Wanzole wa Ntinu

10 Akabi+ 70 lwa wana kakala lwau muna Samaria. Yeu osonekene nkanda, otwikidi wo kuna Samaria kuna kwa akuluntu+ a Yizerele ye mbuta ye asansi a wan’a Akabi,* owu kasoneka: 2 “Vava nutambula nkanda wau, o wan’a mfumu eno bekala yeno. Oyeno nuna ye makalu ma vita, mvalu, mbanz’a ngolo ye nuaninua. 3 Nusola ona osundidi ye wafwana* muna wan’a mfumu eno, numvuandisa vana kunda kia kimfumu kia se diandi. Nunuanina nzo a mfumu eno.”

4 Kansi, bamwene wonga wayingi, bavovele vo: “E ntinu miole nkutu ke milendele telama ko vana ndose andi,+ oyeto aweyi tulenda telamena?” 5 I dianu vo, e mbanda-mband’a lûmbu lwa* ntinu, nguvulu a mbanza, akuluntu ye asansi a wan’a ntinu, batwikidi nsangu ezi kwa Yeu: “Oyeto tu selo yaku, mawonso okutuvovesa i mau tuvanga. Ke tusola ntinu ko. Vanga konso dina omwene vo diambote muna meso maku.”

6 I bosi, Yeu ubasonekene nkanda wanzole, oku vo: “Avo ku sambu diame lwina ye luzolele kundemvokela, nutwasa ntu mia wan’a mfumu eno, o mbazi nuiza kwa mono omu ola yayi kwaku Yizerele.”

O 70 lwa wan’a ntinu bakala yo wantu a zitu a mbanza ana babasansanga. 7 Vava batambwidi nkanda, babakidi 70 lwa wan’a ntinu babavondele,+ basidi e ntu miau muna yitunga, batwikidi mio kwa Yeu kuna Yizerele. 8 O nati a nsangu olweke, umvovese vo: “Batwese ntu mia wan’a ntinu.” Yeu ovovele vo: “Nusia mio muna kunku yole vana vitu dia mbanza, miakala vâna yaku mene-mene.” 9 Vava kavaikidi muna mene-mene, otelamene vana vena nkangu wawonso, ovovele vo: “Oyeno ke luna ye kuma ko.* Mono yavuandila mfumu ame e mfulu yo kumvonda,+ kansi awonso awaya nani ubavondele? 10 Nuzaya wo vo ke vefunga kana diambu dimosi ko* dia Yave,+ dina kavova Yave mu kuma kia nzo ya Akabi, o Yave ovangidi una kavova muna selo kiandi Eliya.”+ 11 Yeu ovondele mpe awonso ana basala muna nzo ya Akabi kuna Yizerele, kumosi ye akwa zitu, akundi andi ye anganga,+ kansisila kana mosi ko.+

12 I bosi, otelamene, wele kuna Samaria. Muna nzila mwakala e nzo* ina avungudi bakangidilanga mameme. 13 Yeu owanane ye mpangi za Akaziya wa Ntinu+ a Yuda, ubayuvuidi vo, “Oyeno nu aki nani?” Bavutwidi vo: “Tu mpangi za Akaziya, tukulumukini twenda zaya mavimpi ma wan’awonso a ntinu ye wan’a ntinu ankento wa ngudi a ntinu.”* 14 Vana vau ovovele vo: “Nubabaka kimoyo!” Bababakidi kimoyo, babavondele vana sima kia nzo ina bakangidilanga mameme, wantu 42 bakala. Kavukisi kana mosi ko.+

15 Vava kakatuka vavana owanane yo Yonadabe+ wa mwan’a Rekabe+ ona wayiza kunkika. O Yeu vava kankayisi,* umvovese vo: “Nga ntim’aku una emvimba* mu mono, wauna ntim’ame winina emvimba muna ngeye?”

Yonadabe ovutwidi vo: “Ingeta.”

“Avo i wau, umpana koko kwaku.”

Umvene koko kwandi, Yeu untombwele muna kalu diandi. 16 Umvovese vo: “Wiza yame, wamona vo kiyambulwilanga kimbanda ko kuna kwa Yave.”+ Yeu wele yandi muna kalu diandi dia vita. 17 Yeu olweke muna Samaria, ovondele awonso ana basala muna nzo a Akabi muna Samaria, ubabukumwini yau awonso,+ mun’owu wa diambu dia Yave dina kavova muna Eliya.+

18 Vana ntandu, Yeu okutakese nkangu awonso, ubavovese vo: “Akabi wasambila Bale fiakete,+ kansi o Yeu okunsambila kwayingi. 19 Ozevo, nubokelesa ngunza zawonso za Bale,+ asambidi andi awonso ye nganga zandi zawonso beza oku ngina.+ Ke nusisi mosi ko, kadi kimenga kianene itambika kwa Bale. Konso ona okondwa, vondwa kevondwa.” Kansi, Yeu ndekwa kaka kasadidi muna fwasa asambidi a Bale.

20 Yeu ovovele diaka vo: “Nubokelesa nkoki a* lukutakanu lwampwena lwa Bale.” Babokelese wo. 21 I bosi, Yeu otwikidi nsamu muna Isaele yawonso, asambidi awonso a Bale bezidi. Ke vasala muntu ko ona walembi kwiza. Bakotele muna nzo* ya Bale,+ e nzo yawonso ya Bale izele yamuna konko. 22 Ovovese nlundi a mvuatu vo: “Twasa mvuatu kwa asambidi awonso a Bale.” Ubatwasidi e mvuatu. 23 I bosi, Yeu yo Yonadabe+ wa mwan’a Rekabe bakotele muna nzo a Bale. Ovovese asambidi a Bale vo: “Nutoma fimpa yo tala kimana ke vakadi asambidi a Yave ko vava, asambidi a Bale kaka.” 24 Bakotele kimana bakela yimenga yo tambika tukau twangioka. Yeu osidi 80 lwa wantu andi kuna mbazi yo vova vo: “Avo vatinini mosi muna wantu ana isia vana moko meno, ona okuntinisa, ovondwa vana fulu kia ndiona otina.”*

25 Vava kamene tambika lukau lwa ngioka, Yeu ovovese ayingidi* ye mbanda-mbanda vo: “Nukota nuabavonda! Ke nuvukisi muntu ko!”+ Muna kuma kiaki, ayingidi ye mbanda-mbanda babavondele muna nsosolo, batubidi mavimbu mau kuna mbazi, balweke yamuna suku* dia nzo a Bale. 26 Bavaikisi ku mbazi malunzi mavauka+ ma nzo a Bale, bayokele mo.+ 27 Babangwidi e lunzi diavauka+ dia Bale, babangwidi mpe nzo a Bale+ yo kitula yo se kozo, yakinu una yamu unu kiaki.

28 O Yeu i mfukisa kafukisa Bale muna Isaele. 29 Kansi, Yeu kavengomoka masumu ma Yerobame wa mwan’a Nebate ko mana kasumukisina Isaele, i sia vo, nsambil’a wan’a ngombe awolo bakala kuna Betele ye kuna Dani.+ 30 Yave ovovese Yeu vo: “Wau vo ovangidi edi diambote ye diansongi vana meso mame, olungisi mawonso makala muna ntim’ame mu kuma kia nzo ya Akabi,+ o wan’aku yamuna mbandu ina ya nyá bevuanda vana kunda kia kimfumu kia Isaele.”+ 31 Kansi, Yeu kasia sungididi ko kia kangalela muna Nsiku a Yave wa Nzambi a Isaele ye ntim’andi wawonso.+ Kavengomoka ko muna masumu ma Yerobame mana kasumukisina Isaele.+

32 Muna lumbu yayina, Yave oyantikidi katula* zunga ya Isaele ndambu-ndambu. Kazaele, okwamanene kubanuanisa muna zunga yawonso ya Isaele,+ 33 tuka kuna Yodani kuna este, nsi yawonso ya Ngiladi—Anengadi, Anerubeni yo Anemanase+ —tuka kuna Arowa ina muna Ndimb’a Arenone yakuna Ngiladi ye Basani.+

34 Mambu mankaka ma lusansu lwa Yeu ye mawonso kavanga ye kikesa kiandi, nga ke masonama ko muna nkand’a lusansu lwa ntinu mia Isaele? 35 Yeu olele yo mase mandi, banzikidi kuna Samaria; Yoakazi+ wa mwan’andi oyantikidi yala vana fulu kiandi. 36 Mvu 28 i kolo* Yeu kayala Isaele muna Samaria.