Mavangu ma Zintumwa
21 Vava tuvambane yau, tukotele muna nzaza, twele yakuna Kose, muna lumbu kialanda tulweke kuna Rodo, i bosi twele kuna Patara. 2 Wau tuwene e nzaza se isauka kuna Fenisia, tukotele mo, twele kweto. 3 Vava twamona e sanga kia Kupero, tuviokele kio kuna lumonso,* twele kuna Suria, i bosi twele ningama kuna Turo, kadi i kuna kwakulumunuinua e lekwa yakala muna nzaza. 4 Tuvavidi alongoki, vava twabasolwele, tukedi kûna lumbu nsambwadi. Muna lusadisu lwa mwand’avelela, alongoki badodokele Paulu kalembi kwenda kuna Yerusaleme.+ 5 Kansi e lumbu yeto vava yalunga, tukatukidi ko yo kwenda, yau awonso kumosi ye akento yo wana, bele kutufila yakuna mbazi a mbanza. Twafukama vana kumu dia mbu, twasamba yo 6 kubakanina. I bosi, tukotele muna nzaza, vo i yau bavutukidi muna nzo zau.
7 Tukatukidi muna Turo, twele kuna Telemai, tumonane ye ampangi yo nanga yau lumbu kimosi. 8 Muna lumbu kialanda twakatuka yo lwaka muna Kaisaria, twakota muna nzo a Filipo wa nteleki, mosi muna akala nsambwadi,*+ twananga yandi. 9 Muntu ndioyo wakala yo wana yá amakento ampumpa,* ana basakulanga.+ 10 Kansi, vava twakala ko lumbu yayingi, vakulumukini ngunza mosi watuka kuna Yuda, nkumbu andi Angabo.+ 11 Wayiza kwa yeto, obongele mpond’a Paulu okangidi yo muna malu yo moko mandi, ovovele vo: “Mwand’avelela uvovele vo, ‘Ndiona ovuidi e mponda yayi i wau kekangilwa kwa Ayuda muna Yerusaleme+ ye bekunyekola vana moko ma esi zula.’”+ 12 Vava twawá wo, oyeto ye awana bakala mo tuyantikidi kundodokela kimana kalembi tomboka kuna Yerusaleme. 13 Paulu ovutwidi vo: “Adieyi nuvanganga wau nudilanga yo vava yoyesa o ntim’ame? Nuzaya wo vo, kina kaka yakubama muna kangwa ko, kansi yakubama mpe mu fwa kuna Yerusaleme mu kuma kia nkumbu a Mfumu Yesu.”+ 14 Wau kalembi kutuwila, tunyambwidi* yo vova vo: “Yambula luzolo lwa Yave* lwavangama.”
15 E lumbu yayina vava yavioka, twakubama mu kuma kia nkangalu, tutombokele kuna Yerusaleme. 16 Alongoki ankaka esi Kaisaria bele yeto, batunete kwa Nasone wa musi Kupero, mosi muna alongoki antete, muna nzo andi twalwakila. 17 Vava twalwaka muna Yerusaleme, ampangi batutambula kuna kiese. 18 Kansi muna lumbu kialanda, Paulu yo yeto twele kwa Yakobo,+ akuluntu awonso kuna bakala. 19 Ubakayisi, oyantikidi kubazayisa mambu mana Nzambi kavangidi vana vena zula muna uselo wandi.
20 Vava bawidi wo, bakembelele Nzambi, bavovese Paulu vo: “E mpangi, omwene ndong’a minkwikizi vana vena Ayuda, yau awonso bena ye tima muna lemvokela Nsiku.+ 21 Kansi, oyau bawidi nsangu vo ngeye olonganga Ayuda awonso ana bezingilanga vana vena esi zula vo bayambula lunda Nsiku a Mose yo kubavovesa vo balembi zengesa wan’au, ngatu landa e fu yeto yankaka.+ 22 Ozevo, adieyi tuvanga? Kalukatikisu ko vo bezaya wo vo wayizidi. 23 Dianu vo, vanga dina tukuvovesa: Tuna ye akala yá ana badidi e ndofi ina bafwete lungisa. 24 Bonga wantu awaya, ukivelelesa mun’owu wa nsiku kumosi yo yau, ubafutila mawonso kimana bakwempwa o ntu. Ozevo, awonso bezaya wo vo mambu mana bawá mu kuma kiaku maluvunu, kadi ngeye kibeni okangalelanga muna unsongi yo lunda o Nsiku.+ 25 Muna kuma kia esi zula ana bakwikila, twatwika e nzengo zeto vo bakwamanana kuyikenga muna yimenga ya teke,+ menga,+ bulu yafietwa vana laka*+ ye mavangu ma zumba.”*+
26 I bosi, o Paulu muna lumbu kialanda obongele akala awaya, uyivelelese kumosi yo yau mun’owu wa nsiku,+ okotele muna tempelo mu zayisa ntangwa ifokoka e lumbu ya luveleleso ye ntangwa ifwete tambikwa kimenga mu kuma kia konso muntu muna yau.
27 E lumbu nsambwadi vava ifokoka, Ayuda ana batuka kuna Asia vava bamwene Paulu muna tempelo bavukumwini e ndonga yawonso yo kunkanga, 28 bakazidi oku vo: “Esi Isaele, nutusadisa! Muntu ndioyo olonganga wantu muna fulu yawonso e mambu metwasanga luvezo kwa nkangu eto yo Nsiku ye fulu kiaki, vana ntandu, okotese Mingerekia mu tempelo yo funzula fulu kiaki kiavauka.”+ 29 Kadi bateka kumona muna mbanza yo Terofimo+ wa musi Efeso yo banza vo Paulu wankotesa muna tempelo. 30 Mavuanga makotele muna mbanza yawonso, o nkangu ulundumukini kumosi, babakidi Paulu, bankokele kuna mbazi a tempelo, vana vau e yelo yizikilu. 31 Ekolo bavavanga kumvonda, e nsangu zilweke kwa mfumu a buka kia makesa vo mavuanga mabwidi muna Yerusaleme yawonso; 32 vana vau obongele makesa ye afidi a makesa, bakulumukini e ntinu kuna bakala. Vava bamwene mfumu a makesa yo makesa, bayambwidi wanda Paulu.
33 I bosi, mfumu a makesa ofinamene, umbakidi, okanikini vo kakangwa muna tuvambu tole;+ i bosi oyuvuidi kana yandi i nani ye dina kavangidi. 34 Kansi akaka vana vena e ndonga bayantikidi kazila diambu dimosi, akaka bavovele diambu diankaka. Wau kalembi zaya e kuma kia nkindu, okanikini vo kanatwa kuna lûmbu lwa makesa. 35 Kansi vava kalueke vana sikada, makesa banete mu kuma kia makasi ma ndonga, 36 kadi wantu ayingi banlandanga yo kaza oku vo: “Numvonda!”
37 Paulu vava kakoteswanga muna lûmbu lwa makesa, ovovese mfumu a makesa vo: “Nga lenda kumpana o nswa yavovesa e diambu e?” Umvovese vo: “Nga ozeye vova Kingerekia e? 38 Ke ngeye ko i musi Engipito ona wanikwini e nkindu ke kolo ko yo fila 4.000 ma avondi a wantu muna makanga e?” 39 Paulu ovovele vo: “Omono i Nyuda,+ i musi Taso,+ mbanza yamfunu kuna Kilikia. Idodokele, umpana nswa yavovana yo nkangu.” 40 Vava kamvene o nswa, Paulu otelamene vana sikada, olambwidi koko kwandi kuna kwina o nkangu. Vava vakedi e pi-i, ubavovesele muna nding’a Kiyibere,+ oku vo: