Lusengomono kwa Yoane
18 I bosi, mbwene mbasi yankaka ikulumukanga tuka kuna zulu ina ye wisa kianene, e nza itemeso kwa nkembo andi. 2 Ikazidi muna nding’a ngolo, oku vo: “Ibwidi, ibwidi, e Babele Anene,+ ikitukidi se fulu kikalanga nkuya ye swaminu dia mianda miawonso mia usafu, ye nuni zawonso za usafu yo mengwa!+ 3 E kuma kadi e zula yawonso ibwidi muna vinyu a zinu* dia zumba* yandi,+ atinu a nza batele yandi e zumba,+ akiti a nza bavuamini muna ulolo wa mavua mandi.”
4 Ngwidi e ndinga yankaka itukidi kuna zulu, ivovele vo: “Nuvaika muna yandi e nkangu ame,+ nualembi kala yandi e ntwadi muna masumu mandi yo lembi tambula e kunku kia vuku yandi.+ 5 Kadi masumu mandi makulamene yakuna zulu,+ Nzambi osungamene mavangu mandi malembi songa.*+ 6 Numvanga wauna kavangidi kwa akaka,+ numvutulwila nkumbu miole mu mana kavangidi;+ muna mbungwa+ ina kakubikidi vinyu, nunkubikila mo nzongo miole.+ 7 Muna tezo kina kayikembesele yo zingila muna kimvuama kiandi kondwa kwa nsoni, i una mpe nuntwasila lubangamu ye dilu. Kadi ovovele muna ntim’andi vo: ‘Mfongele se ntinu ankento, kiafwilwa yakala ko, kidila nkutu ko.’+ 8 Muna kuma kiaki, e vuku yandi mu lumbu kimosi ikwiza, lufwa ye dilu, mvengele yo bomonua vana tiya,+ e kuma kadi o Yave* wa Nzambi umfundisi, nkwa nkuma.+
9 “E ntinu mia nza mina mitanga yandi e zumba* yo kala yandi e ntwadi muna umvuama wandi kondwa kwa nsoni, bekundila yo bunda e tulu mu kuma kia ntantu vava bemona mwisi a tiya tuna keyokelwa. 10 Betelama kuna kwandá mu kuma kia wonga wa lubangamu lwandi yo vova vo: ‘Ekwe, ekwe, mbanza anene,+ Babele, e mbanza ankuma, kadi e tumbu kiaku mu ola mosi kizidi!’
11 “Akiti a nza mpe bena ye ntantu yo dila mu kuma kiandi, e kuma kadi ke vena diaka muntu ko osumba kinkita kiau, 12 kinkita kia wolo, palata, matadi mantalu, pelola, nlele mia lino, nlele mia se kia nduwa, nlele mia seda* ye nlele miambwaki; ye lekwa yawonso yavangilwa muna nti miansunga; salanganu yawonso yavangilwa muna meno ma nzamba, muna mabaya mantalu, nsongo, sengwa ye tadi diampembe; 13 ye kanela mpe, ima ya nsunga ya India, ndumbu a nti a lebona, mazi mansunga, dimbu wansunga, vinyu, mazi ma olive, mfumfu, masa, ngombe, mameme, mvalu, makalu, ye antaudi ye mioyo mia wantu. 14 Elo, e lekwa yambote ina wayangalalanga itinini, madia mawonso mambote ye lekwa yambote ivididi vana wina, ke ilendi soloka diaka ko.
15 “Akiti ana betekanga lekwa yayi, ana bavuamina kwa yandi, betelama kwandá mu kuma kia wonga wa lubangamu lwandi, bemona ntantu yo dila, 16 bevova vo: ‘Ekwe, ekwe, e mbanza anene, ivuete nlele a lino, nlele a se kia nduwa ye nlele ambwaki itomene kuyiviengesela muna wolo, matadi mantalu ye pelola,+ 17 e kuma kadi, e kimvuama kiau kiawonso kisanzilu muna ola mosi!’
“E mfumu zawonso za nzaza ye wantu ankaka bena mu nkangalu ye ansau ye awonso besadilanga muna kalunga, batelamene kwandá 18 bakazidi ekolo betalanga o mwisi a tiya tukumbomonanga, bavovele vo: ‘Nkia mbanza ina nze mbanza anene?’ 19 Basidi ntoto vana ntu miau, bakazidi, bamwene ntantu yo dila, oku vo: ‘Ekwe, ekwe, e mbanza anene, muna kuma kia kimvuama kiaku, awonso bena ye nzaza muna kalunga bavueme, kadi osanzilu muna ola mosi!’+
20 “Yangalala e zulu,+ yo yeno avauki mpe+ ye antumwa ye angunza, e kuma kadi o Nzambi untumbidi muna wete dieno!”+
21 Mbasi mosi yankuma ibongele e tadi diampwena nze tadi dia nikina masa, otubidi dio muna kalunga, ovovele vo: “Wauna e tadi diadi ditubilu mu nzaki, i una itubilwa e Babele, e mbanza anene, ke imoneka diaka ko.+ 22 E ndinga za ayimbidi ana besikanga e kokolo, matutu, mpungi ye masikilu mankaka ke ziwakana diaka ko. Muna ngeye ke musoloka diaka nkwa umbangu ko ona ovanga konso lekwa, e zú dia tadi dia nikina ke diwakana diaka ko muna ngeye. 23 Omu ngeye ke mutemena diaka ntemo a mwind’a ko, e nding’a toko ye ndumba ansompi ke iwakana diaka ko muna ngeye; kadi akiti aku i awana basunda e tunda ova nza, e zula yawonso yavukumunua muna mavangu maku ma mpandu.+ 24 Elo, muna yandi musolokele menga ma angunza ye avauki+ ye awonso bavondwa ova nza.”+