Kuna Kwa Ayibere

6 Dianu vo, wau tumene longoka mambu ma lubantiku+ mu kuma kia Kristu, yambula twanungunuka yavana tuzikuka,+ lembi kuba diaka nkubilwa, i sia vo, luviluku lwa ntima muna mavangu mafwa yo lukwikilu muna Nzambi, 2 longi dia luvubu, ngiambik’a moko,+ lufuluku lwa mafwa+ ye mfundis’a mvu ya mvu. 3 I diau tuvanga, avo Nzambi ozola.

4 Kadi awana bateka vewa umbakuzi+ yo yeleka lukau lwangovo lwa zulu ye awana bakituka akwa kunku muna mwand’avelela 5 ye awana bayeleka e diambu diambote dia Nzambi ye nsambu za* tandu* kikwiza, 6 kansi bavengomoka,+ ke dilendakana ko mu kubafila diaka muna luviluku lwa ntima, e kuma kadi bakoma diaka Mwan’a Nzambi vana nti yo kumfusulwisa e nsoni vana meso ma ndonga.+ 7 Kadi ntoto usambulwanga kwa Nzambi vava unuanga maza ma mvula zinokanga mo yo yima e mbongo ina vo yamfunu kw’awana bevatanga wo. 8 Kansi, avo uyimini nsende ye nkeka za mfinda, ubembolwa, ke kolo ko usibwa, kuna mfoko, uyokwa.

9 Kansi azolwa, kanele vo tuvovele e mpila yayi, kuna kwa yeno tuna ye ziku kia mambu mambote, mana metwasa luvuluzu. 10 Kadi Nzambi kakondelo unsongi ko kavilakana e salu kieno yo zola nuasonga muna nkumbu andi,+ wau nuasadila avauki yo kwamanana kubasadila. 11 Kansi tuzolele vo konso muntu muna yeno kasonga e fululu kiau kimosi yo kala ye vuvu+ kiasikila yakuna mbaninu,+ 12 kimana nualembi kala miolo,+ kansi nuatanginina awana bena vo muna lukwikilu yo luzindalalu i bevuilanga e nsilu.

13 Kadi o Nzambi vava kasila Abarayama o nsilu, wau vo kalendi dila muntu osundidi nene ndofi ko, ukididi e ndofi,+ 14 oku vo: “Sambula kikilu ikusambula, wokesa kikilu iwokesa mbongo aku.”+ 15 Abarayama wau kazindalala, wavua o nsilu wau. 16 Kadi o wantu, bedilanga e ndofi ndiona osundidi nene, e ndofi au isukisanga e mpaka zawonso, kadi kuna kwa yau e ndofi i lusikidisu lwa mambu.+ 17 Diau dimosi mpe, Nzambi vava kabaka e nzengo za songa kw’awana bevua o nsilu+ vo e kani diandi ke dilendi soba ko, wasikidisila wo muna ndofi, 18 kimana muna mambu mole ke malendi soba ko, mena vo Nzambi kalendi vuna ko,+ oyeto twatinina kwa Nzambi twabaka lukasakeso lwa nkuma yo simbinina e vuvu kina twavewa. 19 E vuvu kiaki tuna kiau+ kina nze mbwa a nzaza* a mioyo mieto, kia ludi ye kiasikila, kikutukotesanga kuna nim’a rido,+ 20 kuna kwakota Yesu+ ona wavita muna wete dieto, wakituka se ngang’ambuta yakwele mvu, nze kinganga kia Mankizedeke.+