Lusengomono kwa Yoane
17 Mosi muna mbasi nsambwadi zina ye pidi nsambwadi,+ wizidi, umpovese vo: “Wiza yasonga e mfundis’a nkembi* anene ona ofongele vana maza mayingi,+ 2 ona atinu a nza betanga yandi e zumba,*+ awana bena ova nza bakoleso kwa vinyu ya zumba* yandi.”+
3 E mbasi indete kuna makanga muna nkum’a mwanda. Mbwene nkento ofongele vana ntandu a bulu kiansisi kiambwaki, kiazala ye nkumbu za lutiangu, kina ye ntu nsambwadi ye mpoka kumi. 4 O nkento ovuete nlele a se kia nduwa,+ wambwaki, uyiviengesele muna wolo, matadi mantalu, ye pelola,+ okedi ye mbungw’a wolo vana koko kwandi, yazala ye lekwa yangemi ye yafunzuka ya mavangu mandi ma zumba.* 5 Vana nkut’a lose lwandi vasonamene nkumbu, mbumba: “Babele Anene, ngudi a akembi+ ye lekwa yangemi ya nza.”+ 6 Mbwene nkento ndioyo okolelo menga ma avauki ye menga ma mbangi za Yesu.+
Ozevo, vava imwene, nsivikidi kikilu. 7 E mbasi impovese vo: “Ekuma osivikidi? Ikuzayisa e mbumb’a nkento+ ye bulu kiansisi kina kinète, eki kina ye ntu nsambwadi ye mpoka kumi:+ 8 E bulu kiansisi kina omwene kiakala, kansi ke kina ko, se kitomboka muna mbilu,+ yo kwenda kuna lufwasu. Awana bena ova nza—ana bena vo e nkumbu zau ke zasonama muna nkand’a moyo ko+ tuka kiasemenua e nza—besivika vava bemona e bulu kiansisi kina kiakala, kansi ke kina ko, kisinga kala diaka.
9 “Ovava i vevavilwanga umbakuzi wa nkwa ngangu: E ntu nsambwadi,+ miongo nsambwadi misunzulanga, mina nkento kafongele. 10 Vena ye ntinu nsambwadi: Ntanu babwidi kala, mosi una, wankaka kalueke ntete ko; kansi vava keluaka, okala kaka mu fikolo. 11 E bulu kiansisi kina kiakala kansi ke kina ko,+ i ntinu wanana mpe, kansi muna ntinu nsambwadi kitukidi, kikwenda yakuna lufwasu.
12 “E mpoka kumi zina omwene, ntinu kumi zisunzulanga, mina ke mitambwidi ntete kintinu ko, kansi mitambwidi e wisa kia ola mosi, bayala kumosi ye bulu kiansisi. 13 Atinu awaya kani dimosi bena diau, i dianu bavanini o nkuma ye wisa kiau kwa bulu kiansisi. 14 Benuana yo Mwan’a meme,+ wau vo yandi i Mfumu a zimfumu ye Ntinu wa atinu,+ o Mwan’a meme okubasunda.+ Awana mpe bena yandi, ana babokelwa yo solwa, akwa kwikizi besunda mpe.”+
15 Umpovese vo: “E maza mana omwene, vana nkembi* kafongele, nkangu, ndonga, zula ye ndinga mesunzulanga.+ 16 E mpoka kumi+ zina omwene, ye bulu kiansisi,+ bemenga o nkembi*+ yo kunsanza, bekunsisa e nkonga, bedia nitu andi yo kumbomona vana tiya.+ 17 Kadi o Nzambi osidi dio muna ntima miau+ edi dialunganesa e kani diandi, elo, balunganesa e kani dimosi bena diau, dia vana kintinu kiau kwa bulu kiansisi,+ yavana e mvovo mia Nzambi milungana. 18 O nkento+ ona omwene, mbanza anene ina iyalwanga kwa ntinu mia nza kesunzulanga.”