Wantete wa Petelo
1 Petelo, wa ntumw’a+ Yesu Kristu, kuna kwa minduti a nzila bamwangana muna Ponto, Ngalatia, Kapadokia,+ Asia ye Bitunia, ana basolwa 2 mun’owu wa fu kiateka zaya o mambu kena kiau o Nzambi wa Se,+ bavaulwa kwa mwanda+ ye kani dia songa nlemvo yo zazilwa menga ma Yesu Kristu:+
Yambula nsambu yo luvuvamu lwawokela koko nuina.
3 Okembelwa o Nzambi wa Se dia Mfumu eto Yesu Kristu, kadi muna ulolo wa nkenda zandi, watuvana luwutuku lwampa+ muna vuvu kiamoyo+ muna lufuluku lwa Yesu Kristu muna mafwa,+ 4 muna e vua dilembi wolakana, ngatu safuka yo vempoka.+ Dina nualundilwa kuna zulu,+ 5 oyeno nutaninuanga muna nkum’a Nzambi, muna lukwikilu, muna luvuluku lwakubama kimana nuasengomonua muna ntangw’a mbaninu. 6 Kiaki i kuma nutomene yangalala, kanele vo owau mu kolo kiandwelo kaka, diamfunu nuamwesw’e ntantu muna ntonta za mpila mu mpila,+ 7 kimana o lukwikilu lweno luna lwazikukila muna lutonto,+ luviokele ntalu a wolo ina ikuyifwila kanele vo itontelwa* muna tiya, lwasoloka ye kuma kia lusanisinu yo nkembo yo zitu muna lusengomoko lwa Yesu Kristu.+ 8 Kana una vo ke nuamona ko, nunzolele. Kana una vo yandi ke numoni owau, nukwikidi muna yandi, nuyangalele ngiangalala ke ilendi vovakana ko, ina ya nkembo kikilu, 9 kadi luna ye ziku vo lukwikilu lweno luvuluza mioyo mieno.+
10 Muna kuma kia luvuluzu lwalu, angunza ana basakula o mambu ma nsambu zina zikwiza kwa yeno batoma fimpulula yo vavulula.+ 11 Bakwamanana vavulula mu zaya e ntangwa ye kolo kina melungana muna Kristu o mambu mana basongwanga kwa mwanda wakala muna yau.+ O mwanda wateka sakula e mpasi kemona o Kristu+ yo nkembo ulandila. 12 Diabasengomonua vo basalanga, ke mu diambu dia yau kibeni ko, muna diambu dieno kaka, mun’owu wa mana mesamunuanga owau kwa yeno mun’awana banusamunuina e nsangu zambote muna mwand’avelela watuka kuna zulu.+ Ambasi bena ye tima dia toma bakula mambu mama.
13 Dianu vo, nukubika ngindu zeno mu kuma kia salu;+ nukala yo nyindu asikila;+ nusikidisa e vuvu kieno muna nsambu zina nuvewa muna lusengomoko lwa Yesu Kristu. 14 Nze wan’a nlemvo, nuyambula kuyisianga fwani-fwani ye zolela yeno yankulu ina nuakala yau kuna bubu, 15 kansi, wau vo Ndiona wanubokela Wavauka, oyeno mpe nukala nuavauka muna nkal’eno yawonso,+ 16 kadi diasonama vo: “Nufwete kala nuavauka, kadi omono yavauka.”+
17 Avo nulomba kwa Se ona ofundisanga mun’owu wa mavangu ma konso muntu lembi sia mpambula,+ nukala yo vumi+ ekolo nuina se minduti a nzila ova nza yayi. 18 Kadi nuzeye wo vo ke mu lekwa iwolanga ko yovo palata ngatu wolo nuakûdilwa+ muna mpil’a zingu kiampavala kina nuasambukila kwa mase meno. 19 Kansi muna menga mantalu,+ nze ma mwan’a meme wakondwa twangu* ye tona,+ mana ma Kristu.+ 20 Kieleka, yandi wateka solwa kwa Nzambi una ke kiasemeno e nza ko,+ kansi wasengomonua oku nsuka za tandu muna wete dieno.+ 21 Muna yandi i nukwikididi muna Nzambi,+ ona wamfula muna mafwa+ yo kumvana o nkembo,+ kimana o lukwikilu ye vuvu kieno kiakala muna Nzambi.
22 Wau nuvelelese mioyo mieno muna lemvokela e ludi yo twasa nzolani a ungudi yakondwa kivunina,+ nuzolana kikilu ye nsi a ntima.+ 23 Kadi nuwutulukidi,+ ke mu mbongo yawolakana ko, kansi mbongo ilembi wola,*+ mun’owu wa diambu dia Nzambi amoyo ona okalanga yakwele mvu.+ 24 E kuma kadi “wantu awonso bena* nze titi, o nkembo au wawonso una nze luvuma lwa mfuta; e titi ilengela, e mvuma zisotoka, 25 kansi e diambu dia Yave* disikila yakwele mvu.”+ E “diambu” diadi i nsangu zambote zina nuasamunuinua.+