Wantete wa Ntinu

3 Solomo okangidi e kangu dia longo ye Faro wa ntinu a Engipito. Osompele* mwan’ankento a Faro,+ untwese kuna Mbanz’a Davidi+ yavana kamana tunga e nzo andi,+ nzo a Yave+ ye yaka yazieta Yerusaleme.+ 2 Kansi o nkangu watambikanga yimenga muna mabata,+ kadi muna ntangwa yayina ke vakala nzo ko yatungwa mu kuma kia nkumbu a Yave.+ 3 Solomo wazolanga Yave, wadiatilanga muna nkanikinu mia Davidi wa se diandi, kansi wakelanga kaka yimenga yo futumuna tukau muna mabata.+

4 O ntinu wele tambika yimenga kuna Ngibone, kadi i bata diasunda o mfunu.*+ Solomo okelele 1.000 dia yimenga yangioka vana ziku diadina.+ 5 Kuna Ngibone, Yave omonekene kwa Solomo muna ndozi, muna fuku, o Nzambi ovovele vo: “Lomba konso kina ozolele vo yavana.”+ 6 Muna diadi, Solomo ovovele vo: “Walakazi wayingi wasonga kwa selo kiaku Davidi wa se diame, wakangalela muna kwikizi ye unsongi ye ntim’asikila vana ndose aku. Yamu unu okunsonganga walakazi wayingi kadi umvene mwana kavuanda vana kunda kiandi kia kimfumu.+ 7 Owau, e Yave wa Nzambi ame, okitwidi selo kiaku se ntinu vana fulu kia Davidi wa se diame, kana una vo i nleke* ye kizeye mambu mayingi ko.*+ 8 Selo kiaku wina vana vena nkangu aku wasola,+ nkangu anene ke ulendi tangakana ko. 9 Dianu vo, vana ntim’a nlemvo kwa selo kiaku kimana kafundisa nkangu aku,+ kazaya swaswanesa e mbote ye mbi,+ kadi nani olenda fundisa nkangu aku wau wayingi?”*

10 E ndomb’a Solomo iyangidikidi Yave.+ 11 Nzambi umvovese vo: “Wau vo olombele ediadi, kulombele zingu kiandá* ko ye kimvuama ngatu lufwa lwa* mbeni zaku, kansi olombele umbakuzi wawá mambu ma mfundu,+ 12 ikuvana dina olombele.+ Ikuvana ntim’a ngangu yo umbakuzi,+ dianu vo ke vakala muntu ko wafwanana yaku ngatu kala diaka ona olenda fwanana yaku.+ 13 Ikuvana mpe ina kulombele ko,+ kimvuama yo nkembo,+ dianu vo ke vekala ntinu wankaka ko ofwanana yaku muna zingu kiaku kiawonso.*+ 14 Avo okangalela muna nzila zame yo lemvokela nkanikinu ye nsiku miame wauna kakangalela Davidi wa se diaku,+ ikuvana mpe zingu kiandá.”*+

15 Vava Solomo kasikamene, obakwidi vo ndozi kalotele. Ovutukidi kuna Yerusaleme, otelamene vana vena nkel’a kangu dia Yave, otambikidi yimenga ya ngioka ye yimenga ya ungudi,+ olambisi e lambu mu kuma kia selo yandi yawonso.

16 Muna ntangwa yayina, akento wole akembi bezidi kwa ntinu, batelamene vana kena. 17 O nkento antete ovovele vo: “Dodokolo e mfumu ame, mono yo nkento ndioyu nzo mosi tuzingilanga, vava yawutidi mwana muna nzo kakedi. 18 Vioka lumbu tatu vava yawutidi, yandi mpe owutidi mwana. Yeto wole kaka twakala; ke twakedi ye muntu ankaka ko muna nzo. 19 Muna fuku mwan’andi ofwidi, kadi wanietamena. 20 Ozevo, muna dingi-dingi otelamene, ekolo ntaudi aku kalele, obongele mwan’ame vana ndambu ame, unsidi vana ndambu andi,* o mwan’andi wafwa unsidi vana moko mame. 21 Vava yasikamene muna mene-mene yayemeka mwan’ame, mbwene vo wafwa. Vava ntomene kumfimpa, mbwene vo ke yandi ko i mwan’ame yawutidi.” 22 Kansi, o nkento wankaka ovovele vo: “Ke wau ko, o mwana amoyo i mwam’ame, oyu wafwa i mwan’aku!” Ona wantete ovovele vo: “Ke wau ko, ndioyo wafwa i waku, o mwana amoyo i wame.” I wau wuwu batantanenenge vana vena ntinu.

23 I bosi, o ntinu ovovele vo: “Omosi ovovele vo, ‘E mwana amoyo i wame, oyu wafwa i waku!’ Wankaka ovovele vo, ‘Ke wau ko, ndioyu wafwa i waku, o mwana amoyo i wame!’” 24 Ntinu ovovele vo: “Nuntwasila nsosolo.” Batwese nsosolo kwa ntinu. 25 Ntinu ovovele vo: “Nuzenga mwana amoyo vana kati, nuvana tini kimosi kimosi kwa konso nkento.” 26 Nkento ona ovuidi mwana amoyo wau kamwena mwan’andi nkenda, vana vau ododokele ntinu. Ovovele vo: “Dodokolo e mfumu ame! Umvana mwana amoyo! Kumvondi ko!” Kansi ona wankaka ovovele vo: “Ke kala waku ko ngatu wame! Nunzenga vana kati!” 27 Muna diadi, ntinu ovovele vo: “Nuvana mwana amoyo kwa nkento wantete! Ke numvondi ko, kadi yandi i ngudi andi.”

28 Isaele yawonso vava bawidi e mpila ina ntinu kazengele o mfundu, bavumini* ntinu,+ kadi bamwene wo vo e ngangu za Nzambi za zenga mfundu+ zina muna yandi.