Kuna Kwa Ayibere
3 Dianu vo, ampangi avelela, akwa kunku muna mbok’a zulu,+ nuyindula o ntumwa ye ngang’ambuta ona tuzeye*—Yesu.+ 2 Wasonga kwikizi kwa Ndiona wansola,+ wauna Mose kasongela e kwikizi kwa Nzambi ekolo kasadilanga muna nzo* andi yawonso.+ 3 Kadi yandi* ofwene vewa nkembo+ lutila nkutu una wavewa kwa Mose, kadi o ntungi a nzo osundidi zitu ke mu nzo ko. 4 Kieleka, konso nzo kwa muntu yatungwa, kansi ndiona watunga e lekwa yawonso i Nzambi. 5 Mose selo kiakwikizi kakala muna nzo yawonso ya Nzambi. E salu kiandi kiakala se kimbangi* muna mambu mevovua kuna ntwala, 6 kansi wau vo Kristu i mwan’a mfumu a nzo,+ wasikila ye kwikizi muna nzo a Nzambi. Oyeto tu nzo a Nzambi,+ avo tutatidila unkabu wavova yo tatidila e vuvu kieto tukukisaninanga yakuna mbaninu.
7 Dianu vo, wauna mwand’avelela uvovanga:+ “O unu, avo nuwididi e nding’andi, 8 ke nubadisa ntima mieno ko nze una kiafusuka makasi ma ndudi, muna lumbu kia ntonta muna makanga,+ 9 muna bantontela akulu eno, kanele vo bamona mavangu mame mu mvu 40.+ 10 Ikuma yamengena e mbandu yayina, yavova vo: ‘Ntangwa zawonso nkangu wau ulandanga makani ma ntima miau; ke basidi zaya nzila zame ko.’ 11 I dianu yadila e ndofi muna makasi mame vo: ‘Ke bekota muna vundu kiame ko.’”+
12 Ampangi, nuyikeba, valembi kala muntu muna yeno ona olenda kala yo ntim’ambi, wakondwa lukwikilu muna kuyivambula yo Nzambi amoyo;+ 13 kansi nukasakesanga muntu yo nkwandi e lumbu yawonso, ekolo yakinu e ntangwa iyikilwanga vo “Unu,”+ kimana valembi kala yo muntu muna yeno obadiswa o ntima kwa nkum’a umpukumuni wa sumu. 14 Kadi tukituka akwa kunku muna Kristu avo tutatididi e vuvu twakala kiau kuna lubantiku yakuna mbaninu.+ 15 Wau kiavovua vo: “O unu, avo nuwididi e nding’andi, ke nubadisa ntima mieno ko nze una kiafusuka makasi ma ndudi.”+
16 Kadi aki nani bawá yo fungisa Nzambi makasi ma ndudi? Nga ke yau awonso ko ana bavaikiswa muna Engipito kwa Mose?+ 17 Aki nani Nzambi kafungila makasi mu mvu 40?+ Nga ke awana basumuka ko, ana bafwila muna makanga?+ 18 Aki nani kadila ndofi vo, ke bekota muna vundu kiandi ko? Nga ke awana bakolama ko e? 19 Tumwene vo ke balenda mo kota ko kadi ke bakala ye lukwikilu ko.+