Luvaiku
3 O Mose okitukidi mvungudi a kambi dia Yitero wa kô wandi,+ wa ngang’a Midiani. Ekolo kavungwiding’e kambi kuna weste ya makanga, olweke vana mongo a Nzambi aludi, kuna Korebe.+ 2 I bosi, mbasi a Yave imonekene kwa yandi muna nlaku a tiya vana kati kwa mvanga.*+ Ekolo katadidinge, omwene mvanga ukweme tiya, kansi ke uvianga ko. 3 Mose ovovele vo: “Yambula ngienda tala e diambu diadi diasivi, yazaya e kuma o mvanga wau ke uvilanga ko.” 4 Vava Yave kamwene vo Mose wele katala, umbokele tuka vana mvanga yo vova vo: “E Mose, e Mose!” Yandi vo: “Mon’oyu!” 5 Nzambi ovovele vo: “Kufinami vava ko. Katula e nsampatu muna malu maku, kadi e fulu kina otelamene i ntoto avauka.”
6 Nzambi okudikidi vo: “Mono i Nzambi a se diaku, wa Nzambi a Abarayama,+ Nzambi a Isaki+ ye Nzambi a Yakobo.”+ I bosi, Mose ofukidi lose lwandi kadi omwene wonga wa tala Nzambi aludi. 7 Yave okudikidi vo: “Kieleka, mbwen’e mpasi za nkangu ame una muna Engipito, ngwidi e kazu kiau mu kuma kia salu yangolo besadiswanga; ntomene zaya e mpasi bemonanga.+ 8 Ikulumuka yabakûla vana koko kwa esi Engipito+ yo kubavaikisa muna nsi yayina, benda muna nsi yambote ye yanene, e nsi ifwamfumukanga kimvumina yo wiki,+ e zunga kia Anekenani, Anekete, Aneyamore, Aneperese, Anekivi ye Aneyebuse.+ 9 Tala, e kazu kia nkangu a Isaele kilweke oku ngina, mbwene mpe mpila yansoki bebangikilwanga kwa esi Engipito.+ 10 Owau wiza, yatuma kwa Faro, ngeye ovaikisa nkangu ame Aneyisaele muna Engipito.”+
11 Kansi Mose ovovese Nzambi aludi vo: “Omono i nani ngienda kwa Faro yo vaikisa Aneyisaele muna Engipito?” 12 Muna diadi, Nzambi ovutwidi vo: “Ikala yaku,+ ekiaki i sinsu kwa ngeye kisonga vo mono itumini: Vava ovaikisa nkangu muna Engipito, oyeno nusadila* mono Nzambi aludi ova mongo wau.”+
13 Kansi, Mose ovutwidi Nzambi aludi vo: “Yindula vo ngiele kwa Aneyisaele yo kubavovesa vo: ‘O Nzambi a mase meno untumini kwa yeno,’ oyau bangiuvula vo: ‘Nani i nkumbu andi?’+ Adieyi ikubavutula?” 14 Nzambi ovovese Mose vo: “Omono Ikituka Konso una Nzolele* Kituka.”*+ Okudikidi vo: “I wau wuwu ovova kwa Aneyisaele: ‘Omono Ikituka untumini kwa yeno.’”+ 15 I bosi, Nzambi ovovese diaka Mose vo:
“I wau wuwu ovovesa Aneyisaele: ‘O Yave wa Nzambi a mase meno, Nzambi a Abarayama,+ Nzambi a Isaki+ ye Nzambi a Yakobo,+ untumini kwa yeno.’ Eyayi i nkumbu ame yakwele mvu,+ i wau wuwu isungamenua muna mbandu ke mbandu. 16 Owau wenda, kutakesa akuluntu a Isaele yo kubavovesa vo: ‘O Yave wa Nzambi a mase meno, Nzambi a Abarayama, a Isaki yo Yakobo, wamonekene kwa mono yo kumpovesa vo: “Kieleka, ikunusianga e sungididi,+ imonanga mana nuvangwanga momo Engipito. 17 Muna kuma kiaki, mpovele vo ikunukatula muna lubangamu vana moko ma esi Engipito+ yo kununata muna nsi ya Anekenani, Anekete, Aneyamore,+ Aneperese, Anekivi ye Aneyebuse,+ yamuna nsi ifwamfumukanga kimvumina yo wiki.”’+
18 “Bewila kieleka nding’aku,+ okwenda kumosi ye mbuta za Isaele kuna kwa ntinu a Engipito. Nukumvovesa vo: ‘O Yave wa Nzambi a Ayibere+ wamokene yeto. Muna kuma kiaki, dodokolo utuyambula twavanga nkangalu a lumbu tatu muna makanga kimana twenda kelela Yave wa Nzambi eto e kimenga.’+ 19 Kansi, ntomene wo zaya vo ntinu a Engipito ke kunuvana nswa wa kwenda ko, nanga vo koko kwankuma kwankomekena mu vanga wo.+ 20 Muna kuma kiaki, ilambula koko kwame yo tumba Engipito muna mavangu mawonso masivi ivanga mu nsi yoyo, i bosi kekunusindika.+ 21 Isonga nkangu wau e dienga vana meso ma esi Engipito, vava nuvaika, ke nuvaika moko mankatu ko.+ 22 Konso nkento kafwete lomba lekwa ya palata, ya wolo ye mvuatu kwa mfinangani andi ye kwa nkento a nzenza una muna nzo andi; nuvuika mio kwa wana eno amakala ye amakento; i nsanza nusanza esi Engipito.”+