Kuna kwa Esi Ngalatia
6 Ampangi, avo muntu lembi wo zaya, ovengomokene muna nzila, yeno nuazikuka muna mwanda nuvava singika o muntu ndioyo kuna lulembamu.+ Kansi, nuyikenga+ kimana yeno mpe nualembi tontwa.+ 2 Nunataziananga mazitu,+ kadi i mpila yayi nulungisila nsiku a Kristu.+ 3 Kadi, avo muntu oyindwidi vo mfunu kena, wau vo kena kwandi mfunu ko,+ vuna kekuyivunanga. 4 Kansi, yambula konso muntu kafimpa mavangu mandi,+ ozevo okala ye kuma kia yangalala, ke mu kuyitezanesa ye ankaka ko.+ 5 Kadi konso muntu onata e zitu diandi.*+
6 Vana ntandu, ndiona olongwanga e diambu dia Nzambi, yambula kakayana lekwa yawonso yambote ye ndiona okunlonganga.+
7 Ke nuyivuni ko: o Nzambi ke tianginikinuanga nzunu ko. Kadi o muntu konso kina kekuna i kiau mpe kekutika;+ 8 kadi ndiona okunina muna nitu, muna nitu kekutikila lufwasu,* kansi ndiona okunina muna mwanda, muna mwanda kekutikila moyo a mvu ya mvu.+ 9 Dianu vo, ke tuyambula vanga diambu diambote ko, kadi tukutika muna ntangw’andi, avo tulembele yoya.+ 10 Ozevo, konso ntangwa tubakidi e lau, yambula twavanga edi diambote kwa wantu awonso, musungula kw’awana tuna yau entwadi muna lukwikilu.
11 Se nutadi sono yanene inusonekene muna koko kwame.
12 Awonso ana bazolele yangidika akaka mun’owu wa nsiku mia wantu,* yau bevavanga kunukomekena nuazengwa, bevanganga wo kimana balembi bangikwa mu kuma kia nti ampasi* a Kristu. 13 Kadi, kana nkutu awana bazengwa ke belundanga Nsiku ko,+ kansi bazolele vo yeno nuazengwa kimana bakala ye kuma kia kuyisanina muna nitu zeno. 14 Kansi, kizolele nkutu kuyisana ko, nanga muna nti ampasi* kaka wa Yesu Kristu wa Mfumu eto,+ kuna kwa mono e nza muna yandi yavondelwa,* kansi kuna kwa nza, mono yavondwa. 15 Kadi o zengwa yovo lembi zengwa ke kuna mfunu ko,+ kansi okituka se vangwa kiampa i dina mfunu.+ 16 Awonso ana bekangalelanga muna nkanikinu wau, luvuvamu ye nkenda kuna kwa yau, elo, kuna kwa Isaele a Nzambi.+
17 Tuka owau, ke vakadi muntu ko okuntokanesa, kadi mu nitu ame mwina ye dimbu ya ntaudi a Yesu.+
18 E nsambu za Mfumu eto Yesu Kristu, yambula zakala ye mwanda una nusonganga, ampangi. Amen.