Wanzole wa Samuele

12 I bosi, Yave otumini Natani+ kwa Davidi. Olweke kwa yandi,+ umvovese vo: “Mwakala wantu wole muna mbanza, mosi mvuama, wankaka nsukami. 2 O mvuama wakala ye ulolo wa mameme ye ngombe;+ 3 kansi, o nsukami kakala ye lekwa ko, kimwana-mwana kia meme dia nkento kaka, kina kasumba+ yo dikila kio, kikudidi kumosi yo wan’andi amakala. Kiadianga fimadia kalendanga, yo nuina muna mbungw’andi yo leka muna nkat’andi. Kikedi nga mwan’andi ankento. 4 Lumbu kimosi, mvuama otambwidi nzenza, vana fulu kia bonga meme diandi yovo ngombe andi, kakubikila nzenza ona wanlwakila, obongele mwan’ameme a nsukami, unkubikidi mu kuma kia nzenza ona wanlwakila.”+

5 Davidi ofungidi muntu ndiona makasi, ovovese Natani vo: “Ndidi e ndofi muna Yave wa Nzambi amoyo vo,+ o muntu ovangidi diambu diadi, lufwa lumfwanukini! 6 Kafwete futa mameme mayá,+ wau kavangidi diambu diadi yo lembi kumfwila e nkenda.”

7 Natani ovovese Davidi vo: “Ongeye i muntu ndioyo! I wau wuwu kavovele Yave wa Nzambi a Isaele: ‘Mono kibeni yakusa se ntinu a Isaele+ yo kuvuluza vana moko ma Saulu.+ 8 Yakala ye luzolo lwa kuvana e nzo a mfumu aku+ yo sia akento a mfumu aku+ vana moko maku, yavana e nzo a Isaele ye Yuda.+ O mambu mama avo ke mafwana ko, yadi kuvangila diaka mambu mayingi.+ 9 Ekuma ovezele diambu dia Yave muna vanga diambu diadi diambi vana meso mandi? Ovondese Uriya wa Nkete muna nsosolo!+ Obongele nkaz’andi unkitwidi se nkaz’aku,+ umvondesele muna nsosolo wa Aneyamone.+ 10 I dianu vo, o nsosolo ke ukatuka diaka ko muna nzo aku,+ kadi umvezele wau obongele nkento a Uriya wa Nkete kakala nkaz’aku.’ 11 I wau wuwu kavovele o Yave: ‘Itwasa mpasi muna nzo aku;+ ibaka akento aku vana meso maku, yabavana kwa yakala diankaka,*+ oyandi okubaleka muna mwini.*+ 12 Ongeye mu kinsweki wavangidi wo,+ omono muna mwini ivangila wo vana vena Isaele yawonso.’”*

13 Davidi ovovese Natani vo: “Nsumukini Yave.”+ Natani ovutwidi kwa Davidi vo: “Yave ololokele sumu diaku.*+ Kufwa ko.+ 14 Kansi, wau vo otiangwini Yave muna diambu diadi, mwan’aku ona owutukidi, fwa kefwa.”

15 Natani wele kuna nzo andi.

Yave owende mwana ona nkaz’a Uriya kawutila Davidi, oyelele. 16 Davidi ododokele Nzambi aludi muna wete dia mwana. Davidi ofionkonuene* yo leka vana ntoto fuku wawonso muna suku diandi.+ 17 Muna kuma kiaki, akuluntu a nzo andi batelamanga vana kena muna kuntelamesa vana ntoto, kansi kazolanga ko, kazolanga dia yau mpe ko. 18 Muna lumbu kia nsambwadi mwana wafwa, kansi selo ya Davidi bamwene wonga wa kunzayisa vo mwana ofwidi. Bavovele vo: “Vava mwana kakele moyo twamvovesa, kansi katuwila ko. Ozevo, aweyi tulenda kunzayisila vo mwana ofwidi? Olenda kuyivanga diambu diambi.”

19 Davidi vava kamwene vo selo yandi bewunininanga, obakwidi wo vo mwana ofwidi. Davidi oyuvuidi selo yandi vo: “Nga mwana ofwidi e?” Bavutwidi vo: “Ofwidi.” 20 Davidi otelamene vana ntoto. Oyowele yo kuyikusa mazi,+ osobele mvuatu miandi, wele kuna nzo+ a Yave, ovumbamene. I bosi, ovutukidi kuna nzo andi* yo lomba vo bantwasila madia, odidi kwandi. 21 E selo yandi banyuvuidi vo: “Ekuma ovangidi diadi? Vava mwana kakedi o moyo, ofionkonuene yo dila; kansi, wau kafwidi, otelamene yo dia.” 22 Ovutwidi vo: “Vava mwana kakedi o moyo yafionkonona+ yo dila, kadi edi yayindwidi: ‘Nani ozeye kana vo Yave okunsonga dienga yo yambula vo mwana kazinga?’+ 23 Ekuma ifionkonuena wau vo mwana ofwidi? Nga ndenda kumvutula moyo e?+ Mono ikwenda kuna kena,+ kansi oyandi ke vutuka kwa mono ko.”+

24 I bosi, Davidi ofiaulwisi Bate-seba+ wa nkaz’andi. Okotele yandi muna nzo, olele yandi. Kuna kwalanda, owutidi mwan’ayakala, umvene nkumbu Solomo.*+ Yave wanzolanga,+ 25 ovovele muna Natani+ wa ngunza vo kamvana e nkumbu Yedideya,* kadi Yave wanzolanga.*

26 Yoabe okwamanene nuanisa Raba+ ya Aneyamone,+ obakidi mbanz’a kintinu.+ 27 Muna diadi, Yoabe otumini wantu kwa Davidi, oku vo: “Ndwanisi e Raba,+ mbakidi e mbanz’a maza.* 28 Owau kutakesa makesa mana masidi, nuazieta e mbanza yo baka yo. Kadi avo mbakidi yo, o nkembo kwa mono uvewa.”*

29 Dianu vo, Davidi okutakese makesa mawonso, wele nuanisa Raba, obakidi yo. 30 Okatwidi kolowa kuna ntu a Malekame,* ina yakala ye zitu dia talanta imosi* a wolo, kumosi ye matadi ma ntalu, ivuikilu vana ntu a Davidi. Obakidi mpe sanzu diayingi+ muna mbanza.+ 31 Obakidi nkangu wakala mo, ubasidi muna salu kia wula matadi, yo sadila salanganu ya sengwa yatuá, masoka* yo vanga dobo. I wau kavanga muna mbanza zawonso za Aneyamone. I bosi, Davidi yo makesa mawonso bavutukidi kuna Yerusaleme.