Mavangu ma Zintumwa
4 Ekolo Petelo yo Yoane bevovanga kwa nkangu, anganga ye mfumu a makesa ma tempelo ye Asaduki+ babaluakidi. 2 Bafungidi makasi ekuma kadi antumwa belonganga o nkangu yo samuna o lufuluku lwa Yesu muna mafwa.*+ 3 Bababakidi yo kubasia muna pelezo+ yamuna lumbu kialanda, kadi mu nkokela bakala. 4 Kansi, ndonga muna awana bawidi e longi bakwikidi, o lutangu lwa akala lulueke tezo kia 5.000.+
5 Muna lumbu kialanda, afidi ye akuluntu au ye asoneki balungalakene muna Yerusaleme, 6 yo Anasi wa mbut’anganga,+ Kayafa,+ Yoane, Alesandero ye yitu yawonso ya mbut’anganga. 7 Batelamese Petelo yo Yoane vana kati kwau yo kubayuvula vo: “Mu nkia nkuma yovo mu nkumbu a nani nuvangidi diambu diadi?” 8 Petelo, ozele yo mwand’avelela,+ ubavovese vo:
“Afidi a nkangu ye akuluntu, 9 avo tufundisu o unu muna vangu diambote divangamene muna mvanguki+ ye nuzolele zaya kana nani owukidi muntu ndioyo, 10 yambula diazayakana kwa yeno awonso ye kwa nkangu awonso a Isaele vo, muna nkumbu a Yesu Kristu wa musi Nazarete,+ ona nuavondela vana nti,+ kansi o Nzambi wamfula muna mafwa,+ muna yandi o muntu ndioyo i katelamene yo vimpi vana ndose eno. 11 Ediadi i ‘tadi diabadikilwa kwa yeno atungi vo diakondwa o mfunu, owau dikitukidi se mbut’a tadi dia konko.’*+ 12 Kadi ke vena luvuluzu muna muntu akaka ko, ke vena mpe nkumbu yankaka+ ko oku nsi a ntangwa yavewa kwa wantu ina tufwete vuluzilwa.”+
13 Vava bamwene unkabu wa Petelo yo Yoane yo zaya vo wantu balembi longwa* ye mpasi wantu kwau,+ basivikidi. Basungamene mpe vo kumosi bakala yo Yesu.+ 14 Wau bamwene o muntu ona owukilu otelamene yau,+ ke bakedi diaka ye dina bavova ko.+ 15 Babavovese vo bavaika muna seka dia Mbazi a Nkanu,* i bosi bayantikidi yuvuziana, 16 oku vo: “Adieyi tuvanga kwa wantu awaya?+ E kuma kadi sinsu kianene kivangamene muna yau, kitomene zayakana kwa nkangu awonso a Yerusaleme,+ ke tulendi kio vunisa ko. 17 Muna lembi dio mwanga diaka vana vena nkangu, yambula twabavumisa yo kubakanikina vo ke basamuni diaka nkumbu a muntu ndioyo kwa wantu ko.”+
18 Dianu vo, bababokele, babakanikini vo ke bavovi nkutu diambu kwa muntu ko ngatu longela muna nkumbu a Yesu. 19 Kansi Petelo yo Yoane babavovese vo: “Avo diansongi vana ndose a Nzambi edi dia kunuwila ke mu Nzambi ko, nubaka e nzengo yeno kibeni. 20 Kansi oyeto, ke tulendi yambula vova mana twamona yo wá ko.”+ 21 Vava bamene kubavumisa, babayambwidi, wau balembi solola kuma kia kubatumbila ye wonga wa nkangu,+ kadi yau awonso bakembelelenge Nzambi mu dina divangamene. 22 Kadi muntu ona wawukwa muna sivi diadi, vioka mvu 40 kakala miau.
23 Vava babayambwidi, bele kwa alongoki ankaka, babasamunuini mawonso bavoveso kwa nganga zambuta ye akuluntu. 24 Una bawidi mo, basambidi kumosi kwa Nzambi, oku vo:
“E Mfumu Nzambi, ngeye wavanga e zulu yo ntoto ye kalunga ye lekwa yawonso ina mo,+ 25 ngeye wavovela muna mwand’avelela, muna nua wa se dieto Davidi+ wa selo kiaku: ‘Ekuma e zula inina mu nkinda-nkinda, o nkangu uyindulwilanga mambu makondwa o mfunu? 26 E ntinu mia nza bakubamene, ayadi bakutakene nze muntu mosi muna nuanisa Yave* ye kuswa kiandi.’*+ 27 Erodi yo Pontio Pilato+ yo wantu a zula, kumosi yo nkangu a Isaele, bakutakene mu mbanza yayi mu telamena Yesu wa selo kiaku kiavelela, ona wakusa,+ 28 bakutakene bavanga mana wasakula. Oyambwidi vo ediadi diavangama muna nkum’aku ye mun’owu wa luzolo lwaku.+ 29 E Yave,* owau sia sungididi muna mavumisa mau, sadisa ntaudi zaku bazindalala vovela diambu diaku kuna unkabu wawonso, 30 ekolo olambwidi koko kwaku muna wuka yo vanga sinsu ye masivi+ muna nkumbu a Yesu wa selo kiaku kiavelela.”+
31 Una badodokelele,* e fulu kina bakutakene kizakamene, yau awonso bazele ye mwand’avelela,+ bavovele diambu dia Nzambi kuna unkabu.+
32 Vana ntandu, e ndonga ina ikwikidi bakedi yo ntima mosi yo nyindu mosi, ke vakedi muntu ko muna yau ovovele vo o mavua kena mau i mandi kaka, kansi basadidi kumosi e lekwa yau yawonso.+ 33 Muna nkuma wawonso antumwa bakwamanene sila lufuluku lwa Mfumu Yesu umbangi,+ yau awonso bazele ye nsambu za Nzambi. 34 Ke mosi ko muna yau wakondwa lekwa,+ kadi awonso ana bakala ye mpatu yovo nzo batekele zo yo twasa e nzimbu, 35 yo vana zo kwa antumwa.+ Oyau mpe bakayanisi zo kwa konso muntu, mun’owu wa nsatu zandi.+ 36 Yosefe ona wayikilwanga kwa antumwa vo Banaba+ (diasekolwa vo “Mwan’a Lufiaulwisu”), wa Nlevi wa musi Kupero, 37 wakala ye mpatu, otekele yo, otwese nzimbu kwa antumwa.+