Wanzole wa Tusansu
17 Yosafate+ wa mwan’andi okitukidi se ntinu vana fulu kiandi, osiamisi kimfumu kiandi muna Isaele. 2 Osidi makesa muna mbanza zawonso zangolo za Yuda ye buka ya makesa muna nsi a Yuda yamuna mbanza za Eferaime zina kabaka Asa wa se diandi.+ 3 Yave okedi kaka yo Yosafate kadi wadiatila muna nzila zina kateka diatila Davidi+ wa nkulu andi, kasidi tomba teke ya Bale ko. 4 Ovavidi Nzambi a se diandi,+ olende* nkanikinu miandi, ke mavangu ma Isaele ko.+ 5 Yave osikidisi kintinu vana moko mandi;+ Yuda yawonso yavananga tukau kwa Yosafate, okedi ye kimvuama kiayingi yo nkembo.+ 6 Okedi ye unkabu walanda nzila za Yave, okatwidi mabata+ ye mavindi mavauka*+ muna Yuda.
7 Muna mvu watatu wa luyalu lwandi, otumini akuluntu andi, Benkaile, Obadiya, Zakariya, Netanele yo Mikaya benda longa nkangu muna mbanza za Yuda. 8 Awaya i Anelevi bayenda yau: Semaya, Netaneya, Zebadeya, Asaele, Semiramote, Yonatani, Adoniya, Tobiye yo Toba-doniya kumosi ye anganga, Elisama yo Yorame.+ 9 Bayantikidi longa nkangu muna Yuda, banete nkand’a Nsiku+ a Yave, bele azieti muna mbanza zawonso za Yuda yo longa nkangu.
10 E yintinu yawonso ya nsi zina zazieta Yuda bamona wonga wa Yave, ke banuanisi Yosafate ko. 11 Afelesetia batwasidi Yosafate tukau ye nzimbu se vaku. Esi Arabia bantwasidi 7.700 za mameme ma makoko ye 7.700 za nkombo za makoko muna makambi mau.
12 Yosafate wakumamanga kaka,+ okwamanene tunga nzo zangolo+ ye mbanza za malundilu+ muna Yuda. 13 Yosafate osadidi salu yayingi muna mbanza za Yuda, okedi yo makesa, i sia vo, mabamba-ngolo muna Yerusaleme. 14 Lualu i lutangu lwau mun’owu wa nzo za mase mau: muna Yuda, e mfumu za mafunda, Adana wa mfumu, okedi ye 300.000 ma mabamba-ngolo.+ 15 Yekanane wa mfidi okedi muna lutumu lwandi, okedi ye 280.000 ma makesa. 16 Amaseya wa mwan’a Zikere okedi mpe muna lutumu lwandi, wakivana kuna mvevo muna salu kia Yave, okedi ye 200.000 ma makesa. 17 Muna Benyamini,+ Eleyada wa kesa dia muntu, okedi ye 200.000 ma akwa mfumba ye ngubu.+ 18 Yeozabade okedi muna lutumu lwandi, okedi ye 180.000 batoma kubikwa muna nuana vita. 19 Awaya basadilanga ntinu, vana ntandu awana ntinu kasia muna mbanza zangolo muna Yuda yawonso.+