondwa kwa Nzambi bazayakana.
20 Vava nukutakananga, ke nukutakananga kikilu ko mu dia Nlekelo a Mfumu.+ 21 Kadi muna ntangw’a dia wo, akaka beteka kuyidilanga madia mau ma nlekelo, dianu vo ekolo mosi kena mu nzala, wankaka mu nkolwa. 22 Nga ka luna ye nzo za dila yo nuina ko e? Yovo nkutakani a Nzambi luvezanga yo mwesa nsoni awana ke bena ya lekwa ko e? Adieyi ndenda kunuvovesa? Nga yalusanisina e? Kikulusanisina ko.
23 Kadi una yatambula kwa Mfumu, i wau mpe inusongele, muna fuku una kayekolwa Mfumu Yesu,+ wabonga mbolo, 24 vava katondele, obukunuini yo, ovovele vo: “E mbolo yayi nitu ame isunzulanga,+ ivewa mu kuma kieno. Nukwamanana wo vanga muna luyindulu lwame.”+ 25 Diau dimosi mpe kavanga ye mbungwa,+ vava bamanisa dia o nlekelo, ovovele vo: “E mbungwa yayi kangu diampa isunzulanga+ muna diambu dia menga mame.+ Nuvanganga wo, konso ntangwa nunua yo, muna luyindulu lwame.”+ 26 Kadi konso ntangwa nudia e mbolo yayi yo nua e mbungwa yayi, lufwa lwa Mfumu nusamunanga, yavana kekwiza.
27 Dianu vo, ndiona odia e mbolo yovo nua e mbungw’a Mfumu wau kalembele fwana, nkanu kenata muna nitu yo menga ma Mfumu. 28 O muntu kafwete teka kuyifimpa mu zaya kana vo wafwana,+ i bosi kedia e mbolo yo nua e mbungwa. 29 Kadi ndiona odianga yo nua lembi bakula vo kina kedianga yo nua i nitu a Mfumu,* tumbu kekuyitwasilanga. 30 Kiaki i kuma ayingi muna yeno batovokele yo yela, ndonga balele muna lufwa.*+ 31 Kansi avo tutomene kukizaya, ke tufundiswa ko. 32 Kansi, vava tufundiswa, tulongwa kwa Yave*+ kimana twalembi tumbwa kumosi ye nza.+ 33 Dianu vo ampangi, avo nukutakene muna dia nlekelo, nuvingilanga akaka. 34 Avo muntu una ye nzala, yambula kadia kuna nzo, kimana nualembi kutakana muna lufundisu.+ Vo i mambu masidi isingika mo vava ikwiza.