Wanzole wa Ntinu

20 Muna lumbu yayina, Kizekeya oyelele, fioti fiasala nga wafwa.+ Yesaya wa ngunza wa mwan’a Amoze wizidi, umvovese vo: “I wau wuwu kavovele o Yave: ‘Vana luludiku kwa esi nzo aku; kadi fwa ofwa, kusasuka ko.’”+ 2 Muna kuma kiaki, Kizekeya ovilwidi lose lwandi kuna yaka, oyantikidi samba kwa Yave, oku vo: 3 “E Yave, idodokele, sungamena e mpila ikangalelanga vana ntadisi aku ye kwikizi yo ntima wawonso ye mambu mambote ivanganga vana meso maku.”+ Kizekeya obokomokene ye dilu.

4 Yesaya una kalweke ko vana yanzala kia kati, e diambu dia Yave dizidi kwa yandi, oku vo:+ 5 “Vutuka kwa Kizekeya wa mfidi a nkangu ame, umvovesa vo: ‘I wau wuwu kavovele o Yave wa Nzambi a Davidi wa nkulu aku: “Ngwidi e sambu kiaku. Mbwene mansanga maku.+ Sasula ikusasula.+ Muna lumbu kiantatu, otomboka kuna nzo a Yave.+ 6 Ikudikila mvu 15 muna zingu kiaku,* vuluza ikuvuluza, ivuluza mpe mbanza yayi vana moko ma ntinu a Asuri,+ tanina itanina e mbanza yayi mu kuma kia nkumbu ame ye mu kuma kia Davidi wa selo kiame.”’”+

7 I bosi, Yesaya ovovele vo: “Nutwasa bundu ya nsanda yayuma yatutwa.” Batwese yo, basidi yo vana vumbu, Kizekeya malembe-malembe osasukidi.+

8 Kizekeya oyuvuidi Yesaya vo: “Nkia sinsu+ kisonga vo Yave sasula kekunsasula ye muna lumbu kiantatu itomboka kuna nzo a Yave?” 9 Yesaya ovutwidi vo: “Ekiaki i sinsu kitukidi kwa Yave muna kusonga e ziku vo Yave olungisa dina kavovele: Nga ozolele vo e kini* vana sikada* kiatomboka ntombokelo kumi yovo kiakulumuka ntombokelo kumi e?”+ 10 Kizekeya ovovele vo: “Diasazu e kini kiatomboka ntombokelo kumi vana sikada ke mu kulumuka ntombokelo kumi ko.” 11 Yesaya wa ngunza ododokele Yave; o Nzambi oyambwidi vo e kini kina kiayikulumukina ntombokelo kumi vana sikada ya Akazi kiatomboka ntomboka kumi.+

12 Muna ntangwa yayina, o ntinu a Babele, Berodake-baladani wa mwan’a Baladani, otwikidi nkanda yo lukau kwa Kizekeya, kadi owidi wo vo Kizekeya yela kayelele.+ 13 Kizekeya ubatambwidi* yo kubasonga e nzo ya tusalu+ twandi twawonso—palata, wolo, mazi ma balasamu yo mazi mankaka mantalu, nuaninua yandi ye lekwa yawonso yakala muna tusalu twandi. Ke mwakala lekwa ko muna nzo andi* ye muna luyalu lwandi lwawonso kina o Kizekeya kalembi kubasonga.

14 I bosi, Yesaya wa ngunza wizidi kwa Kizekeya wa Ntinu, unyuvuidi vo: “Nkia diambu bavovele o wantu awaya ye akweyi batukidi?” Kizekeya ovutwidi vo: “Ku nsi yandá batukidi, kuna Babele.”+ 15 I bosi, Yesaya oyuvuidi vo: “Nki bamwene omu nzo aku?”* Kizekeya ovutwidi vo: “Bamwene lekwa yawonso ina omu nzo ame.* Ke muna lekwa ko muna tusalu twame kina ndembele kubasonga.”

16 I bosi, Yesaya ovovese Kizekeya vo: “Wá e diambu dia Yave,+ 17 ‘Tala! Muna lumbu ikwiza, e lekwa yawonso ina omu nzo aku* ye yawonso yalunda akulu aku yamu unu kiaki, inatwa kuna Babele.+ Ke musala lekwa ko,’ u kavovele o Yave. 18 ‘Ankaka muna wan’aku ana owuta, natwa benatwa+ yo kituka se mbanda-mbanda muna lûmbu lwa ntinu a Babele.’”+

19 Muna diadi, Kizekeya ovovese Yesaya vo: “E diambu dia Yave dina ovovele diambote.”+ I bosi, okudikidi vo: “Diambote wau vo vekala ye luvuvamu yo lutaninu* muna kolo kia zingu kiame.”*+

20 Vo i mambu mankaka ma lusansu lwa Kizekeya ye nkum’andi ye zinga+ ye mvuila katimisa watwasanga maza muna mbanza,+ nga ke masonama ko muna nkand’a lusansu lwa ntinu mia Yuda? 21 I bosi, Kizekeya olele yo mase mandi,+ Manase+ wa mwan’andi oyantikidi yala vana fulu kiandi.+