Wantete wa Paulu Kuna kwa Esi Tesalonika
4 Kuna diaka e sambu ampangi, wauna nuatambula kwa yeto o nkanikinu wa mpila ina nufwete kangalela muna yangidika Nzambi,+ wauna nukangalelanga, tunuwondelele yo kunudodokela muna Mfumu Yesu vo nuvanganga wo una ufwene. 2 Kadi nuzeye nkanikinu mina twanuvana muna Mfumu Yesu.
3 Kadi i luzolo lwa Nzambi lwalu vo nuakala nuavauka,+ nuayikenga muna mavangu ma zumba.*+ 4 Konso muntu muna yeno kafwete zaya yala e nitu andi*+ muna vauka+ yo zitu, 5 ke mu zinu diasaka dia vukana ko+ nze esi zula ana ke bazeye Nzambi ko.+ 6 Ke vakadi muntu ko oviokesa e tezo muna diambu diadi yo kota mpangi andi nsoki, kadi Yave* olanda e kunda muna mambu mama mawonso, nze una twateka kunuzayisa yo toma kunulukisa. 7 Kadi Nzambi katubokela muna usafu ko, kansi muna vauka kaka.+ 8 Dianu vo, ndiona obembolanga e diambu diadi, ke bembolanga muntu ko, kansi Nzambi+ kebembolanga ona okunuvananga mwand’andi avelela.+
9 Vo i diambu dia songa nzolani a ungudi,+ ke dina mfunu ko twanusonekena, kadi yeno kibeni nualongwa kwa Nzambi vo nuzolananga.+ 10 I wau nuvanganga kwa mpangi zawonso bena mu Makedonia yawonso. Kansi tunukasakese ampangi, nuasakisa wo vanga. 11 Nuvanga mawonso nuakadila kuna luvuvamu,+ nusianga e sungididi muna mambu ma yeno kibeni+ yo sala muna moko meno+ wauna twanukanikina, 12 kimana nuakangalela muna unsongi vana vena awana bena kuna mbazi,+ ke nukondwa lekwa ko.
13 Kansi ampangi, ke tuzolele ko vo nualembi zaya e diambu mu kuma ki’awana balele muna lufwa,+ kimana nualembi mona e ntantu zina bemonanga awana ke bena ye vuvu ko.+ 14 Kadi avo tukwikilanga vo Yesu wafwa yo fuluka,+ o Nzambi mpe muna Yesu ofutumuna awana balele muna lufwa.+ 15 Kadi edi tunuzayisi muna diambu dia Yave,* ankaka muna yeto ana bekala o moyo muna ngiz’a Mfumu ke bevita awana balele muna lufwa ko; 16 e kuma kadi o Mfumu yandi kibeni okulumuka tuka kuna zulu, ye mbok’a lutumu ye nding’a mbasi ambuta+ ye mpungi a Nzambi, awana bafwa muna Kristu yau beteka futumuka.+ 17 I bosi, oyeto tuzinganga owau, tusala yo moyo, tunatwa kumosi yo yau muna matuti+ kimana twawanana yo Mfumu+ muna ngambwila; muna mpila yayi tukadila kumosi yo Mfumu ntangwa zawonso.+ 18 Dianu vo, nufiauziananga muna mambu mama.