Nekemiya

1 Mambu ma Nekemiya*+ wa mwan’a Kakaleya: Muna ngonde a Kisileu,* o mvu una wa 20, yakala muna lûmbu lwa Susani.*+ 2 E ntangwa yayina, yalwakilwa kwa Kanani,+ mosi muna mpangi zame ye ankaka batuka kuna Yuda, ibayuvuidi nsangu za nsadiswa za Ayuda ana batuka kuna kinkole+ ye nsangu za Yerusaleme. 3 Bavutwidi vo: “Awana batuka muna kinkole ana bena muna mvivu, mu mpasi zayingi bena yo luvezo.+ E yaka ya Yerusaleme yabangulwa,+ mavitu mandi mayokwa.”+

4 Vava yawá mambu mama, mvuende, ngiantidiki dila, nkendalele mu lumbu yayingi, mfionkonuene*+ yo samba kwa Nzambi a zulu. 5 Mpovele vo: “E Yave wa Nzambi a zulu, Nzambi anene ye wansisi, ona olundanga e kangu diandi yo songa walakazi* kwa awana bekuzolanga yo lunda nkanikinu miaku,+ 6 dodokolo, yambula kutu kwaku kwawunikina, meso maku matemoka, wá sambu kia ntaudi aku eki nsambidi kwa ngeye o unu, fuku yo mwini,+ muna kuma kia ntaudi zaku, Aneyisaele, wau mfungwini masumu ma nkangu a Isaele mana bàsumukina. Mono ye nzo a se diame tusumukini.+ 7 Mambu mayingi mambi twavanga kwa ngeye,+ ke twalunda nkanikinu ye mîna ko yovo nzengo zina wakanikina ntaudi aku Mose.+

8 “Dodokolo, yindula diambu dina wakanikina* Mose wa selo kiaku, oku vo: ‘Avo nusumuka, ikunumwanganesa vana vena nkangu.+ 9 Kansi avo nuviluka kwa mono, nualunda nkanikinu miame yo lemvokela mio, kana nkutu nkangu aku una wamwangana yakuna nsuk’a nza, ikubakutakesa+ kwakuna, yabatwasa ova fulu kina yasola yo sia vo e nkumbu ame.’+ 10 Oyau ntaudi zaku ye nkangu aku, ana wakûdila muna nkum’aku ayingi ye koko kwaku kwankuma.+ 11 E Yave dodokolo, yambula kutu kwaku kwawunikina sambu kia ntaudi aku ye sambu kia ntaudi zaku ana bayangalelanga vumina nkumbu aku, dodokolo, sikidisa ntaudi aku o unu, yambula muntu ndioyo kamfwila e nkenda.”+

E ntangwa yayina, mono yatambikanga mbungwa kwa ntinu.+