Mavangu ma Zintumwa
22 “Ampangi yo mase, nungwa, ekolo ikunusasila dina diavangama.”+ 2 Wau bawidi vo muna nding’a Kiyibere kabavovesele, awonso basidi kaka e pi-i, ovovele vo: 3 “Mono i Nyuda,+ muna Taso a Kilikia yawutukila,+ kansi yalongelwa mu mbanza yayi vana malu ma Ngamaliele,+ yalongwa vo yatoma zitisanga Nsiku a mase meto,+ yo kala yo vema muna Nzambi nze i yeno awonso o unu.+ 4 Yabangikanga alandi a Nzila yayi yamuna lufwa, kanga yo sia akala ye akento muna pelezo,+ 5 ngang’ambuta ye akuluntu awonso balenda sia kimbangi. Yau mpe bampana nkanda mu kuma kia ampangi kuna Damaseke, yayenda kimana yakanga yo twasa awana bakala muna Yerusaleme kimana batumbwa.
6 “Kansi, ekolo yakangalanga muna nzila yo finama Damaseke, muna tezo kia ola ya 12, kuna kinsalukisa ntemo angolo watuka kuna zulu, untemene,+ 7 mbwidi vana ntoto, ngwidi ndinga impovese vo: ‘E Saulu, e Saulu, ekuma okumbangikilanga?’ 8 Mvutwidi vo: ‘Ongeye u nani e Mfumu?’ Umpovese vo: ‘Mono i Yesu wa musi Nazarete, ona obangikanga.’ 9 Awana bakala yame, bamona o ntemo kansi ke bawa ndinga ko ya muntu wamokenanga yame. 10 Mono yavova vo: ‘Adieyi mfwete vanga, e Mfumu?’ O Mfumu wampovesa vo: ‘Telama, wenda muna Damaseke, i muna osamunuinua mawonso ofwete vanga.’+ 11 Wau vo kiamonanga diaka ko mu kuma kia ntemo angolo, awana bakala yame bansimba muna koko yo lwaka muna Damaseke.
12 “I bosi, muntu mosi nkumbu andi Ananiya, ona wavuminanga Nzambi mun’owu wa Nsiku, ona wasilwanga kimbangi kiambote kwa Ayuda awonso bakala ko, 13 wizidi kwa mono. Otelamene vana yakala, Umpovese vo: ‘E Saulu, e mpangi, mona diaka!’ Vana vau, meso mame matemokene, imwene.+ 14 Ovovele vo: ‘O Nzambi a mase meto usolele wazaya luzolo lwandi yo mona muntu ansongi+ yo wá ndinga a nua andi, 15 kadi okunsila umbangi kwa wantu awonso muna mana omwene yo wá.+ 16 Adieyi ovingilanga? Telama, wavubwa yo sukula masumu maku+ muna vovela nkumbu andi.’+
17 “Kansi, vava yavutuka kuna Yerusaleme,+ ekolo yasambanga muna tempelo, yamona e mona-meso, 18 o Mfumu umpovese vo: ‘Telama, vaika muna Yerusaleme mu nzaki zawonso, kadi umbangi waku mu kuma kiame ke betambulwila wo ko.’+ 19 Mono yavova vo: ‘E Mfumu, yau kibeni batomene wo zaya vo muna masambilu mawonso, yakanganga yo zwabula awana bakwikilanga muna ngeye;+ 20 vava menga ma Setefano wa mbangi aku mabungulwa, omono mpe yakala vana, yatonda dio yo lunga-lunga mvuatu mia awana bamvonda.’+ 21 Kansi, umpovese vo: ‘Wenda, kadi ikutuma muna zula ina kwandá.’”+
22 Banwidi yamuna mvovo miami. I bosi, bakazidi, oku vo: “Katula muntu ndioyo ova nza, kadi kafwanukini zinga ko!” 23 Wau bakazanga, balozele mvuatu miau yo tuba o ntoto muna zulu,+ 24 mfumu a makesa okanikini vo Paulu kakoteswa muna lûmbu lwa makesa, ovovele vo kafimpwa yo wandwa, kimana oyandi kazaya e kuma bekazilanga vo Paulu kavondwa. 25 Kansi, vava bankangidi kimana kawandwa, Paulu ovovele kwa mfidi a makesa ona wakala vana ndambu vo: “Nga diansongi kwa yeno dia wanda musi Roma ona walembi vewa e ngielele kuna mbazi a nkanu e?”+ 26 O mfidi a makesa vava kawidi wo, wele kwa mfumu a makesa, unsamunuini vo: “Adieyi ozolele vanga? Kadi muntu ndioyo musi Roma.” 27 Dianu vo, o mfumu a makesa wizidi, unyuvuidi vo: “Unzayisa, nga u musi Roma?” Ovutwidi vo: “Ingeta.” 28 Mfumu a makesa ovovele vo: “Omono nzimbu zayingi yafuta muna kituka musi Roma.” Paulu ovovele vo: “Kansi omono kia kingutukila.”+
29 Dianu vo, awana bazola kumfimpa yo kunwanda bakatukidi vana kakala; mfumu a makesa omwene wonga wau kazaya vo Paulu musi Roma, kadi wankangisa muna tuvambu.+
30 Muna lumbu kialanda, wau kazola zaya e kuma Ayuda bamfundila, unyambwidi, olungalakese nganga zambuta ye Mbazi a Nkanu* yawonso. I bosi, otwese Paulu, untelamese vana kati kwau.+