Wantete wa Samuele

31 Afelesetia banuene yo Isaele.+ Wan’a Isaele batinini Afelesetia, ndonga bavondelo vana Mongo a Ngileboa.+ 2 Afelesetia balakamene Saulu yo wan’andi, bavondele wan’a Saulu, i sia vo, Yonatane,+ Abinadabi yo Mankisu.+ 3 E vita ikitukidi se yampasi kikilu kuna kwa Saulu, akwa nzanza bansolwele, banlwekele.+ 4 Saulu ovovese nati a nuaninua yandi vo: “Vola nsosolo aku wansuka wo kimana mindembi zengwa+ awaya balembi kundwakila yo kunsakanena.” Kansi, o nati a nuaninua yandi kazolele ko, kadi wonga wayingi kamwene. Muna kuma kiaki, Saulu obongele nsosolo, uyisukidi wo.+ 5 O nati a nuaninua vava kamwene vo Saulu ofwidi,+ yandi mpe uyisukidi nsosolo, ofwidi kumosi yo Saulu. 6 Saulu yo wan’andi tatu, nati a nuaninua yandi ye wantu andi, yau awonso bafwidi muna lumbu kiakina.+ 7 O nkangu a Isaele una wakala kuna ndimba ye muna mvivu a Yodani vava bamwene wo vo wan’a Isaele batinini, o Saulu yo wan’andi bafwidi, basisidi mbanza zau yo tina;+ Afelesetia bezidi, babakidi mo.

8 Muna lumbu kialanda, Afelesetia vava balweke kimana basanza lekwa ya mvumbi, bamwene Saulu yo wan’andi atatu bafwa vana Mongo a Ngileboa.+ 9 Bazengele ntu a Saulu, bankatwidi nuaninua yandi, batumini anati a nsangu muna nsi yawonso ya Afelesetia kimana banata nsangu+ muna nzo* za teke yau+ ye kwa nkangu au. 10 Basidi nuaninua yandi muna nzo a teke ya Asetorete yo manika e vimbu diandi muna yaka kia Bete-sani.+ 11 Esi Yabese-Ngiladi+ vava bawidi dina Afelesetia bavangidi kwa Saulu, 12 makesa mawonso matelamene, bele mu fuku, babongele vimbu dia Saulu ye mavimbu ma wan’andi muna yaka kia Bete-sani. Bavutukidi kuna Yabese, i kûna bayokele mo. 13 Babongele e visi yau,+ bazikidi yo kuna nsi a nti a tamareseke muna Yabese,+ bafionkonuene* lumbu nsambwadi.