Luvaiku
4 Mose ovutwidi vo: “Kansi, adieyi ivanga avo ke bankwikidi ko ngatu kungwila?+ Kadi balenda vova vo: ‘Yave kamonekene kwa ngeye ko.’” 2 Yave unyuvuidi vo: “Nki kiokio kina ova koko kwaku?” Mose ovutwidi vo: “Nkau.” 3 Nzambi umvovese vo: “Tuba wo vana ntoto.” Mose otubidi wo vana ntoto, o nkau ukitukidi se nioka;+ Mose otinini wo. 4 Yave ovovese Mose vo: “Lambula koko kwaku, unsimba muna nkila.” Olambwidi o koko yo kunsimba muna nkila, e nioka ikitukidi se nkau vana koko kwandi. 5 I bosi, Nzambi ovovele vo: “I wau wuwu ovanga kimana bakwikila vo Yave wa Nzambi a mase mau, Nzambi a Abarayama, Nzambi a Isaki yo Nzambi a Yakobo,+ omonekene kwa ngeye.”+
6 Yave umvovese diaka vo: “Dodokolo, kotesa koko kwaku kuna nsi a kinkutu kiaku.” Muna diadi, okotese koko kwandi kuna nsi a kinkutu kiandi. Vava kavaikisi ko, o koko kwandi kuzele yo wazi, kumene pemba nze mvul’ampembe!+ 7 I bosi, ovovele vo: “Vutula o koko kuna nsi a kinkutu kiaku.” Mose ovutwidi o koko kuna nsi a kinkutu kiandi. Vava kavaikisi o koko kuna nsi a kinkutu, kuvutukidi nze una wakala e nitu andi yawonso! 8 Nzambi ovovele vo: “Avo ke bekukwikila ko ngatu sia sungididi muna sinsu kiantete, ozevo besia e sungididi muna sinsu kiazole.+ 9 Kansi, avo ke bakwikidi mu sinsu yole yayi ko yovo ke bazolele wila nding’aku ko, bonga fimaza muna Nzadi a Nile yo yitila mo vana ntoto ayuma, o maza obonga muna Nile mekituka se menga vana ntoto ayuma.”+
10 Mose ovovele kwa Yave vo: “Undoloka e Yave, kansi kimpovi ambote ko, kiateka wo kala ko ngatu kituka wo tuka oyantikidi mokenena yo selo kiaku; kadi e mpov’ame ya malembe,* o lubini lwame lwa nkukumi.”+ 11 Yave ovovese Mose vo: “Nani wavana o nua kwa wantu? Nani wabakitula mababa, afwa-matu, amoni yovo mpofo? Nga ke mono Yave ko e? 12 Owau wenda, ikala yaku ekolo ovova,* ikulonga mana ofwete vova.”+ 13 Kansi, Mose ovovele vo: “Undoloka e Yave, dodokolo, tuma kwaku konso muntu ankaka ozolele tuma.” 14 I bosi, o Yave ofungidi Mose makasi, oyuvuidi vo: “O mpangi aku Arone+ wa Nlevi, nga kena kwakuna ko e? Nzeye wo vo yandi ozeye toma vova. Owau mu nzila kena mu kwiza wawana yaku. Vava kekumona, o ntim’andi uyangalala.+ 15 Vovana yandi yo sia e mvovo muna nu’andi,+ omono ikala yeno vava nuvova,+ ikunulonga mana nuvanga. 16 Yandi ovova kwa nkangu vana fulu kiaku, okala se kimpovela kiaku, ongeye okala se Nzambi kwa yandi.*+ 17 Ongeye osimba o nkau wau vana koko kwaku yo vangila wo masivi.”+
18 Muna kuma kiaki, Mose ovutukidi kwa Yitero wa se diandi dia nzitu+ yo kumvovesa vo: “Dodokolo, nzolele vutuka kwa mpangi zame ana bena kuna Engipito, mu zaya kana vo bakinu o moyo.” Yitero ovutwidi Mose vo: “Wenda mu luvuvamu.” 19 I bosi, Yave ovovese Mose kuna Midiani vo: “Wenda, vutuka kuna Engipito, kadi wantu awonso bavavanga kuvonda* bafwa.”+
20 Mose obongele nkaz’andi yo wan’andi, ubasidi vana buluku, ovutukidi kuna nsi ya Engipito. Vana ntandu, Mose obongele nkau a Nzambi aludi. 21 I bosi, Yave ovovele kwa Mose vo: “Vava ovutuka kuna Engipito, sia sungididi wavanga masivi mawonso vana meso ma Faro mana ivanini o nkuma wa vanga.+ Kansi, iyambula vo ntim’andi wabala,+ ke sindika nkangu ko.+ 22 Vovesa Faro vo: ‘I wau wuwu kavovele o Yave: “O Isaele mwan’ame, mwan’ame antete.+ 23 Ikanikini wasindika mwan’ame, kimana kenda kunsadila. Kansi, avo kukunsindika ko, omono ivonda mwan’aku, o mwan’aku antete.”’”+
24 Ekolo kakala muna nzila, vana fulu kialwakilanga e nzenza, Yave+ owanane yandi, ovavidi kumvonda.+ 25 I bosi, Sipora+ obongele tadi dia meno,* ozengele kutu kia mwan’andi, oyambwidi vo kiatela malu mandi,* ovovele vo: “Kadi u toko diame diansompi dia menga.” 26 Muna kuma kiaki, Nzambi unyambwidi kenda. I bosi Sipora ovovele vo, “toko diansompi dia menga,” mu kuma kia zengwa.
27 I bosi, Yave ovovese Arone vo: “Wenda muna makanga wawanana yo Mose.”+ Muna diadi, Arone wele wanana yandi vana mongo a Nzambi aludi,+ unkayisi mu mfibu. 28 Mose ozayisi Arone mvovo miawonso mia Yave, ona wantuma,+ ye sinsu yawonso ina Nzambi kakanikina vo kavanga.+ 29 I bosi, Mose yo Arone bele kutakesa akuluntu awonso a Isaele.+ 30 Arone ubavovese mambu mawonso mana Yave kazayisa kwa Mose. O Mose ovangidi masivi+ vana meso ma nkangu. 31 Muna kuma kiaki, o nkangu unkwikidi.+ Vava bawidi vo Yave ovutwidi e sungididi kiandi kwa Aneyisaele+ yo mona lubangamu lwau,+ bavumbamene yo fukama.