Wanzole wa Tusansu
33 Manase+ mvu 12 kakala miau vava kayantika yala, mvu 55 kayala muna Yerusaleme.+
2 Wavanga mambu mambi vana meso ma Yave, watanginina mavangu mawonso mangemi ma zula ina Yave kayinga vana vena nkangu a Isaele.+ 3 Otungulwidi mabata mana kabangula Kizekeya wa se diandi,+ otungidi maziku ma teke ya Bale, ovangidi mavindi mavauka,* ovumbamene vu kiawonso kia zulu yo sadila kio.+ 4 Otungidi mpe maziku muna nzo a Yave,+ ina Yave kavovela vo: “E nkumbu ame ikala mu Yerusaleme yakwele mvu.”+ 5 Otungidi mpe maziku mu kuma kia vu kiawonso kia zulu muna yanzala yau yole ya nzo a Yave.+ 6 Oyokele* mpe wan’andi vana tiya+ vana Ndimb’a Mwan’a Inome,+ ovandidi e nkisi,+ otesese ngombo yo nîka kindoki, otumbikidi nganga za matombola ye nganga za ngombo.+ Ovangidi mambu mayingi mambi vana meso ma Yave muna kunkendeleka.
7 E teke kiavalwa kina kavanga osidi kio muna nzo a Nzambi aludi+ ina o Nzambi kavovesela Davidi yo mwan’andi Solomo vo: “Muna nzo yayi ye muna Yerusaleme ina yasola muna makanda mawonso ma Isaele, isia mo e nkumbu ame yakwele mvu.+ 8 Kikatula diaka malu ma Isaele ko muna nsi ina yavana kwa mase mau, avo batomene lemvokela mawonso yabakanikina, o Nsiku awonso, mîna ye nzengo zame za mfundisa zina yavana muna Mose.” 9 Kansi, Manase okwamanene vukumuna Yuda ye nkangu a Yerusaleme yo kubafila mu vanga mambu mambi lutila zula ina Yave kafwasa vana vena Aneyisaele.+
10 Yave walukisanga Manase ye nkangu andi, kansi ke banwilanga ko.+ 11 Muna kuma kiaki, Yave ubatwikidi mfumu za vu kia makesa ma ntinu a Asuri, babakidi Manase muna luvaku,* bankangidi muna tuvambu tole yo kunata kuna Babele. 12 Muna mpasi zandi, ododokele* Yave wa Nzambi andi, uyikulwidi kikilu vana ndose a Nzambi a mase mandi. 13 Manase okwamanene samba kwa Nzambi, dianu vo wau kamfwididi e nkenda mu kuma kia ndodokela zandi, owidi e sambu kiandi, umvutulwisi muna Yerusaleme muna kintinu kiandi.+ I mpila yayi Manase kazayila vo Yave i Nzambi aludi.+
14 I bosi, otungidi yaka kuna mbazi a Mbanz’a Davidi+ kuna weste a Ngikoni+ kuna ndimba yakuna Vitu dia Mbizi a Maza,+ okwamanene kio tunga, ozungidi e mbanza yakuna Ofele,+ e yaka kiandá kikilu kiakala. Vana ntandu, otumbikidi mfumu za makesa muna mbanza zawonso zangolo za Yuda. 15 Okatwidi nzambi za nzenza ye teke muna nzo a Yave+ ye maziku mawonso katunga vana mongo a nzo a Yave+ ye muna Yerusaleme, ovetele yo kuna mbazi a mbanza. 16 Otungulwidi mpe e ziku dia Yave,+ oyantikidi vo tambikila yimenga ya ungudi+ ye yimenga ya matondo,+ ovovese Yuda vo basadila Yave wa Nzambi a Isaele. 17 O nkangu ukwamanene kela yimenga muna mabata, kansi kwa Yave wa Nzambi au kaka bakelelanga yo.
18 Vo i mambu mankaka ma lusansu lwa Manase, sambu kina kasamba kwa Nzambi andi ye mambu ma amoni mana bamvovesela muna nkumbu a Yave wa Nzambi a Isaele, masonama muna lusansu lwa ntinu mia Isaele. 19 E sambu kiandi mpe+ ye una ndodokela zandi zavaninua e mvutu, masumu mandi mawonso yo kondwa kwandi kwa kwikizi+ ye fulu ina katungila mabata ye mavindi mavauka*+ katongeka ye teke yavalwa ina kakivangila, masonama muna mvovo mia amoni andi. 20 I bosi, Manase olele yo mase mandi, banzikidi muna nzo andi; mwan’andi Amone oyantikidi yala vana fulu kiandi.+
21 Amone+ mvu 22 kakala miau vava kayantika yala, mvu miole kayala muna Yerusaleme.+ 22 Wavanga mambu mambi vana meso ma Yave wauna Manase wa se diandi kavanga;+ Amone wakelanga yimenga kwa teke yawonso ina kavanga Manase wa se diandi,+ wakwamanana yo sadila. 23 Kansi, kasidi kuyikulula ko vana ndose a Yave+ nze una Manase wa se diandi kayikulwila;+ Amone wawokesa kaka o bi wandi. 24 Kuna kwalanda, selo yandi bamvuandidi e mfulu,+ bamvondele muna nzo andi. 25 Kansi, nkangu a nsi, bavondele awonso bavuandila Amone wa Ntinu e mfulu,+ batumbikidi Yosiya+ wa mwan’andi se ntinu vana fulu kiandi.