Luvaiku

19 Muna ngonde ina yatatu, tuka Aneyisaele bavaikila muna nsi ya Engipito, muna lumbu kiau akimosi,* balweke muna makanga ma Sinai. 2 Bakatukidi kuna Refidimi,+ balweke muna makanga ma Sinai, basikidisi e ndo muna makanga. I mûna Isaele kasikidisila e ndo, mantalani yo mongo.+

3 I bosi, Mose otombokele kuna mongo kamonana yo Nzambi aludi, Yave umbokele tuka kuna mongo,+ oku vo: “I wau wuwu ovovesa e nzo a Yakobo, zayisa Aneyisaele vo: 4 ‘Yeno kibeni numwene una mvangidi kwa esi Engipito,+ ye una yanutwasidi kwa mono nze una ngo-zulu kenatinanga wan’andi muna mave mandi.+ 5 Owau, avo nulemvokela e nding’ame yo kwamanana lunda e kangu diame, kieleka, nukituka se vua diame diantalu vana vena nkangu miawonso,+ kadi o ntoto wawonso mono mvuidi wo.+ 6 Nukituka kwa mono se Kintinu kia anganga ye zula kiavauka.’+ Omama i mambu ozayisa kwa Aneyisaele.”

7 Mose okulumukini, obokelese akuluntu a nkangu yo kubazayisa mambu mawonso Yave kankanikini.+ 8 I bosi, nkangu awonso uvutwidi kumosi vo: “Mawonso kavovele o Yave, vanga tuvanga mo.”+ Vana vau, Mose onete mvutu za nkangu kwa Yave. 9 Yave ovovese Mose vo: “Tala, ikwizila kwa ngeye muna tuti dia ndombe, kimana o nkangu wawá vava imokena yaku, wakwikila mpe muna ngeye ntangwa zawonso.” I bosi, Mose ozayisi e mvovo mia nkangu kwa Yave.

10 I bosi, Yave ovovese Mose vo: “Wenda kwa nkangu, ubavaula o unu yo mbazi, bafwete sukula e mvuatu miau. 11 Bafwete kala bakubama mu kuma kia lumbu kiatatu, kadi muna lumbu kiatatu Yave okulumuka vana Mongo a Sinai vana meso ma nkangu awonso. 12 Ofwete sikidisa mwingilu muna kinzieta kiawonso kia mongo, ubazayisa vo: ‘Nuyikenga nualembi tomboka kuna mongo ngatu simba mwingilu andi. Konso ona osimba o mongo vondwa kevondwa. 13 Ke vena koko ko kusimba muntu ndioyo, kansi kafwete tubwa matadi yovo tobolwa.* Kiakala bulu yovo muntu, kafwete vondwa.’+ Kansi, vava bewá e zú dia mpungi ya mpok’a meme dia koko,+ befinama vana mongo.”

14 I bosi, Mose okulumukini kuna mongo, wele kwa nkangu, oyantikidi vaula o nkangu, o nkangu usukwidi mvuatu miau.+ 15 Mose ovovese nkangu vo: “Nukubama mu kuma kia lumbu kiatatu. Ke nuvukani ye akento eno ko.”*

16 Muna lumbu kiatatu muna mene, vakedi miandazi ye nsemo, e tuti dia ndombe+ difukidi o mongo, vakedi mpe zú diangolo kikilu dia mpungi. O nkangu wawonso muna ndo uyantikidi zakama.+ 17 Mose onete o nkangu kuna mbazi a ndo bawanana yo Nzambi aludi, batelamene vana sina dia mongo. 18 O Mongo a Sinai wawonso ufutumukininge mwisi, kadi Yave okulumukini vana mongo muna tiya;+ o mwisi utombokelenge kuna zulu nga mwisi a fûlu, o mongo wawonso uzakamene kikilu.+ 19 Vava e zú dia mpungi diwokele, Mose ovovele, o Nzambi aludi umvutwidi.*

20 Yave okulumukini vana Mongo a Sinai, vana mbat’a mongo. I bosi, Yave obokele Mose vana mbat’a mongo, Mose otombokele.+ 21 Yave ovovese Mose vo: “Kulumuka, zayisa kwa nkangu vo ke batezi vioka mwingilu ko mu tala Yave; avo bavangidi wo, ndonga muna yau befwa. 22 Yambula anganga ana befinamanga Yave bayivaula, kimana o Yave kalembi kubafwasa.”+ 23 I bosi, Mose ovovese Yave vo: “O nkangu ke utomboka oku Mongo a Sinai ko, kadi ongeye utuzayisi kala vo: ‘Sikidisa o mwingilu muna kinzieta kia mongo, vaula wo.’”+ 24 Kansi, Yave umvovese vo: “Wenda, kulumuka, i bosi wiza atomboki kumosi yo Arone, kansi kuyambula ko vo anganga yo nkangu bavioka o mwingilu yo tomboka kwa Yave, kimana yalembi kubavonda.”+ 25 Muna kuma kiaki, Mose okulumukini kwa nkangu, ubazayisi wo.