Wantete wa Samuele

10 Samuele obongele bungwa kia mazi, obukumwini mo vana ntu a Saulu.+ Umfibidi yo kumvovesa vo: “Yave ukusidi wakala mfidi+ a nkangu andi.*+ 2 Vava okunsisa o unu, omona wantu wole vana ndambu a ziami kia Rakele+ muna mvivu a Benyamini kuna Selesake, bekuvovesa vo: ‘E mabuluku mana wayele vavi, masolokele, owau, se diaku oyambwidi tokanena mabuluku,+ ngeye ketokanenanga. Ovovele vo: “Aweyi mfwete vanga mu solola mwan’ame?”’ 3 Tuka kwakuna wenda yavana olwaka vana nti anene a Tabo, kwakuna owanana yo wantu tatu bekwenda sambila Nzambi aludi kuna Betele.+ O mosi onata wan’a tatu a nkombo, wankaka onata mbolo zitatu, o mosi onata nkalu anene ya vinyu. 4 Bekukayisa yo kuvana mbolo zole, ofwete tambula mbolo zina bekuvana. 5 I bosi olwaka kuna kundubulu kia Nzambi aludi, kuna kwina makesa ma Afelesetia. Vava olwaka kuna mbanza, owanana ye buka kia ngunza zikulumukanga tuka kuna bata besakulanga; vekala yo wantu bekubavita kuna ntwala, besikanga e nsambi ye fingoma-ngoma ye tutu ye kokolo. 6 Mwand’a Yave ukukumika,+ osakula yau yo kituka se muntu ankaka.+ 7 Vava sinsu yayi imoneka, vanga konso dina olenda, kadi Nzambi aludi una yaku. 8 Okumvita kuna ntwala kuna Ngilengale,+ i kûna ikuwana kimana yatambika yimenga ya ngioka ye yimenga ya ungudi. Lumbu nsambwadi ovingila yavana ilwaka. I bosi ikuzayisa mana ovanga.”

9 Vava Saulu kafila Samuele e nima, Nzambi wayantika vilula ntim’a Saulu, e sinsu yayi yawonso imonekene e lumbu kiakina. 10 Tuka kwakuna bele kuna kundubulu, e buka kia angunza bawanane yandi. Vana vau o mwand’a Nzambi unkumikini,+ oyantikidi sakula+ vana bena. 11 Awonso ana banzeye vava bamwene vo mu sakula kena ye angunza, bavovaziane vo: “Adieyi dibwididi mwan’a Kisi? Saulu mpe mosi muna angunza?” 12 I bosi muntu mosi vavana oyuvuidi vo: “Nani i se diau?” Ozevo, e mvovo emi miakituka se ngana: “O Saulu mpe mosi muna angunza?”+

13 Vava kamene sakula, wele kuna bata. 14 I bosi mpangi a se dia Saulu oyuvuidi Saulu ye ntaudi andi, oku vo: “Akweyi nuele?” Saulu ovutwidi vo: “Mabuluku twele vavi,+ wau vo ke tusolwele mo ko, tulweke kuna kwa Samuele.” 15 Mpangi a se dia Saulu oyuvuidi vo: “Unzayisa, do, Samuele adieyi kavovese?” 16 Saulu umvutwidi vo: “Utuvovese vo mabuluku masolokele.” Vo i diambu dia kintinu dina Samuele kamvovese, o Saulu kanzayisi dio ko.

17 Samuele okutakese nkangu vana ndose a Yave kuna Misepa,+ 18 ovovese Aneyisaele vo: “I wau wuwu kavovele o Yave wa Nzambi a Isaele: ‘Yavaikisa Isaele muna Engipito, yanuvuluza vana moko ma Angipito+ ye vana moko ma atinu awonso banubangika. 19 Kansi, o unu nubembwele Nzambi eno+ ona wanuvuluza muna mbi yawonso ye mpasi, nuvovele vo: “Ve, utusolela kaka ntinu.” Owau nutelama vana ndose a Yave muna makanda meno ye mafunda meno.’”*

20 I dianu vo, Samuele olombele vo makanda mawonso ma Isaele mafinama,+ e kanda dia Benyamini disolelo.+ 21 Olombele vo kanda dia Benyamini diafinama muna vumu yau, e vumu kia Anemetere kisolelo. I bosi Saulu wa mwan’a Kisi osolelo.+ Kansi, vava bamvavidi ke bansolwele ko. 22 Bayuvuidi Yave vo:+ “Nga o muntu una vava?” Yave ovutwidi vo: “Tala, oswekamene vana kati kwa funda.” 23 Bele ntinu, bamvaikisi vana kati kwa funda. Vava katelamene vana kati kwa nkangu, osundidi wantu awonso o ntela,+ akaka mu mavembo mandi kaka basukilanga. 24 Samuele ovovese nkangu awonso vo: “Nutala ona kasolele Yave,+ kavena muntu ko ofwanane yandi muna nkangu awonso.” Nkangu awonso uvovele mu nding’angolo vo: “Zinga kwaku e ntinu!”

25 Samuele osamwini kwa nkangu mana belombwa kwa atinu,+ osonekene mo muna nkanda yo sia wo muna saba kia Yave. I bosi Samuele osindikidi nkangu awonso, konso muntu kuna nzo andi. 26 Saulu wele kuna nzo andi kuna Ngibeya, makesa mana Yave kasimba e ntima, bele yandi. 27 Akaka muna yimpumbulu bavovele vo: “Aweyi muntu ndioyo kekutuvuluzila?”+ Bamvezele, ke bantwasidi lukau ko.+ Kansi, Saulu kavovele diambu ko.*