Kuna Kwa Ayibere
9 Vo i kangu dina diavita diakala ye nsiku mia salu kiavauka ye fulu kiandi kiavauka+ ova ntoto. 2 Kadi e suku diantete dia saba diatungwa, i mwakala zangikilwa kia minda,+ meza ye mbolo za lutambiku;+ e suku diadi diayikilwanga vo Fulu Kiavauka.+ 3 Kansi kuna nim’a rido ina yanzole,+ i kwakala suku diayikilwanga vo Fulu Kisundidi o Vauka.+ 4 I mûna mwakala yokelwa kia ndumbu kia wolo,+ nkela a kangu+ yalengwa wolo mwawonso,+ i mûna mwakala e mbidika ya wolo yakala ye mâna+ ye nkau a Arone una wasavuka+ e mvuma ye babu+ ya kangu; 5 vana ntandu a nkela vakala ye akelubi a nkembo ana bayitalelanga e fukwa kia vutulwisila e ngwizani.*+ Kansi eyayi ke ntangw’a sasila mambu mama ko.
6 Vava lekwa yayi yakubikwa mu mpila yayi, ntangwa ke ntangwa anganga bakotanga muna suku diantete dia saba muna sala e salu yavauka;+ 7 kansi muna suku dianzole, ngang’ambuta kaka wakotanga mo, nkumbu mosi muna mvu,+ ka kondwanga menga ko,+ mana katambikanga mu kuma kia yandi kibeni+ ye mu kuma kia masumu mana nkangu+ bavangilanga kuna bubu. 8 Mwand’avelela watoma dio kiesesa vo e nzil’a kotela mu fulu kiavauka ke yasengomonua ko ekolo saba kiantete kiakala kiatelama.+ 9 E saba kiaki i kingana kia ntangwa yayi,+ tukau ye yimenga itambikwanga mun’owu wa nkubika yayi.+ Kansi ke ilendi velelesa e mvimba ko e ntona za wantu besalanga e salu kiavauka.+ 10 O tukau twatu ye yimenga, ya madia kaka ye ndua ye nsukula za mpila mu mpila.*+ O mambu mama ma kinitu+ malombwanga muna nsiku, masiwa yavana ifwana e ntangwa yasikidiswa muna singika e mambu.
11 Kansi, vava Kristu kayiza nze ngang’ambuta a mambu mambote mateka vangama, wakota muna saba kianene ye kiambote, kina ke kiavangilwa muna moko ko, i sia vo, ke ya nsema wau ko. 12 Wakota muna fulu kiavauka, ke muna menga ma nkombo ye wan’a ngombe ko, kansi muna menga+ ma yandi kibeni i kakotela e mvimba mu nkumbu mosi yo kutukûla yakwele mvu.+ 13 Kadi avo menga ma nkombo ye ngombe za makoko+ yo ntoto ampolo a wan’a ngombe wamwangininuanga awana bafunzuka, wabavelelesanga muna nitu,+ 14 ozevo o menga ma Kristu,+ ona wakitambika kwa Nzambi kondwa tona muna mwand’a mvu ya mvu, nga ke meluta velelesa ntona zeto ko muna mavangu mafwa+ kimana twasadila Nzambi amoyo salu kiavauka e?+
15 Kiaki i kuma kenena se nkambami*+ a kangu diampa, kimana awana basolwa batambula o nsilu wa vua dia mvu ya mvu, kadi wafwa muna kûla yo vuluza+ awana basumukina kuna nsi a kangu diantete.+ 16 Kadi konso kuna kukangilu e kangu, o muntu okangidi e kangu yo Nzambi kafwete fwa, 17 e kuma kadi e kangu kuna nim’a lufwa kaka disikidilanga, wau kezinganga ndiona wakanga dio ke dikalanga yo nkuma ko. 18 Dianu vo, e kangu dina diavita ke diayantika sala ko kondwa menga. 19 Kadi vava Mose kazayisa e nkanikinu miawonso mia Nsiku kwa nkangu awonso, wabonga o menga ma wan’a ngombe ye nkombo, ye maza, ye mika miambwaki, ye nti a isopo, wazaza mo vana nkanda e kangu ye kwa nkangu awonso, 20 ovovele vo: “Omama i menga ma kangu dina Nzambi kanukanikina vo nualunda.”+ 21 Wazazila mpe menga+ muna saba ye salanganu yawonso yasadilwanga e salu kiavauka. 22 Mun’owu wa Nsiku, lekwa yayingi muna menga yaveleleselwa, vana valembi bungulwa o menga,+ ke vena luloloko ko.+
23 I dianu diakadila o mfunu vo, e fwaniswa+ kia lekwa ina kuna zulu kiaveleleselwa muna yimenga ya bulu,+ kansi e lekwa ya zulu, yimenga isundidi wete yavavanga, ke mu yimenga ya bulu ko. 24 Kadi Kristu kakota mu fulu kiavauka kiavangilwa muna moko ko,+ kina vo i fwaniswa kia fulu kialudi,+ kansi kuna zulu kikilu kakota,+ kimana kamoneka owau vana ndose a Nzambi muna wete dieto.+ 25 Kayitambika nkumbu miayingi ko, wauna ngang’ambuta kekotanga vana fulu kiavauka e mvu ke mvu+ yo menga mena vo ke mandi ko. 26 Kele vo ke wau ko, nkumbu miayingi kadi mona e mpasi tuka kuna semo dia nza. Kansi owau oku mbaninu a tandu* uyisengomwene nsengomoka imosi kaka mu katula masumu muna kuyitambika yandi kibeni.+ 27 Wauna diasikidiswa vo wantu befwa nkumbu mosi kaka, i bosi befundiswa, 28 o Kristu mpe nkumbu mosi kaka katambikwa kimana kanata masumu ma wantu ayingi;+ e nkumbu wanzole kemoneka, ke mu diambu dia masumu ko, kansi mu diambu dia awana bekumvavanga mu kuma kia luvuluzu lwau.+