Wanzole wa Tusansu
21 Yosafate olele yo mase mandi, ozikilu yo mase mandi muna Mbanz’a Davidi; Yorame wa mwan’andi oyantikidi yala vana fulu kiandi.+ 2 Ezazi i mpangi zandi, wan’a Yosafate: Azariyà, Yekiele, Zakariya, Azariya, Mikaele yo Sefateya; awaya awonso i wan’a Yosafate wa Ntinu a Isaele. 3 Se diau wabavana tukau twayingi twa palata ye wolo ye lekwa yambote ye mavata mangolo muna Yuda;+ kansi wavana kintinu kwa Yorame,+ kadi yandi i mwan’antete.
4 Yorame vava katambwidi kintinu kia se diandi yo sikidisa e wisa kiandi, ovondele mpangi zandi zawonso+ muna nsosolo, ye akuluntu akaka a Isaele. 5 Yorame mvu 32 kakala miau vava kayantika yala, mvu nana kayala muna Yerusaleme.+ 6 Wakangalela muna nzila y’atinu a Isaele,+ wauna wavanga nzo ya Akabi, kadi wabonga mwan’a Akabi se nkaz’andi;+ wakwamanana vanga mambu mambi vana meso ma Yave. 7 Kansi, Yave kazola fwasa nzo a Davidi ko mu kuma kia kangu dina kakanga yo Davidi,+ kadi wasia nsilu wa kumvana mwinda yakwele mvu yo wan’andi.+
8 Muna lumbu ya Yorame, Edome otelamene Yuda,+ osikidisi ntinu andi.+ 9 Muna kuma kiaki, Yorame osaukidi ye afidi andi ye makalu mandi mawonso ma vita, otelamene muna fuku, owende esi Edome ana banzungidi ye afidi a makalu ma vita. 10 Kansi, Edome otèlamene Yuda yamu unu kiaki. Muna ntangwa yayina, Libena+ mpe untelamène, kadi obembwele Yave wa Nzambi a mase mandi.+ 11 Otungidi mpe mabata+ muna miongo mia Yuda kimana esi Yerusaleme balembi tatidila kwikizi kiau muna Nzambi,* ovukumwini Yuda.
12 I bosi, Yorame otambwidi nkanda watuka kwa Eliya+ wa ngunza, oku vo: “I wau wuwu kavovele o Yave wa Nzambi a Davidi wa se diaku, ‘Ongeye kukangalele muna nzil’a Yosafate+ wa se diaku ko, ngatu muna nzil’a Asa+ wa Ntinu a Yuda. 13 Okangalele kaka muna nzila y’atinu a Isaele+ yo vukumuna Yuda y’esi Yerusaleme balembi tatidila kwikizi kiau muna Nzambi,*+ una wavanga e nzo ya Akabi,+ ovondele mpangi zaku,+ e nzo a se diaku, ana bàsundidi o wete. 14 Muna kuma kiaki, Yave otwasa vuku kiangolo kwa nkangu aku ye kwa wan’aku ye akazi aku ye mavua maku mawonso. 15 Oyela yimbevo yayingi yamuna ndia, yavana ndia miaku mivaika, muna kuma kia yela kwa lumbu ke lumbu.’”
16 I bosi, Yave obundumwini+ Afelesetia*+ y’esi Arabia+ ana bakala lukufi ye Anetiopia, banuanisi Yorame. 17 Bakotele muna Yuda, banuanisi yo, babakidi lusalu lwawonso lwakala muna nzo a* ntinu+ yo wan’andi ye akazi andi, Yoakaze*+ wa mwan’andi ansuka kaka wasala. 18 Vava mambu mama mavioka, Yave unyelese kimbevo kilembi sasuka muna ndia miandi.+ 19 I bosi, vava kialunga mvu miole, e ndia miandi mivaikidi mu kuma kia yela, ofwididi muna mpasi za mayela mandi; o nkangu andi ke bankwikidi ziku dia ndumbu ko nze una bavanga kwa mase mandi.+ 20 Mvu 32 kakala miau vava kayantika yala, mvu nana kayala muna Yerusaleme. Ke muntu ko wakendalala vava kafwa. Banzikidi muna Mbanz’a Davidi,+ kansi ke muna ziami ki’atinu ko.+