Luvaiku
32 O nkangu vava umwene vo Mose ozingidi kwayingi mu kulumuka tuka kuna mongo,+ bazungidi Arone yo kumvovesa vo: “Telama, utuvangila nzambi ona okutuvita o ntu,+ kadi vo i Mose ndioyo, ona watuvaikisa muna nsi ya Engipito, ke tuzeye ko dina dimbwididi.” 2 Muna diadi, Arone ubavovese vo: “Nubonga e lunga ya matu yawolo+ muna matu ma akazi eno, wan’eno amakala yo wan’eno amakento, nuntwasila yo.” 3 O nkangu awonso ubongele lunga yau ya matu yawolo, batwese yo kwa Arone. 4 I bosi, otambwidi e wolo kwa nkangu, osingikidi wo muna sadilwa, ovangidi wo e teke* kia mwan’a ngombe.+ O nkangu uyantikidi vova vo: “E Isaele, eyayi i Nzambi aku, ina yavaikisa muna nsi ya Engipito.”+
5 Vava Arone kamwene diambu diadi, otungidi e ziku vana ntwal’a teke. Arone obokele vo: “O mbazi i lumbu kia nkinzi kuna kwa Yave.” 6 Muna lumbu kialanda basikamene muna mene-mene, bayantikidi tambika tukau twangioka ye yimenga ya ungudi. I bosi, o nkangu ufongele mu dia yo nua. Utelamene mu sakana.+
7 Yave ovovese Mose vo: “Wenda, kulumuka, kadi o nkangu aku, una wavaikisa tuka kuna nsi ya Engipito, uyisafwidi.+ 8 Bavengomokene mu nzaki muna nzila yabakanikina vo bakangalela.+ Bayivangidi teke* kia mwan’a ngombe, bakwamanene kumvumbamena yo kunkelela yimenga yo vova vo: ‘E Isaele, eyayi i Nzambi aku, ina yavaikisa muna nsi ya Engipito.’” 9 Yave ovovese diaka Mose vo: “Mbwene vo nkangu wau akwa ntu miangolo.*+ 10 Owau, ungiambula yabafukisa muna nsita zame, ongeye yakitula se zula kianene vana fulu kiau.”+
11 Mose ododokele* Yave wa Nzambi+ andi yo vova vo: “E Yave, ekuma oyambulwila vo makasi maku mayingi mafusukila nkangu aku, una wavaikisa muna nsi ya Engipito muna nkum’ayingi ye muna koko kwankuma?+ 12 Ekuma oyambulwila esi Engipito bavova vo: ‘Makani mambi kakala mau vava kabavaikisa mu Engipito, wazola kubavondela muna miongo yo kubafukisa ova nza’?+ Yambula e nsita zaku ye vutuka manima muna nzengo zaku zafwasa o nkangu aku. 13 Sungamena Abarayama, Isaki yo Isaele, e selo yaku ana wadila e ndofi yo vova vo: ‘Wokesa kikilu iwokesa e mbongo aku nze ntetembwa za zulu,+ ivana e nsi yayi yawonso isongele kwa mbongo aku, kimana batambula yo se vua diakwele mvu.’”+
14 Muna kuma kiaki, Yave ovutukidi manima* muna nzengo zandi, kafwasidi nkangu andi ko.+
15 I bosi Mose ovilukidi, okulumukini tuka kuna mongo ye babu yole ya Kimbangi+ vana moko.+ E babu yasonekwa muna ndambu zau zole; yasonekwa kuna ntwala ye kuna nima. 16 E babu yoyo salu kia Nzambi, vo i masono, masono ma Nzambi mavosonua muna babu.+ 17 Vava Yosua kawidi mazu ma nkangu ukazanga, ovovese Mose vo: “Mazu ma vita mena kuna ndo.” 18 Kansi Mose ovovele vo:
“Ke mazu ma nkung’a nsund’a vita ko,*
Ke mazu ma dilu ko kia wantu basundilu;
Kansi, mazu ma nkung’a mpila yankaka ngwidi.”
19 Vava Mose kafinamene ndo, omwene mwan’a ngombe+ yo wantu bekinanga, makasi mandi mafusukidi, otubidi vana ntoto e babu yole ikedi vana moko mandi, owudidi yo vana sina dia mongo.+ 20 Mose obongele mwan’a ngombe bavangidi, unyokele vana tiya, untutidi yavana kakitukidi se mfumfu;+ omwenge yo muna maza, otumini Aneyisaele banua mo.+ 21 Mose oyuvuidi Arone vo: “Nkia diambu bavangidi o nkangu wau muna kubatwasila e sumu diadi dianene?” 22 Arone ovutwidi vo: “E mfumu ame, kufungi makasi ko. Ngeye kibeni otomene wo zaya vo nkangu wau ngindu za vanga kaka e mbi bekalanga zau.+ 23 Edi bampovese vo: ‘Utuvangila nzambi ona okutuvita o ntu, kadi vo i Mose ndioyo, ona watuvaikisa muna nsi ya Engipito, ke tuzeye ko dina dimbwididi.’+ 24 Muna kuma kiaki ibavovese vo: ‘Konso muntu una ye konso lekwa kiawolo, kabonga kio, katwasa kio kwa mono.’ I bosi, ntubidi wolo wowo vana tiya, uvaikisi mwan’a ngombe ndioyo.”
25 Mose omwene vo e mvuanga ikotele vana vena o nkangu, kadi Arone wayambula vo e mvuanga yakota vana bena, bayifusulwisi e nsoni vana meso ma mbeni zau. 26 I bosi, Mose otelamene vana mwelo a ndo yo vova vo: “Nani una kuna sambu dia Yave? Keza ova ngina!”+ Anelevi awonso bakutakene, bazungidi Mose. 27 Ubavovese vo: “I wau wuwu kavovele o Yave wa Nzambi a Isaele: ‘Konso muntu mu yeno kasia nsosolo andi muna luketo yo viokela muna ndo yawonso, mwelo muna mwelo, yo vonda mpangi andi, mfinangani andi yo nkundi andi.’”+ 28 Anelevi bavangidi dina Mose kavovele. Muna kuma kiaki, tezo kia 3.000 ma wan’amakala bavondwa muna lumbu kiakina. 29 I bosi, Mose ovovele vo: “O unu nukivaula* mu kuma kia salu kia Yave, kadi konso muntu mu yeno ovondele mwan’andi yo mpangi andi;+ o unu Nzambi okunusambula.”+
30 Muna lumbu kialanda, Mose ovovese nkangu vo: “Sumu diampwena nuvolele, owau itomboka kwa Yave yazaya kana vo ndenda lomba ndoloki a sumu dieno.”+ 31 Muna kuma kiaki, Mose ovutukidi kwa Yave yo vova vo: “Ekwe sumu diampwena bavolele o nkangu wau! Bayivangidi nzambi a wolo!”+ 32 Kansi owau, avo i luzolo lwaku, loloka e sumu diau;+ avo ke wau ko, dodokolo, vunzuna e nkumbu ame muna nkand’aku una wasoneka.”+ 33 Yave ovovese Mose vo: “E nkumbu a konso muntu ona unsumukini i yau ivunzuna muna nkand’ame. 34 Owau wenda, nata o nkangu kuna fulu kina ivovese. Tala, e mbasi ame ivita kuna ntwal’aku;+ muna lumbu ikubakingula, ikubatumba mu kuma kia sumu diau.” 35 I bosi, Yave oyantikidi twasa vuku kwa nkangu mu kuma kia mwan’a ngombe ona balomba kwa Arone vo kabavangila.