Wantete wa Paulu Kuna kwa Esi Korinto

9 Nga ki mvevoki ko e? Nga ki ntumwa ko e? Nga kiamona Yesu wa Mfumu eto ko e?+ Nga yeno ke nu salu kiame ko muna Mfumu e? 2 Avo ki ntumwa ko kuna kw’akaka, kuna kwa yeno i ntumwa kikilu! Kadi yeno i dimbu kia kintumwa kiame muna Mfumu.

3 E mvutu zame kuna kw’awana bekumfundisanga i zazi: 4 Nga oyeto ke tuna yo nswa wa* dia yo nua ko e? 5 Nga katuna yo nswa wa sompa nkento* wa munkwikizi ko+ yo kangala yandi nze ntumwa zankaka ye mpangi za Mfumu+ yo Kefa?*+ 6 Nga mono kaka yo Banaba+ ke tuna ye nswa ko wa yambula sala muna kukidikila? 7 Nani osalanga e salu kia kisoladi muna nzimbu za yandi kibeni? Nani olenda kuna mpatu a vinyu yo lembi dia bundu yandi?+ Yovo nani ovungulanga e kambi dia mameme yo lembi nua kimvumina kiau?

8 Nga mu ngindu zame mpovele mambu mama? Yovo, o Nsiku mpe ke mambu mama ko uvovelanga? 9 Kadi muna Nsiku a Mose mwasonama vo: “Kukaki nu’a ngombe ko ekolo ibundanga e mbwaza.”+ Nga Nzambi ngombe ketokanenanga? 10 Yovo muna wete dieto kavovele wo e? Kieleka, muna wete dieto diasonamena, e kuma kadi ndiona ovatanga ye ndiona obundanga mbwaza, besalanga ye vuvu kia tambula kunku kiau.

11 Kele vo tukunini mambu ma mwanda vovo nuina, nga diambi avo tutambwidi lusadisu lweno muna kinsuni e?+ 12 Avo akaka bena yo nswa* wa tambula lusadisu lweno, nga ka yeto ko tulutidi vua lusadisu o mfunu e? Kansi, ke tusadilanga nswa wau ko,+ tuzizidilanga mambu mawonso, kimana twalembi kakidila e nsangu zambote mu kuma kia Kristu.+ 13 Nga ke nuzeye wo ko vo awana besalanga e salu kiavauka, lekwa ya tempelo bedianga? Awana besadilanga mpe vana ziku, nga ke vana ziku ko betambulwilanga kunku kiau e?+ 14 Kiaki i kuma o Mfumu kakanikina awana besamunanga nsangu zambote bazingila mpe muna nsangu zambote.+

15 Kansi, kisidi sadila nkutu mambu mama ko.+ Kisonekene mo ko kimana yavangilwa mo, kadi diambote yafwa kwame—ke mu yambula muntu ko kakitula lusanu lwame se lwankatu!+ 16 Avo isamunanga e nsangu zambote, ke kuma kia kuyisanina ko, kadi i salu kiokio yayekekwa. Kadi tâtu kwa mono avo kisamwini nsangu zambote ko!+ 17 Avo mu luzolo lwame isadilanga e salu kiaki, nsendo itambula; kansi kana nkutu kisadidi kio mu luzolo lwame ko, yakinu kaka ye uselo una yayekekwa.+ 18 Ozevo, nsendo ame nki? Vava isamunanga e nsangu zambote, ngovo isamunanga zo, kimana yalembi sadila mu mpila yambi e wisa* kiame muna nsangu zambote.

19 Kana una vo mpevokele muna wantu awonso, mono kibeni ikikitwidi se mbundu kw’awonso, kimana yabaka wantu ayingi. 20 Kuna kwa Ayuda nkitukidi nze Nyuda, kimana yabaka Ayuda;+ kuna kw’awana bena ku nsi a nsiku, nkitukidi nze mono ngina kunsi a nsiku, kana una vo mono kibeni kina ku nsi a nsiku ko, kimana yabaka awana bena ku nsi a nsiku.+ 21 Kuna kwa minkondwa-nsiku, nkitukidi nze munkondwa-nsiku, kana una vo kikondelo nsiku ko vana ndose a Nzambi, kansi ku nsi a nsiku a Kristu+ ngina, kimana yabaka minkondwa-nsiku. 22 Kuna kwa atovoki, nkitukidi nze ntovoki kimana yabaka atovoki.+ Muna mawonso nkitukidi nze wantu a mpila zawonso avo dilendakana kimana yavuluza akaka. 23 Ivanganga mawonso mu kuma kia nsangu zambote, kimana yasamuna zo kw’akaka.+

24 Nga ke nuzeye wo ko vo muna nsaka za nkula,* awonso belundumukanga, kansi mosi kaka otambulanga nsendo? Nulundumukina muna mpila ina nufwete bakila nsendo.+ 25 Awonso ana bekotanga muna nsaka, volo besonganga muna mambu mawonso. Kanele vo bevanganga wo muna tambula kolowa iwolanga,+ kansi oyeto ina ilembi wolanga.+ 26 Dianu vo, kitikunanga nkatu-nkatu ko;+ kiwandanga nkomi nkatu-nkatu ko nze muntu owandanga tembwa; 27 kansi iwandanga e nitu ame+ yo bunduna yo, kimana wau nsamunuini kw’akaka, omono kibeni yalembi tumbwa.