Yeremiya
49 I wau wuwu kavovele o Yave mu kuma kia Aneyamone:+
“Nga Isaele kena yo wana ko e?
Nga kena yo ndiona osala ye mavua mandi ko e?
Ekuma Malekame+ kakutumwini e Ngadi?+
Ekuma nkangu andi uzingilanga muna mbanza za Isaele?”
2 “‘Muna kuma kiaki, e lumbu mukwiza ina,’ u kavovele o Yave,
Ikituka se fuku diasala e nkatu,
E mavata mandi meyokwa muna tiya.’
‘O Isaele osanza ana bekunsanzanga,’+ u kavovele o Yave.
3 ‘Dila, e Kesebone, kadi e Ai ifwasilu!
Nukaza, e mavata ma Raba.
Nuvuata e ngoto.
Nukaza yo tikuna oku yakuna muna mpaka za matadi,*
Kadi e Malekame mu kinkole ikwenda,
Kumosi ye nganga zandi ye mfumu zandi.+
4 Ekuma okuyisaninanga mu kuma kia ndimba miaku,
Mu kuma kia ndimba miaku mialelama miazala yo maza, e mwan’ankento wakondwa kwikizi?
Ona obundanga e vuvu muna tusalu twandi
Ona ovovanga vo: “Nani okwiza kundwanisa e?”’”
5 “‘Ikutwasila lekwa kiansisi,’ u kavovele o Mfumu Yave a vu,
‘Tuka kw’awana bazungidi.
Omwanganeswa muna ndambu zawonso,
Ke vekala muntu ko okutika ana betina.’”
6 “‘Kansi, kuna kulanda ikutakesa abakami a Aneyamone,’ u kavovele o Yave.”
7 Kuna kwa Edome, i wau wuwu kavovele o Yave a vu:
“Nga ke muna diaka ngangu ko muna Temane?+
Nga tuvididi o tuludiku twambote tw’awana bena yo umbakuzi e?
Nga ngangu zau ziwolele?
8 Nutina, nuvutuka manima!
Nuenda yo zingila muna mwakoboka, e yeno nuzingilanga muna Dedane!+
Kadi mpasi itwasa kwa Esau
Vava ifwana e ntangwa, ivutula e sungididi kiame kwa yandi.
9 Avo avedi a uva bezidi kwa ngeye,
Nga ke besisa uva zankaka ko muna wonzolola?
Avo olwakilu kwa mivi muna fuku,
Nga ke befwasa kaka ko ina bazolele?+
10 Kansi, isanza Esau.
Isenzeka maswekameno mandi,
Kimana kalembi swekama diaka.
11 Sisa wan’aku akondwa mase,
Ikubayambula bakala moyo;
Akento aku ana bafwilwa akala bekumbunda e vuvu.”
12 Kadi i wau wuwu kavovele o Yave: “Tala! Avo awana ke bavewa tumbu kia nua mbungw’a makasi mame ko bafwete yo nua, nga ngeye osiswa wowo lembi tumbwa e? Tumbwa otumbwa, kadi ofwete yo nua.”+
13 “Kadi ndidi e ndofi muna mono kibeni,” u kavovele o Yave, “vo Bozera ikituka se kuma kia mwena wonga,+ kia luvezo, fulu kia fwasakana ye sibu. E mbanza zandi zawonso zikituka se mfuta.”+
14 Ngwidi e nsangu zitukidi kwa Yave,
O nati a nsangu otuminu muna samuna kwa zula vo:
“Nukutakana, nuiza nuana yandi;
Nukubama muna vita.”+
15 “Tala, ikitwidi se lekwa kiakondwa o mfunu vana vena zula,
Lekwa kia luvezo kwa wantu.+
16 O wonga wamwesanga,
Yo lulendo lwa ntim’aku luvunini,
E ngeye ozingilanga muna nduka mia matadi,
Okalanga muna mongo usundidi o lá.
Kana nkutu otungidi nzialw’aku kuna ntandu nze ngo-zulu,
Ikukulumuna tuka kwakuna,” u kavovele o Yave.
17 “Edome kafwete kituka se kuma kia mwena wonga.+ Awonso beviokela vo, bemona wonga yo sika mumpiozi mu kuma kia vuku yandi yawonso. 18 Nze una wavangama muna lufwasu lwa Sodoma ye Ngomora ye mbanza zakala lukufi,”+ u kavovele o Yave, “ke muzingila diaka muntu ko, ngatu mwan’a muntu kanangina mo.+
19 “Tala, vekwiza muntu onuanisa madilu ma luvuvamu nze nkosi+ itukidi muna mfuta muna mbel’a Yodani, kansi vana vau ikuntinisa vena kena. Ikuntumbikila ndiona wasolwa. Kadi nani ofwanane yame? Nani olenda kumfidisa e mpaka? Nkia mvungudi olenda telama vana ntadisi ame?+ 20 Ozevo, e wantu, nuwá e nzengo zina Yave kabakidi mu kuma kia Edome ye dina kakanini mu kuma kia awana bezingilanga muna Temane:+
Wan’a mameme benatwa kwandá.
E fulu yau ya zingila osisa yo e nkatu mu kuma kiau.+
21 O ntoto uzakamene mu kuma kia zú dina kabwididi.
Vena ye kazu!
E mazu mawakane yakuna Mbu Ambwaki.+
Muna lumbu kiakina, e ntima mia makesa ma Edome
Mikituka nze ntim’a nkento una mu nsongo.”
23 Mu kuma kia Damaseke:+
“Kamati+ yo Ampadi bamwene nsoni,
Mu kuma kia nsangu zambi bawidi.
Bazelokele ye wonga.
O kalunga okumbidi, kalendi lemvolwa ko.
24 Damaseke kena diaka ye unkabu ko.
Ovilukidi muna tina, obakamene wonga.
Ntantu ye nsongo mimbakidi,
Nze nkento owutanga.
25 Ekuma mbanza ya nkembo ke ibembwelo ko,
E mbanza ya kiese?
26 Kadi matoko mandi bebwila vana ntanda,*
O makesa mawonso befwa muna lumbu kiakina,” u kavovele o Yave.
27 “Isia tiya muna yaka kia Damaseke,
E tiya tubomona nzo zangolo za Benadadi.”+
28 I wau wuwu kavovele o Yave mu kuma kia Keda+ ye yimfumu ina katufakesa Nebukandesa* wa Ntinu a Babele:
“Nutelama! Nutomboka kuna Keda
Nufwasa wan’a este.
29 E saba yandi ye twelezi yandi ibongwa,
Nlele mia saba yau ye mavua mau mawonso.
E samo yau inatwa,
Wantu bekunkazila, oku vo: ‘Wonga una muna fulu yawonso!’”
30 “Nutina, nuenda kwandá!
Nuswekama muna fulu yakoboka, e nkangu a Kaso,” u kavovele o Yave.
“Kadi Nebukandesa* wa Ntinu a Babele ndekwa zambi kasikidisi mu kuma kieno,
Kani diambi kena diau mu kuma kieno.”
31 “Nutelama, nuanuanisa zula kina muna luvuvamu,
Bezingilanga muna ngemba!” u kavovele o Yave.
“Kikondelo mielo ko ngatu mbindi; bezingilanga muna fulu ya yau kaka.
32 E samo zau zikala se sanzu,
E twelezi yau yayingi isanzwa.
Ikubamwanganesa muna ndambu zawonso,*
Ana bezenganga nsuki+
Ikubatwasila sumbula muna ndambu zawonso,” u kavovele o Yave.
33 “Kaso ikituka se tininu dia mbulu,
Ikituka se mfuta yakwele mvu.
Ke muzingila muntu ko,
Ke muntu ko onangina mo.”
34 E Diambu dia Yave diayiza kwa Yeremiya wa ngunza mu kuma kia Elame+ muna lubantiku lwa luyalu lwa Sedekiya+ wa ntinu a Yuda, oku vo: 35 “I wau wuwu kavovele o Yave a vu, ‘Itolola mfumba wa Elame,+ e nto ya* nkum’andi. 36 Itwasila Elame tembwa yá ituka muna nsuka yá za zulu, imwanganesa nkangu miandi muna tembwa yayi yawonso. Ke vekondwa zula ko ina ke besinga natwa ko awana bemwanganeswa muna Elame.’”
37 “Imwanganesa nkangu a Elame vana vena mbeni zau ye vana vena awana bevavanga katula mioyo miau; ikubatwasila e mpasi, nsita za makasi mame zilema muna yau,” u kavovele o Yave. “Ikubatwikila nsosolo yavana ikubafukisa emvimba.”
38 “Isia kunda kia kimfumu kiame muna Elame,+ ifwasa ntinu au ye mfumu zau,” u kavovele o Yave.
39 “Kansi muna lumbu yambaninu, ikutika abakami a Elame,” u kavovele o Yave.