Wantete wa Paulu Kuna kwa Esi Korinto
3 Dianu vo, ampangi, kialenda kunuvovesela nze akwa kimwanda ko,+ kansi nze akwa kinitu kaka, nze yingiana-ngiana+ muna Kristu. 2 Kimvumina yanunuika, ke madia mangolo ko, kadi ke nuakala nuafwana ko mu dia mo. Kana nkutu owau ke nuafwana ko mu dia mo,+ 3 kadi nuakinu akwa kinitu.+ Wau vo vena ye kimpala ye ntantani vovo nuina, nga ke nu akwa kinitu ko+ yo kangalela nze wantu a nza? 4 Kadi vava mosi kevovanga vo: “Omono kwa Paulu mvuilu,” wankaka vo: “Omono kwa Apolo,”+ nga ke mpasi wantu ko nulandang’e?
5 Ozevo, Apolo i nani? Elo, Paulu i nani? I mpasi selo,+ muna yau nuakwikidila, wauna Mfumu kavana kwa konso muntu. 6 Omono yakuna,+ Apolo wayitila maza,+ kansi Nzambi kaka wakolesa yo, 7 i dianu vo, ona wakuna ye ndiona wayitila maza mpavala kwandi, kansi Nzambi kaka wakolesa yo.+ 8 Ndiona okunanga ye ndiona oyitilanga maza salu kimosi besalanga,* kansi konso muntu otambula nsendo mun’owu wa mavangu mandi.+ 9 Kadi tu asadi kumosi yo Nzambi. Oyeno nu mpatu a Nzambi, nu nzo a Nzambi.+
10 Mun’owu wa nsambu za Nzambi zina yavewa, nze ntungi a ngangu,* yakuba e nkubilwa,+ kansi wankaka otungilanga vo. Konso muntu yambula katoma tala una ketungilanga vo. 11 Kadi ke vena muntu ko olenda kuba e nkubilwa ankaka avo ke ina yakubwa ko, i sia vo, Yesu Kristu.+ 12 Avo muntu otungidi vana nkubilwa, wolo, palata, matadi mantalu, mabaya, nianga yovo titi, 13 e salu kia konso muntu kisenzekwa, kadi o mwini usonga kio, kadi e tiya tusenzeka mawonso,+ tusonga mpe una wina e salu kia konso muntu. 14 Avo e salu katungidi o muntu vana nkubilwa kisikidi, nsendo ketambula; 15 avo salu kia muntu kizinini, mfwilu kebaka, kansi yandi kibeni vuluka kevuluka; elo, okala nze muntu ovulukidi va tiya.
16 Nga ke nuzeye wo ko vo oyeno nu tempelo a Nzambi,+ o mwand’a Nzambi omo yeno ukalanga e?+ 17 Avo muntu ofwasidi tempelo a Nzambi, o Nzambi okumfwasa; kadi e tempelo a Nzambi yavauka, oyeno nu tempelo yayi.+
18 Ke vakadi muntu ko kayivuna: Avo muntu vovo nuina obenze vo nkwa ngangu omu tandu* kiaki, yambula kakituka se zowa, kimana kakala se nkwa ngangu. 19 E ngangu za nza yayi i uzowa kuna kwa Nzambi, kadi diasonama vo: “Obakilanga akwa ngangu muna umpuki wau.”+ 20 Diasonama diaka vo: “Yave* ozeye wo vo e makani ma akwa ngangu ke mena mfunu ko.”+ 21 Dianu vo, ke vakadi muntu ko okuyisanina muna wantu; kadi lekwa yawonso yeno, 22 kana Paulu, kana Apolo, yovo Kefa*+ kana nza, kana zingu, kana lufwa, kana lekwa ina owau yovo ina ikwiza, yawonso kwa yeno ivuilu; 23 kansi oyeno kwa Kristu nuvuilu;+ vo i Kristu, kwa Nzambi kavuilu.