Wanzole wa Tusansu
24 Yoase mvu nsambwadi kakala miau vava kayantika yala,+ mvu 40 kayala muna Yerusaleme. E nkumbu a ngudi andi Sibia wa musi Bere-seba.+ 2 Yoase wavanga mambu mambote vana meso ma Yave e lumbu yawonso ya Yoyada wa nganga.+ 3 Yoyada osolele Yoase akento wole, owutidi wan’amakala yo wan’amakento.
4 I bosi, Yoase okedi ye luzolo lwa vangulula e nzo a Yave.+ 5 Muna kuma kiaki, okutakese anganga ye Anelevi, ubavovese vo: “Nuenda muna mbanza za Yuda, nutambula nzimbu kwa nkangu wawonso a Isaele muna vangulula nzo a Nzambi eno+ mvu ke mvu; nusala e salu kiaki mu nzaki.” Kansi, Anelevi ke basadidi kio mu nzaki ko.+ 6 I dianu vo, ntinu obokele Yoyada wa ngang’ambuta, umvovese vo:+ “Ekuma olembele tumina Anelevi benda muna Yuda ye Yerusaleme balomba mpaku avauka ina yasikidiswa kwa Mose+ wa selo kia Yave, mpaku avauka ya nkutakani a Isaele mu kuma kia saba kia Kimbangi?+ 7 Kadi wan’a Ataleya,+ nkento ndiona wa kimpumbulu, babangula nzo a Nzambi aludi,+ babonga lekwa yawonso yavauka ya nzo a Yave, basadila yo muna nsambil’a teke ya Bale.” 8 Bavanga nkela+ muna lutumu lwa ntinu yo sia yo kuna mbazi a nzo a Yave,+ vana ndambu a vitu. 9 I bosi, baboka e nkoki muna Yuda ye Yerusaleme vo batwasila Yave e mpaku avauka+ ina kasikidisa o Mose wa selo kia Nzambi aludi kwa Isaele muna makanga. 10 Akuluntu ye nkangu wawonso bayangalala,+ batwasa tukau yo kobola to muna nkela yavana yazala.*
11 Anelevi vava banatanga e nkela kwa ntinu yo mona vo nzimbu zayingi zakalanga mo, o nsoneki a ntinu yo nsunzudi a ngang’ambuta bayendanga katula e nzimbu, i bosi bavutulanga e nkela+ vana fulu kiandi. I wau bavanganga lumbu ke lumbu, nzimbu zayingi bakutikanga. 12 O ntinu yo Yoyada bavananga e nzimbu kw’akengi a salu kia nzo a Yave, oyau bafutanga awudi a matadi ye akwa umbangu muna vangulula e nzo a Yave+ ye asadi a salu ya sengwa ye nsongo muna vangulula e nzo a Yave. 13 Akengi a salu bayantika e salu, e salu kia vangulula kianungunuka muna wisa kiau, batoma vangulula e nzo a Nzambi aludi yo siamisa yo wauna yateka kala. 14 Vava bamanisa e salu, e nzimbu zina zasala batwasa zo kwa ntinu ye kwa Yoyada, basadila zo muna vanga salanganu ya nzo a Yave, salanganu ya salu, salanganu ya tambikila tukau ye mbungwa ye salanganu ya wolo ye palata.+ Bakelanga yimenga yangioka+ muna nzo a Yave e lumbu yawonso ya Yoyada.
15 Kuna mfoko a zingu kiandá ye kiakiese,* Yoyada ofwidi; mvu 130 kakala miau vava kafwa. 16 Banzika muna Mbanz’a Davidi kumosi ye atinu,+ kadi wavanga mambu mambote muna Isaele,+ kuna kwa Nzambi aludi ye nzo andi.
17 Yoyada vava kafwa, akuluntu a Yuda bezidi vumbamena ntinu, o ntinu ubawididi. 18 Bayambwidi nzo a Yave wa Nzambi a mase mau, bayantikidi sadila mavindi mavauka* ye teke, muna kuma kia sumu diau, o makasi ma Nzambi malwakidi Yuda ye Yerusaleme. 19 Yave wabatwikilanga angunza kimana bavutuka kwa yandi, angunza mpe babalukisanga,* kansi ke babawilanga ko.+
20 O mwand’a Nzambi wizidi muna Zakariya wa mwan’a Yoyada+ wa nganga, otelamene vana fulu kiazangama vana vena nkangu, ovovele vo: “I wau wuwu kavovele o Nzambi aludi, ‘Ekuma nukolamenanga nkanikinu mia Yave? Ke nusikila ko! Wau vo nubembwele Yave, yandi mpe okunubembola.’”+ 21 Kansi, bamvuandidi e mfulu,+ bantubidi matadi vana yanzala kia nzo a Yave+ muna lutumu lwa ntinu. 22 Ozevo, Yoase wa Ntinu kasungamena ko walakazi kansonga Yoyada wa se diandi,* ovondele mwan’andi, ona wavova vitila kafwa: “Yambula Yave kamona dio ye kulanda e kunda.”+
23 Kuna lubantiku lwa mvu,* makesa ma Suria bayiza nuanisa Yoase, bakota muna Yuda ye Yerusaleme.+ Bavonda akuluntu+ awonso a nkangu, batwika e sanzu diau diawonso kwa ntinu a Damaseke. 24 Kana una vo lutangu lwa makesa ma Suria lwakete, Yave wayekola vu kiampwena kia makesa+ vana moko mau, kadi Yuda ye Yerusaleme babembola Yave wa Nzambi a mase mau; i dianu batwasila* tumbu muna Yoase. 25 Vava Asuria bansisa (kadi walwala kikilu bansisa), ntaudi zandi bamvuandila e mfulu mu kuma kia menga ma wan’a* Yoyada+ wa nganga kabungula. Bamvondela vana mfulu andi.+ Muna diadi, ofwidi, banzikidi muna Mbanz’a Davidi,+ kansi ke muna ziami kia atinu ko.+
26 Awaya i bamvuandila e mfulu:+ Zabadi wa mwan’a Simati wa Nyamone yo Yeozabade wa mwan’a Simerite wa musi Moabe. 27 O mambu mawonso ma wan’andi ye tumbu yayingi ina kavewa+ ye una kavangulwila+ e nzo a Nzambi aludi, mawonso masonama muna lusansu lwa Nkanda wa Atinu. Amaziya wa mwan’andi oyantikidi yala vana fulu kiandi.