Wantete wa Paulu Kuna kwa Esi Tesalonika

3 Dianu vo, vava ke twalenda diaka zizidila ko, twayindula vo diambote twakala yeto kaka kuna Atenai;+ 2 twatuma Timoteo+ wa mpangi eto ye selo kia Nzambi* muna nsangu zambote za Kristu, kanusikidisa* yo kulufiaulwisa muna lukwikilu, 3 kimana valembi kala muntu ovutuka manima* muna mpasi zazi. Kadi yeno kibeni nuzeye wo vo ke tulendi venga e mpasi zazi ko.*+ 4 Kadi vava twakala yeno, twateka kunuzayisa vo mpasi tumona, i diau mpe divangamanga, wauna nuzeye.+ 5 Muna kuma kiaki, wau kialenda diaka zizidila ko wau twavambana, yatuma Timoteo kimana yazaya owu wina lukwikilu lweno,+ kadi yakala ye wonga vo o Nkadi ampemba+ nanga wanuvukumuna, e salu kieto kiakituka se kiankatu.

6 Kansi Timoteo wau katukidi kwa yeno,+ utuzayisi e nsangu zambote za nukwikilu yo zola kweno, ntangwa zawonso nukutuyindulanga ye kiese kiawonso, nuna ye luzolo lwa kutumona wauna oyeto mpe twinina ye luzolo lwakunumona. 7 Dianu vo, ampangi, muna ntantu* ye mpasi zeto zawonso, nukutufiaulwisanga muna lukwikilu lusonganga.+ 8 Wau nusikidi muna Mfumu, oyeto tukumamene.* 9 Aweyi tulenda vutulwila matondo kwa Nzambi muna diambu dieno, muna kiese kiayingi tukunumwenanga vana ndose a Nzambi eto? 10 Fuku yo mwini tudodokelanga kikilu kimana twamonana yeno* yo kudikila dina dikondelo muna lukwikilu lweno.+

11 Yambula Nzambi wa Se dieto yo Mfumu eto Yesu batuziulwila e nzila kimana twiza kwa yeno. 12 Vana ntandu, yambula Mfumu kanukudikila, elo, kanuwokesela o zola muna muntu yo nkwandi+ ye kw’awonso, wauna oyeto tukunuzolelanga, 13 kimana kasikidisa ntima mieno, nuakondwa lusembo, nuakala nuavelela vana ndose a Nzambi+ wa Se muna ngiz’a Mfumu eto Yesu+ ye avauki andi awonso.