Wanzole wa Paulu Kuna kwa Esi Korinto
6 Wau vo tu asadi kumosi yo Nzambi,+ tunuwondelele nualembi tambula e nsambu za Nzambi nkatu-nkatu.+ 2 Kadi wavova vo: “Muna ntangwa dienga, yawá, muna lumbu kia luvuluzu yasadisa.”+ Eyayi i ntangwa dienga. Nutala, owau i lumbu kia luvuluzu.
3 Ke tutesesa nkutu muntu sakuba ko muna konso diambu, kimana e salu kieto kialembi tumbwa;+ 4 kansi muna mawonso tukuyisonganga vo tu selo ya Nzambi,+ muna luzindalalu lwayingi, muna lubangamu, muna nkondelo, muna mpasi,+ 5 muna ngwandwa, muna pelezo,+ muna nkindu, muna mfuntuka, muna nkondelo a tulu, muna nkondelo a madia;+ 6 muna velela, muna zayi, muna luzindalalu,+ muna wete,+ muna mwand’avelela, muna zola kwa kondwa kivunina,+ 7 muna diambu dialudi, muna nkum’a Nzambi;+ muna nuaninua ya unsongi+ kuna koko kwalunene* ye kwalumonso,* 8 muna nkembo ye luvezo, muna nsangu zambi ye nsangu zambote. Tubadikilwanga se akwa luvunu, kansi tu akwa ludi, 9 nze wantu balembi zayakana, kansi tuzayakene, nze yeto se tufwa,* kansi, tuna moyo,+ nze yeto twatumbwa, kansi ke twayekolwa muna lufwa ko,+ 10 nze yeto tuna mu ntantu, kansi mu kiese tuna, nze tu asukami, kansi ayingi tuvuamisanga, nze ke tuna ye lekwa ko, kanele vo tuvuidi lekwa yawonso.+
11 Tuziudi nua mieto kwa yeno esi Korinto, tuziwidi mpe ntima mieto. 12 Ke tukulwidi o zola kweto ko omu yeno,+ kansi yeno nukulwidi o zola kweno omu yeto. 13 Dianu vo, inuvovese nze wan’ame—nuvanga diau dimosi mu kuma kieto—nuziula e ntima mieno.+
14 Ke nukadi kintwadi ye mindembi-kwikila ko.+ Kadi nkia ngwizani ina vana vena unsongi ye umpumbulu?+ Nga ntemo ulenda kala e ntwadi ye tombe?+ 15 Nkia ngwizani ina vana vena Kristu yo Beliale?*+ Yovo, nkia ngwizani ina vana vena munkwikizi ye mundembi-kwikila?+ 16 Nkia ngwizani ina e tempelo a Nzambi ye teke?+ Kadi yeto tu tempelo a Nzambi amoyo;+ wauna Nzambi kavova vo: “Ikala vana bena+ yo kangala yau, ikala Nzambi au, oyau bekala nkangu ame.”+ 17 “‘Dianu vo, nuvaika vana bena, nubavambuka,’ u kavovele Yave,* ‘nuyambula simba lekwa kiafunzuka’”;+ “‘mono ikunutambula.’”+ 18 “‘Ikala se dieno,+ oyeno nukala wan’ame amakala ye amakento,’+ u kavovele o Yave* wa Mpungu-ngolo.”