Ntalu
20 Muna ngonde antete, o nkangu awonso a Isaele ulweke muna makanga ma Zini, o nkangu uyantikidi zingila muna Kadese.+ I mûna o Mireyame+ kafwila yo zikwa.
2 O nkangu+ ke wakala yo maza ko muna makanga, mu kuma kiaki bakutakana yo telamena Mose yo Arone. 3 O nkangu watantana yo Mose,+ wavova vo: “Kele vo twafwa kweto vava mpangi zeto bafwa vana ndose a Yave! 4 Ekuma nutwasidi e nkutakani a Yave omu makanga mama, oyeto ye twelezi yeto twafwila mwamu?+ 5 Ekuma nuatuvaikisila muna Engipito yo kututwasa ova fulu kiaki kiambi?+ Ekiaki ke fulu kia kuna mbongo ko yovo nsanda yovo nsing’a vinyu ngatu nganata,* va nkatu mpe maza ma nua.”+ 6 I bosi, Mose yo Arone bakatukidi vana ndose a nkutakani, bele vana mwelo a saba kia wananina, bafukamene yo bokeka e ndose vana ntoto, o nkembo a Yave uyantikidi moneka kwa yau.+
7 I bosi, Yave ovovese Mose vo: 8 “Bonga o nkau yo kutakesa o nkangu, ngeye yo Arone wa mpangi aku, nuvova kwa tadi vana meso mau kimana diavaikisa o maza, ovaikisa o maza muna tadi yo vana mo kwa nkangu ye kwa twelezi banua.”+
9 Muna diadi, Mose obongele o nkau vana ndose a Yave,+ wauna kankanikina. 10 I bosi, Mose yo Arone babokele nkutakani vana ntwal’a tadi, Mose ubavovese vo: “Owau nuwá, yeno akolami! Nga nuzolele vo twanuvaikisila maza omu tadi diadi?”+ 11 Mose ozangwidi koko kwandi, owende nkau andi muna tadi nkumbu miole, o maza mayingi mayantikidi vaika, o nkangu ye twelezi yau bayantikidi nua.+
12 Kuna kwalanda, Yave ovovese Mose yo Arone vo: “Wau vo ke nusongele lukwikilu ko omu mono yo lembi songa vana meso ma nkangu a Isaele vo mono yavauka, ke nukotesa nkutakani yayi ko muna nsi ina ikubavana.”+ 13 Omama i maza ma Meriba,*+ vana Aneyisaele batantanena yo Yave, muna mpila yayi wasonga kwa yau vo wavauka.
14 I bosi, tuka muna Kadese Mose otwikidi anati a nsangu kwa ntinu a Edome+ vo: “I wau wuwu kavovele o mpangi aku Isaele:+ ‘Ongeye otomene zaya e mpasi zawonso twamona. 15 Mase meto bayenda kuna Engipito,+ mvu miayingi*+ twakala kuna Engipito, esi Engipito mpasi batumwesa kumosi ye mase meto.+ 16 Kuna kwalanda, twaboka kwa Yave,+ oyandi watuwa, watwika e mbasi andi+ yo kutuvaikisa muna Engipito, owau ova Kadese twina, e mbanza ina omu mwingilu a zunga kiaku. 17 Dodokolo, yambula twaviokela mu nsi aku. Ke tuviokela mu konso kiana ko yovo mpatu a vinyu, ke tunua maza ma konso sima ko. Mu Bala-bala a Ntinu tuviokela lembi viluka ku lunene yovo ku lumonso yavana tuvioka e zunga kiaku.’”+
18 Kansi, Edome umvutwidi vo: “Kulendi viokela mu zunga kieto ko. Avo ovangidi wo, ivaika yo nsosolo mu kwiza wanana yaku.” 19 Aneyisaele bamvovese vo: “Muna bala-bala tuviokela, avo oyeto ye twelezi yeto tunuini maza maku, sumba tusumba mo.+ Vioka kaka tuzolele vioka kiamalu,+ ke tuzolele diambu diankaka ko.” 20 Kansi, Edome ovovele vo: “Kuvioki ko.”+ Edome ovaikidi yo nkangu ayingi ye vu kiangolo* kawanana yandi. 21 Muna mpila yayi, Edome kayambwidi ko vo Isaele kaviokela muna zunga kiandi. Muna kuma kiaki, Isaele okondolokele Edome.+
22 O nkangu a Isaele, e nkutakani yawonso iyalukidi muna Kadese, ilweke vana Mongo a Ore.+ 23 I bosi, Yave ovovese Mose yo Arone vana Mongo a Ore, muna mwingilu a nsi ya Edome vo: 24 “Arone fwa kefwa yo zikwa wauna wazikilwa mase mandi.*+ Ke kota ko muna nsi ina ivana kwa Aneyisaele, kadi yeno awole nuakolamena nkanikinu ame mu kuma kia maza ma Meriba.+ 25 Bonga Arone yo Elaza wa mwan’andi, ubanata kuna ntandu a Mongo a Ore. 26 Katula e mvuatu mia Arone,+ vuika mio kwa Elaza+ wa mwan’andi, o Arone i kûna kefwila.”*
27 Muna kuma kiaki, Mose ovangidi wauna Yave kakanikini. Batombokele kuna Mongo a Ore vana meso ma nkutakani yawonso. 28 Mose okatwidi e mvuatu mia Arone yo vuika mio kwa Elaza wa mwan’andi. I bosi, Arone ofwididi vavana, vana ntandu a mongo.+ Mose yo Elaza bakulumukini tuka kuna mongo. 29 Vava e nkutakani yawonso imwene vo Arone ofwidi, e nzo yawonso ya Isaele idididi Arone mu lumbu 30.+